ഓസ്‌ട്രേലിയയിൽ യുവാക്കൾ മദ്യപാനം കുറയ്ക്കുന്നു; മുതിർന്നവർക്കിടയിൽ ‘റിസ്കി ഡ്രിങ്കിംഗ്’ കൂടുന്നു
കാൻബറ: ഓസ്‌ട്രേലിയയിൽ യുവാക്കൾക്കിടയിൽ മദ്യപാന ശീലം കുറഞ്ഞുവരുമ്പോൾ, മുതിർന്ന പൗരന്മാർക്കിടയിൽ അമിത മദ്യപാനം വർദ്ധിക്കുന്നതായി റിപ്പോർട്ട്. ഓസ്‌ട്രേലിയൻ ഇൻസ്റ്റിറ്റ്യൂട്ട് ഓഫ് ഹെൽത്ത് ആൻഡ് വെൽഫെയർ (AIHW) പുറത്തുവിട്ട ഏറ്റവും പുതിയ കണക്കുകൾ പ്രകാരം 50-ഉം 60-ഉം വയസ്സിനിടയിലുള്ളവരാണ് ആരോഗ്യ നിർദ്ദേശങ്ങൾ ലംഘിച്ച് മദ്യപിക്കുന്നതിൽ മുൻപിൽ.
കൂടുതൽ മദ്യപിക്കുന്നത് ആര്?: 60 വയസ്സുള്ള പുരുഷന്മാരിൽ 44 ശതമാനവും, 50 വയസ്സുള്ള സ്ത്രീകളിൽ 28 ശതമാനവും ദേശീയ ആരോഗ്യ മാർഗ്ഗനിർദ്ദേശങ്ങൾക്കും മുകളിൽ മദ്യപിക്കുന്നവരാണ്.
യുവാക്കൾക്കിടയിലെ മാറ്റം: 2001-ൽ 14-17 വയസ്സിനിടയിലുള്ള 70% പേർ മദ്യപിച്ചിരുന്നെങ്കിൽ, ഇപ്പോഴത് 31% ആയി കുറഞ്ഞിട്ടുണ്ട്. പുതിയ തലമുറ മദ്യപാനത്തിൽ നിന്ന് അകലം പാലിക്കുന്നതായാണ് കണക്കുകൾ സൂചിപ്പിക്കുന്നത്.
ആരോഗ്യ നിർദ്ദേശം: ആഴ്ചയിൽ 10 ‘സ്റ്റാൻഡേർഡ് ഡ്രിങ്ക്സ്’ (Standard drinks), അല്ലെങ്കിൽ ഒരു ദിവസം 4 ഡ്രിങ്ക്സ് – ഇതിൽ കൂടുതൽ കഴിക്കുന്നത് അപകടകരമാണെന്നാണ് (Risky drinking) ഓസ്‌ട്രേലിയൻ ആരോഗ്യവിഭാഗം നൽകുന്ന മുന്നറിയിപ്പ്.
അമിത മദ്യപാനം ക്യാൻസർ ഉൾപ്പെടെയുള്ള ഗുരുതര രോഗങ്ങൾക്ക് കാരണമാകുമെന്നും, പ്രത്യേകിച്ചും പ്രായമായവരിൽ ഇത് വലിയ ആരോഗ്യപ്രശ്നങ്ങൾ സൃഷ്ടിക്കുമെന്നും വിദഗ്ധർ മുന്നറിയിപ്പ് നൽകുന്നു. ഓൺലൈൻ മദ്യവിൽപ്പനയും പരസ്യങ്ങളും നിയന്ത്രിക്കണമെന്ന് ആരോഗ്യ സംഘടനകൾ (FARE) ആവശ്യപ്പെടുന്നുണ്ട്.
