പെർത്ത് ഹിൽസിൽ വൻ ദുരന്തം: നിയന്ത്രണം വിട്ട കാർ മരത്തിലിടിച്ച് മൂന്ന് മരണം

പെർത്ത്: വെസ്റ്റേൺ  ഓസ്ട്രേലിയയിലെ പെർത്ത് ഹിൽസിൽ ഇന്ന്  രാവിലെയുണ്ടായ ദാരുണമായ വാഹനാപകടത്തിൽ മൂന്ന് പേർക്ക് ജീവൻ നഷ്ടപ്പെട്ടു. പെർത്ത് നഗരമധ്യത്തിൽ (CBD) നിന്നും ഏകദേശം 30 കിലോമീറ്റർ അകലെയുള്ള സ്റ്റോൺവില്ലെ റോഡിൽ രാവിലെ 8:50-ഓടെയാണ് നാടിനെ നടുക്കിയ അപകടം നടന്നത്. നിയന്ത്രണം നഷ്ടപ്പെട്ട കാർ റോഡരികിലെ മരത്തിലേക്ക് അതിശക്തമായി ഇടിച്ചുകയറുകയായിരുന്നു. വാഹനത്തിലുണ്ടായിരുന്ന മൂന്ന് മുതിർന്ന യാത്രികരാണ് സംഭവസ്ഥലത്ത് വെച്ച് തന്നെ മരിച്ചത്.

വിവരമറിഞ്ഞയുടൻ അടിയന്തര രക്ഷാപ്രവർത്തകർ എത്തിയെങ്കിലും പരിക്കുകൾ അതീവ ഗുരുതരമായിരുന്നതിനാൽ മൂവരുടെയും ജീവൻ രക്ഷിക്കാനായില്ല. ഇടിയുടെ ആഘാതത്തിൽ വാഹനം പൂർണ്ണമായും തകർന്നിരുന്നു. അപകടത്തിൽപ്പെട്ടവരുടെ വിവരങ്ങൾ പൊലീസ് ഇതുവരെ ഔദ്യോഗികമായി പുറത്തുവിട്ടിട്ടില്ല. മരിച്ചവരുടെ കുടുംബാംഗങ്ങളെ വിവരം അറിയിച്ചതിന് ശേഷം മാത്രമേ പേരുകൾ ഉൾപ്പെടെയുള്ള വിശദാംശങ്ങൾ വെളിപ്പെടുത്തുകയുള്ളൂ എന്ന് അധികൃതർ വ്യക്തമാക്കി.

അന്വേഷണം ഊർജ്ജിതം; ഗതാഗതം നിരോധിച്ചു 

അപകടത്തെ തുടർന്ന് സ്റ്റോൺവില്ലെ റോഡിലൂടെയുള്ള ഗതാഗതം പൂർണ്ണമായും നിർത്തിവെച്ചു. വെസ്റ്റേൺ  ഓസ്ട്രേലിയൻ പൊലീസിന്റെ പ്രത്യേക വിഭാഗമായ ‘മേജർ ക്രാഷ് സീൻ ഇൻവെസ്റ്റിഗേഷൻ യൂണിറ്റ്’ സ്ഥലത്തെത്തി വിശദമായ അന്വേഷണം ആരംഭിച്ചിട്ടുണ്ട്. അമിതവേഗതയാണോ, വാഹനത്തിന്റെ സാങ്കേതിക തകരാറാണോ അതോ മറ്റെന്തെങ്കിലും ഘടകങ്ങളാണോ അപകടത്തിന് കാരണമായതെന്ന് ശാസ്ത്രീയ പരിശോധനകളിലൂടെ കണ്ടെത്താനാണ് ശ്രമം.

വില്ലനായി റോഡിലെ വളവുകൾ? 

പെർത്ത് ഹിൽസ് മേഖലയിലെ ഗ്രാമീണ റോഡുകളുടെ സുരക്ഷ സംബന്ധിച്ച് നേരത്തെ തന്നെ വലിയ ആശങ്കകൾ നിലനിൽക്കുന്നുണ്ട്. അപകടം നടന്ന പ്രദേശത്തെ കൊടുംവളവുകളും അശാസ്ത്രീയമായ വേഗപരിധിയും ഈ ദുരന്തത്തിന്റെ പശ്ചാത്തലത്തിൽ വീണ്ടും ചർച്ചയാകുകയാണ്. പൊലീസ് അന്വേഷണം പൂർത്തിയാകുന്നതോടെ അപകടത്തിന്റെ യഥാർത്ഥ കാരണം വ്യക്തമാകുമെന്നാണ് പ്രതീക്ഷിക്കുന്നത്.

Sajin Thiruvallam
News Editor