ഓസ്‌ട്രേലിയൻ രാഷ്ട്രീയത്തിൽ വൻ മാറ്റങ്ങൾ: പ്രതിസന്ധിയിലായി ലിബറൽ പാർട്ടി, കുതിച്ചുയർന്ന് One Nation Australia

ഓസ്‌ട്രേലിയൻ രാഷ്ട്രീയത്തിൽ അപ്രതീക്ഷിത മാറ്റങ്ങൾ സംഭവിക്കുന്നു. ലിബറൽ പാർട്ടിയിലെ പ്രമുഖ നേതാക്കൾ One Nation Australia പാർട്ടിയിലേക്ക് ചേക്കേറുന്നത് കോളിഷന് വലിയ തിരിച്ചടിയായി മാറിയിരിക്കുകയാണ്. പോളിൻ ഹാൻസന്റെ (Pauline Hanson) പുതിയ ഡിഫൻസ് നയങ്ങളും പ്രധാനമന്ത്രി ആന്റണി അൽബനീസിന്റെ വിമർശനങ്ങളും നിലവിലെ രാഷ്ട്രീയ അന്തരീക്ഷത്തെ കൂടുതൽ ചൂടുപിടിപ്പിക്കുന്നു. ഓസ്‌ട്രേലിയയിലെ പുതിയ രാഷ്ട്രീയ കാലാവസ്ഥ മലയാളി സമൂഹത്തെയും നേരിട്ട് ബാധിച്ചേക്കാം.

ലിബറൽ നേതാക്കൾ വൺ നേഷനിലേക്ക്

ഫെഡറൽ രാഷ്ട്രീയത്തിൽ ലിബറൽ-നാഷണൽ കോളിഷൻ വലിയ പ്രതിസന്ധിയാണ് നേരിടുന്നത്. മെയ് മാസത്തിൽ മുൻ ലിബറൽ സെനറ്റർ ഹോളി ഹ്യൂസും (Hollie Hughes), പാർട്ടി മുൻ വൈസ് പ്രസിഡന്റ് ടീന മക്ക്വീനും വൺ നേഷനിൽ ചേർന്നത് കോളിഷന് വലിയ ഞെട്ടലുണ്ടാക്കിയിരുന്നു. ഇതിന് പിന്നാലെ ടാസ്മാനിയയിൽ നിന്നുള്ള ഷാഡോ ഹോം അഫയേഴ്‌സ് മന്ത്രിയും ലിബറൽ സെനറ്ററുമായ ജൊനാഥൻ ഡ്യൂണിയം (Jonathon Duniam) രാഷ്ട്രീയത്തിൽ നിന്ന് വിരമിക്കുമെന്ന് ജൂൺ 14-ന് പ്രഖ്യാപിച്ചു. കുടുംബത്തിനായി സമയം കണ്ടെത്താനാണ് തീരുമാനമെന്നും, പാർട്ടിക്കുള്ളിലെ നേതൃമാറ്റങ്ങളും ആന്തരിക പ്രശ്നങ്ങളും തന്നെ ക്ഷീണിപ്പിച്ചതായും അദ്ദേഹം വ്യക്തമാക്കി.

പുതിയ പോളിങ് ഫലങ്ങൾ പ്രകാരം വൺ നേഷന്റെ ജനപ്രീതി കുതിച്ചുയരുകയാണ്. ഏറ്റവും പുതിയ റിസോൾവ് പോൾ (Resolve poll) പ്രകാരം വൺ നേഷന് 29% പ്രൈമറി വോട്ട് ലഭിച്ചപ്പോൾ, ലേബർ പാർട്ടിക്ക് 28 ശതമാനവും ലിബറൽ കോളിഷന് കേവലം 20 ശതമാനവും മാത്രമാണ് നേടാനായത്.

പോളിൻ ഹാൻസന്റെ ഡിഫൻസ് പ്ലാനും വിമർശനങ്ങളും

ഓസ്‌ട്രേലിയയുടെ പ്രതിരോധ ചെലവ് (Defence spending) ജിഡിപിയുടെ നിലവിലെ 2 ശതമാനത്തിൽ നിന്ന് 5 ശതമാനമായി വർദ്ധിപ്പിക്കണമെന്ന പോളിൻ ഹാൻസന്റെ ആവശ്യത്തിനെതിരെ സാമ്പത്തിക വിദഗ്ധർ രംഗത്തെത്തി. പ്രതിരോധ വിദഗ്ധനായ മാർക്കസ് ഹെല്ലിയറിന്റെ വിലയിരുത്തൽ പ്രകാരം, നാല് വർഷത്തിനുള്ളിൽ ഈ പദ്ധതിക്ക് ഏകദേശം $400 ബില്യൺ അധികച്ചെലവ് വരും. ഓക്കസ് (AUKUS) കരാറിനേക്കാൾ വലിയ ഈ തുക കണ്ടെത്താൻ നികുതി വർദ്ധിപ്പിക്കുകയോ, ആരോഗ്യ-ഏജ്ഡ് കെയർ മേഖലകളിൽ വലിയ ഫണ്ട് വെട്ടിക്കുറവ് വരുത്തുകയോ വേണ്ടിവരുമെന്ന് വിദഗ്ധർ മുന്നറിയിപ്പ് നൽകുന്നു.

പ്രധാനമന്ത്രിയുടെ വിമർശനം

പ്രതിപക്ഷ നേതാവ് ആംഗസ് ടെയ്‌ലറുടെ (Angus Taylor) നേതൃത്വത്തിലുള്ള കോളിഷൻ, വൺ നേഷൻ പാർട്ടിയുടെ നയങ്ങളെ അനുകരിക്കുകയാണെന്ന് പ്രധാനമന്ത്രി ആന്റണി അൽബനീസീ കുറ്റപ്പെടുത്തി. ജനങ്ങളുടെ ഇടയിൽ പരിഭ്രാന്തി സൃഷ്ടിക്കുന്ന വൺ നേഷൻ രീതികൾ കോളിഷൻ പിന്തുടർന്നാൽ, വോട്ടർമാർ യഥാർത്ഥ പാർട്ടിയായ വൺ നേഷനെ തന്നെ തിരഞ്ഞെടുക്കുമെന്ന് അദ്ദേഹം മുന്നറിയിപ്പ് നൽകി.

കൂടാതെ, കുടിയേറ്റ നയങ്ങളിലും ദേശീയ സുരക്ഷയിലുമുള്ള ഈ മാറ്റങ്ങൾ ഓസ്‌ട്രേലിയയിലെ മലയാളി കമ്മ്യൂണിറ്റി ഉൾപ്പെടെയുള്ള പ്രവാസി സമൂഹത്തിന്റെ ഭാവിയെയും നിർണായകമായി സ്വാധീനിച്ചേക്കാം.

Sajin Thiruvallam
News Editor