ഓൺലൈൻ ലൈംഗിക ഭീഷണികളിൽ നിന്നും കുട്ടികളെ രക്ഷിക്കാൻ ‘SmackTalk’
ഓസ്ട്രേലിയയിൽ കുട്ടികൾക്ക് നേരെയുള്ള ഓൺലൈൻ ലൈംഗിക ഭീഷണികൾ (Sextortion) വർദ്ധിച്ചുവരുന്ന സാഹചര്യത്തിൽ നിർണ്ണായക നീക്കവുമായി ആൽബനീസ് സർക്കാർ. കുട്ടികളെയും മാതാപിതാക്കളെയും ബോധവൽക്കരിക്കുന്നതിനായി രൂപീകരിച്ച SmackTalk sextortion prevention Australia പദ്ധതി വിപുലീകരിക്കാൻ $450,000 ഡോളറിൻ്റെ സാമ്പത്തിക സഹായം സർക്കാർ പ്രഖ്യാപിച്ചു. തിരഞ്ഞെടുപ്പ് വാഗ്ദാനത്തിൻ്റെ ഭാഗമായാണ് ഇന്ന് ഈ സുപ്രധാന പ്രഖ്യാപനം നടത്തിയിരിക്കുന്നത്.
സ്വന്തം മകൻ്റെ വിയോഗത്തിൽ നിന്നും പിറന്ന ‘SmackTalk’
ഓൺലൈൻ ലൈംഗിക ഭീഷണികൾക്ക് ഇരയായി ജീവനൊടുക്കേണ്ടി വന്ന തൻ്റെ 17 വയസ്സുകാരനായ മകൻ മാക്കിൻ്റെ (Mac) ഓർമ്മയ്ക്കായാണ് വെയ്ൻ ഹോൾഡ്സ്വർത്ത് (Wayne Holdsworth) 2024-ൽ സ്മാക്ക്ടോക്ക് (SmackTalk) എന്ന പ്രോഗ്രാം ആരംഭിച്ചത്. വ്യാജ അക്കൗണ്ടുകളിലൂടെ കുട്ടികളെ സമീപിച്ച് നഗ്നചിത്രങ്ങൾ കൈക്കലാക്കുകയും, പിന്നീട് അത് പുറത്തുവിടുമെന്ന് ഭീഷണിപ്പെടുത്തി പണം തട്ടിയെടുക്കുകയും ചെയ്യുന്ന രീതിയാണ് ഓൺലൈൻ ലൈംഗിക ഭീഷണി അഥവാ സെക്സ്റ്റോർഷൻ (Sextortion). ഇത്തരം ഭീഷണികളെ എങ്ങനെ നേരിടാം, കുട്ടികളിലെ മാനസിക മാറ്റങ്ങൾ എങ്ങനെ മനസ്സിലാക്കാം, അവരോട് എങ്ങനെ സംസാരിക്കണം തുടങ്ങിയ കാര്യങ്ങളിൽ മാതാപിതാക്കൾക്കും കുട്ടികൾക്കും ബോധവൽക്കരണം നൽകുകയാണ് സ്മാക്ക്ടോക്ക് ചെയ്യുന്നത്.
ഗ്രാമീണ മേഖലകളിലേക്കും സേവനം വിപുലീകരിക്കും
സർക്കാരിൽ നിന്നും ലഭിച്ച $450,000 ഫണ്ട് ഉപയോഗിച്ച് കൂടുതൽ പരിശീലകരെ കണ്ടെത്താനും, വിദ്യാഭ്യാസ സാമഗ്രികൾ സൗജന്യമായി വിതരണം ചെയ്യാനും സ്മാക്ക്ടോക്കിന് സാധിക്കും. ഇതിനുപുറമെ, ഓസ്ട്രേലിയയിലെ ഗ്രാമീണ മേഖലകളിലേക്കും ഈ ബോധവൽക്കരണ പരിപാടി വ്യാപിപ്പിക്കാൻ അവർ ലക്ഷ്യമിടുന്നു. കുട്ടികളുടെ സുരക്ഷ ഉറപ്പാക്കുന്നതിനായി സർക്കാർ കൊണ്ടുവന്ന സോഷ്യൽ മീഡിയ നിയന്ത്രണ നിയമങ്ങൾക്കൊപ്പമാണ് ഈ പദ്ധതിയും നടപ്പിലാക്കുന്നതെന്ന് ആശയവിനിമയ വകുപ്പ് മന്ത്രി അനിക വെൽസ് (Anika Wells) പറഞ്ഞു.
നടുക്കുന്ന കണക്കുകൾ
ഓസ്ട്രേലിയൻ ഇൻസ്റ്റിറ്റ്യൂട്ട് ഓഫ് ക്രിമിനോളജി (Australian Institute of Criminology) 2025 ഫെബ്രുവരിയിൽ പുറത്തുവിട്ട കണക്കുകൾ പ്രകാരം, രാജ്യത്ത് 10-ൽ ഒരാൾക്ക് വീതം (11.3%) ഓൺലൈൻ ലൈംഗിക ഭീഷണികൾ നേരിടേണ്ടി വന്നിട്ടുണ്ട്. ഇതിൽ ഭൂരിഭാഗം പേരും 16 വയസ്സിന് താഴെയുള്ളവരാണ്. ഡീപ്പ്ഫേക്ക് (Deepfake) സാങ്കേതികവിദ്യ ഉപയോഗിച്ച് നിർമ്മിച്ച ചിത്രങ്ങൾ വഴിയാണ് പലരും ഭീഷണിക്കിരയാകുന്നത്. അപ്രതീക്ഷിതമായി ഉണ്ടാകുന്ന ഈ ഭീഷണികളിൽ ഭയന്നാണ് പല കുട്ടികളും കടുംകൈ ചെയ്യുന്നത്.
ഈ പുതിയ സർക്കാർ സഹായം രാജ്യത്തെ നിരവധി കുട്ടികളുടെ ജീവൻ രക്ഷിക്കാൻ സഹായിക്കുമെന്ന് വെയ്ൻ ഹോൾഡ്സ്വർത്ത് പ്രതികരിച്ചു. സ്വന്തം ജീവിതത്തിലുണ്ടായ വലിയൊരു ദുരന്തത്തെ രാജ്യത്തെ മുഴുവൻ കുട്ടികൾക്കും വേണ്ടിയുള്ള സുരക്ഷാ കവചമാക്കി മാറ്റിയ വെയ്ൻ ഹോൾഡ്സ്വർത്തിൻ്റെ ധീരതയെ ഡങ്ക്ലി (Dunkley) എം.പി ജോഡി ബെലിയ (Jodie Belyea) പ്രശംസിച്ചു.
