മലയാളികൾ ഉൾപ്പെടെയുള്ള നഴ്‌സുമാർക്ക് ആശ്വാസം: NSW ആശുപത്രികളിൽ കടുത്ത സുരക്ഷാ നിയമങ്ങൾ!

ഓസ്ട്രേലിയയിലെ മലയാളി നഴ്‌സുമാർ ഉൾപ്പെടെയുള്ള പതിനായിരക്കണക്കിന് ആരോഗ്യപ്രവർത്തകരുടെ സുരക്ഷ ഉറപ്പാക്കുന്നതിനായി ന്യൂ സൗത്ത് വെയിൽസ് (NSW) സർക്കാർ കടുത്ത നടപടികളിലേക്ക് കടക്കുന്നു. ഏറ്റവും പുതിയ NSW Hospital Security Safety Taskforce Update വിവരങ്ങൾ പ്രകാരം, സംസ്ഥാനത്തെ ആശുപത്രികളിൽ വർദ്ധിച്ചുവരുന്ന കടുത്ത അക്രമ സംഭവങ്ങൾ തടയാൻ രൂപീകരിച്ച ഹൈ-ലെവൽ സുരക്ഷാ ടാസ്‌ക്‌ഫോഴ്‌സ് (Hospital Industry Action Group) വിപുലമായ സുരക്ഷാ പരിഷ്കരണങ്ങൾക്ക് അനുമതി നൽകി. ആശുപത്രി ജീവനക്കാർക്ക് നേരെയുള്ള അക്രമങ്ങളോട് സർക്കാർ ഇനി ‘സീറോ ടോളറൻസ്’ നയം മാത്രമായിരിക്കും സ്വീകരിക്കുകയെന്ന് ആരോഗ്യമന്ത്രി റയാൻ പാർക്ക് വ്യക്തമാക്കി.

ആശുപത്രികളിൽ ചോരപ്പുഴ ഒഴുക്കിയ സംഭവങ്ങൾ

ന്യൂ സൗത്ത് വെയിൽസിലെ ആശുപത്രികളിൽ സമീപകാലത്തുണ്ടായ ക്രൂരമായ അക്രമസംഭവങ്ങളാണ് സർക്കാരിനെ ഈ അടിയന്തിര നീക്കത്തിന് പ്രേരിപ്പിച്ചത്. റോയൽ പ്രിൻസ് ആൽഫ്രഡ് ഹോസ്പിറ്റലിൽ (RPA) ചികിത്സയിലായിരുന്ന 63 വയസുകാരനായ രോഗിയെ കിടക്കയിൽ കിടത്തി ചുറ്റിക ഉപയോഗിച്ച് തലയ്ക്ക് അടിച്ചുകൊല്ലാൻ ശ്രമിച്ച സംഭവം ഓസ്ട്രേലിയയെ ഒന്നടങ്കം നടുക്കിയിരുന്നു. തലയോട്ടിക്ക് ഗുരുതരമായി പരിക്കേറ്റ ഈ രോഗി ഇപ്പോഴും തീവ്രപരിചരണ വിഭാഗത്തിലാണ്. ഈ കേസിൽ 46 കാരിയായ വിക്കി ഗ്രഹാം എന്ന സ്ത്രീയെ പോലീസ് അറസ്റ്റ് ചെയ്ത് ജാമ്യമില്ലാ വകുപ്പുകൾ പ്രകാരം റിമാൻഡ് ചെയ്തിരിക്കുകയാണ്.

ഇതിനുപുറമെ ഓബൺ ഹോസ്പിറ്റലിൽ വെച്ച് ഡ്യൂട്ടിയിലുണ്ടായിരുന്ന NSW പോലീസ് ചീഫ് ഇൻസ്പെക്ടർക്ക് നേരെ ഉണ്ടായ മാരകമായ ആക്രമണവും വലിയ വിവാദങ്ങൾക്ക് വഴിവെച്ചിരുന്നു.

