ഓസ്‌ട്രേലിയയിൽ വൻ ആശ്വാസം: ഹെൽത്ത് വിദ്യാർത്ഥികൾക്ക് ഇനി ആഴ്ചയിൽ $338 സാമ്പത്തിക സഹായം!

ഓസ്‌ട്രേലിയയിൽ ഉപരിപഠനം നടത്തുന്ന ഹെൽത്ത് കോഴ്സ് വിദ്യാർത്ഥികൾക്ക് ആശ്വാസമായി Australia Paid Prac Expansion 2026 പദ്ധതി പ്രധാനമന്ത്രി ആന്റണി ആൽബനീസീ പ്രഖ്യാപിച്ചു. ആരോഗ്യമേഖലയിലെ നിർണായകമായ 10 കോഴ്‌സുകളിൽ കൂടി പഠനത്തോടൊപ്പം പേയ്ഡ് പ്രാക്ടിക്കൽ പ്ലേസ്‌മെന്റ് ആനുകൂല്യം ലഭ്യമാക്കാൻ ലേബർ സർക്കാർ തീരുമാനിച്ചു. ഈ തീരുമാനത്തിന് പിന്നിലെ പ്രധാന കാരണങ്ങളും വിദ്യാർത്ഥികൾക്ക് ലഭിക്കുന്ന യഥാർത്ഥ സാമ്പത്തിക ആനുകൂല്യങ്ങളും താഴെ അറിയാം.

10 പുതിയ കോഴ്‌സുകൾക്ക് ആഴ്ചയിൽ $338.60 സാമ്പത്തിക സഹായം

ഓസ്‌ട്രേലിയയിലെ പഠനകാലയളവിൽ നിർബന്ധിത പ്രാക്ടിക്കൽ പരിശീലനം (Unpaid Placement) നടത്തുന്ന വിദ്യാർത്ഥികൾ നേരിടുന്ന കടുത്ത സാമ്പത്തിക പ്രതിസന്ധി പരിഹരിക്കാനാണ് കേന്ദ്ര സർക്കാർ Commonwealth Prac Payment (CPP) വിപുലീകരിച്ചത്.

നിലവിൽ നഴ്‌സിങ്, ടീച്ചിങ്, മിഡ്‌വൈഫറി, സോഷ്യൽ വർക്ക് വിദ്യാർത്ഥികൾക്ക് ലഭ്യമായിരുന്ന ഈ സഹായം ഇനി ഫിസിയോതെറാപ്പി, ഫാർമസി, ക്ലിനിക്കൽ സൈക്കോളജി തുടങ്ങി 10 അലൈഡ് ഹെൽത്ത് മേഖലകളിലേക്ക് കൂടി നീട്ടും.

അർഹരായ വിദ്യാർത്ഥികൾക്ക് ആഴ്ചയിൽ $338.60 വീതം അധ്യയന പരിശീലന കാലയളവിൽ നേരിട്ട് ലഭിക്കും. 2027 ജൂലൈ 1 മുതലാണ് ഈ പുതിയ വിപുലീകരണം പൂർണ്ണമായി പ്രാബല്യത്തിൽ വരുന്നത്.

ഗ്രാമീണ മേഖലകളിലെ പരിശീലനത്തിന് കൂടുതൽ പിന്തുണ

തീരദേശ മേഖലകളിലും ഗ്രാമീണ മേഖലകളിലും (Regional & Remote Areas) പോയി പ്രാക്ടിക്കൽ ചെയ്യേണ്ടി വരുന്ന വിദ്യാർത്ഥികൾക്ക് താമസത്തിനും യാത്രയ്ക്കുമായി വൻതുക ചെലവഴിക്കേണ്ടി വരുന്നത് പഠനം തടസ്സപ്പെടുന്നതിനും ഇടയാക്കിയിരുന്നു.

പുതിയ പദ്ധതിയിലൂടെ 158.4 മില്യൺ ഡോളറിന്റെ അധിക സാമ്പത്തിക പാക്കേജാണ് സർക്കാർ അനുവദിച്ചിരിക്കുന്നത്. ഇത് വഴി ഇരുപതിനായിരത്തിലധികം അധിക വിദ്യാർത്ഥികൾക്ക് നേരിട്ട് സാമ്പത്തിക സഹായം ലഭിക്കും.