ജീവനക്കാർക്ക് നേരെയുള്ള തോക്ക് ഭീഷണി

NSW നഴ്‌സസ് ആൻഡ് മിഡ്‌വൈഫ്‌സ് അസോസിയേഷൻ (NSWNMA) പുറത്തുവിട്ട ഏറ്റവും പുതിയ ഒക്യുപേഷണൽ വയലൻസ് റിപ്പോർട്ടിലെ വിവരങ്ങൾ തികച്ചും ആശങ്കാജനകമാണ്. ഒരു റീജിയണൽ ആശുപത്രിയിൽ ഡിസ്ചാർജ് ചെയ്യുന്നതുമായി ബന്ധപ്പെട്ട തർക്കത്തെ തുടർന്ന്, ലൈസൻസില്ലാത്ത തോക്കുമായി വന്ന് ജീവനക്കാരെ ‘ഒന്നൊന്നായി വെടിവെച്ചു വീഴ്ത്തും’ എന്ന് രോഗി ഭീഷണിപ്പെടുത്തിയ സംഭവം വരെ ഇതിൽ ഉൾപ്പെടുന്നു. 2019-ൽ 80 ശതമാനമായിരുന്ന ആശുപത്രി അതിക്രമങ്ങളുടെ നിരക്ക് 2026-ൽ എത്തുമ്പോൾ 88 ശതമാനമായാണ് വർദ്ധിച്ചിരിക്കുന്നത്. പ്രത്യേകിച്ച് റീജിയണൽ മേഖലകളിലെയും ഏജ്ഡ് കെയർ (Aged Care) മേഖലകളിലെയും ജീവനക്കാരാണ് കൂടുതൽ ഭീഷണി നേരിടുന്നത്.

ഈ ഗുരുതര സാഹചര്യം നേരിടാനാണ് SafeWork NSW-ന്റെ നേതൃത്വത്തിൽ യൂണിയൻ പ്രതിനിധികളെയും ഹെൽത്ത് ഡിസ്ട്രിക്റ്റ് പ്രതിനിധികളെയും ഉൾപ്പെടുത്തി പ്രതിമാസം യോഗം ചേരുന്ന പ്രത്യേക സുരക്ഷാ സമിതിക്ക് രൂപം നൽകിയിരിക്കുന്നത്.

കൂടുതൽ സുരക്ഷാ സൈന്യവും വെസ്റ്റ്മീഡ് മോഡലും

ഹെൽത്ത് സർവീസസ് യൂണിയൻ (HSU) ഉന്നയിച്ച ആവശ്യങ്ങൾ പരിഗണിച്ച് കൂടുതൽ സെക്യൂരിറ്റി ഉദ്യോഗസ്ഥരെ ആശുപത്രികളിൽ വിന്യസിക്കാനും അവർക്ക് പ്രത്യേക കായിക പരിശീലനം നൽകാനും സർക്കാർ ഫണ്ട് അനുവദിച്ചിട്ടുണ്ട്. ഇതിന്റെ ഭാഗമായി വെസ്റ്റ്മീഡ് ഹോസ്പിറ്റലിൽ വിജയകരമായി നടപ്പിലാക്കിയ, മാനസികാരോഗ്യ പ്രശ്നമുള്ളവർക്കും മയക്കുമരുന്നിന് അടിമപ്പെട്ടവർക്കുമായുള്ള പ്രത്യേക സെക്യൂർ ബിഹേവിയറൽ യൂണിറ്റുകൾ (Secure Behavioral Units) സംസ്ഥാനത്തെ മറ്റ് പ്രധാന അടിയന്തിര വിഭാഗങ്ങളിലും (ED) സ്ഥാപിക്കും.

“ചികിത്സ തേടി വരുന്നവർക്ക് സുരക്ഷിതത്വം ഉറപ്പാക്കുന്നതിനൊപ്പം, ജീവൻ രക്ഷിക്കാൻ പോരാടുന്ന ആരോഗ്യപ്രവർത്തകരുടെ സുരക്ഷയും ഞങ്ങൾക്ക് പ്രധാനമാണ്,” എന്ന് മന്ത്രി റയാൻ പാർക്ക് വ്യക്തമാക്കി.

Sajin Thiruvallam
News Editor