“ഭാവി ആരോഗ്യ സേവന മേഖലയെ ശക്തിപ്പെടുത്താനും വിദ്യാർത്ഥികളുടെ ജീവിതച്ചെലവ് ഭാരം കുറയ്ക്കാനും ഈ പദ്ധതി സഹായിക്കും” എന്ന് അഡ്‌ലെയ്ഡിൽ നടന്ന വാർത്താസമ്മേളനത്തിൽ പ്രധാനമന്ത്രി ആന്റണി ആൽബനീസീ വ്യക്തമാക്കി.

മലയാളി സമൂഹത്തിന് നൽകുന്ന നേട്ടവും മെഡിക്കൽ വിദ്യാർത്ഥികളുടെ പ്രതിഷേധവും

ഓസ്‌ട്രേലിയയിലെ മലയാളി കുടിയേറ്റ സമൂഹത്തിൽ നിന്നുള്ള ധാരാളം വിദ്യാർത്ഥികൾ ഫാർമസി, ഫിസിയോതെറാപ്പി, റേഡിയോഗ്രാഫി, പാരാമെഡിക് കോഴ്‌സുകളിൽ പഠിക്കുന്നുണ്ട്. പുതിയ പ്രഖ്യാപനം മലയാളി കുടുംബങ്ങൾക്കും അന്താരാഷ്ട്ര വിദ്യാർത്ഥികൾക്കും വലിയ സാമ്പത്തിക ആശ്വാസമായി മാറും.

എന്നാൽ, നിർബന്ധിത ക്ലിനിക്കൽ ട്രെയിനിങ് നടത്തുന്ന മെഡിക്കൽ വിദ്യാർത്ഥികളെ (Medical Students) ഈ പദ്ധതിയിൽ നിന്ന് ഒഴിവാക്കിയത് വലിയ വിമർശനത്തിന് വഴിവെച്ചിട്ടുണ്ട്.

മെഡിക്കൽ വിദ്യാർത്ഥികളെ ഒഴിവാക്കിയത് അനീതിയാണെന്ന് ഓസ്‌ട്രേലിയൻ മെഡിക്കൽ അസോസിയേഷൻ (AMA) ആരോപിച്ചെങ്കിലും, കടുത്ത ക്ഷാമം നേരിടുന്ന മേഖലകൾക്കാണ് നിലവിൽ മുൻഗണന നൽകുന്നതെന്ന് സർക്കാർ വ്യക്തമാക്കി.

NB :

ഇന്റർനാഷണൽ വിദ്യാർത്ഥികൾക്ക് ഈ സാമ്പത്തിക ആനുകൂല്യം ലഭിക്കില്ല. ഓസ്‌ട്രേലിയൻ സർക്കാരിന്റെ Commonwealth Prac Payment (CPP) പദ്ധതി പൂർണ്ണമായും ഡൊമസ്റ്റിക് വിദ്യാർത്ഥികൾക്ക് (Domestic Students) മാത്രമായി പരിമിതപ്പെടുത്തിയിട്ടുള്ളതാണ്.

പ്രധാന നിബന്ധനകൾ (Who is Eligible?):

ഡൊമസ്റ്റിക് വിദ്യാർത്ഥികൾ മാത്രം: ഓസ്‌ട്രേലിയൻ പൗരന്മാർ (Australian Citizens), പെർമനന്റ് റെസിഡന്റ്സ് (PR holders), ന്യൂസിലാൻഡ് പൗരന്മാർ, അല്ലെങ്കിൽ കോമൺവെൽത്ത് സപ്പോർട്ടഡ് പ്ലേസിൽ (CSP) അഡ്മിഷൻ ലഭിച്ച വിദ്യാർത്ഥികൾക്ക് മാത്രമേ ഈ പേയ്‌മെന്റിന് അർഹതയുള്ളൂ.

ഇന്റർനാഷണൽ വിദ്യാർത്ഥികൾ: സ്റ്റുഡന്റ് വിസയിൽ (Subclass 500) ഓസ്‌ട്രേലിയയിൽ പഠിക്കുന്ന അന്താരാഷ്ട്ര വിദ്യാർത്ഥികൾക്ക് (International Students) കേന്ദ്ര സർക്കാരിന്റെ ഈ ആനുകൂല്യത്തിന് അപേക്ഷിക്കാൻ സാധിക്കില്ല.

Sajin Thiruvallam
News Editor