വിക്ടോറിയയിൽ പുതിയ VET Educator Academy

Sajin Thiruvallam ജൂലൈ 7, 2026

വിക്ടോറിയയിലെ സാങ്കേതിക വിദ്യാഭ്യാസ മേഖലയിൽ വൻ മാറ്റങ്ങൾക്ക് തുടക്കം കുറിച്ച് പുതിയ VET Educator Academy Victoria പ്രഖ്യാപിച്ചു. ഫെഡറൽ സ്‌കിൽഡ് -പരിശീലന മന്ത്രി ആൻഡ്രൂ ഗൈൽസ് (Andrew Giles), വിക്ടോറിയൻ സ്‌കിൽഡ് -TAFE മന്ത്രി കോളിൻ ബ്രൂക്സ് (Colin Brooks) എന്നിവർ ചേർന്നാണ് ഇന്ന് ഈ പദ്ധതിക്ക് തുടക്കമിട്ടത്. TAFE മേഖലയിലെ അധ്യാപക ക്ഷാമം പരിഹരിക്കാനും പുതിയ തൊഴിലവസരങ്ങൾ സൃഷ്ടിക്കാനുമാണ് ഇതിലൂടെ സർക്കാർ ലക്ഷ്യമിടുന്നത്.

അധ്യാപകർക്കായി 10 മില്യൺ ഡോളർ പദ്ധതി

ആൽബനീസീ (Albanese), അലൻ (Allan) ലേബർ സർക്കാരുകൾ സംയുക്തമായി 10 മില്യൺ ഡോളറാണ് ഈ പുതിയ അക്കാദമിക്കായി ചിലവഴിക്കുന്നത്. ഫ്രാങ്ക്‌സ്റ്റണിലുള്ള ചിഷോം ഇൻസ്റ്റിറ്റ്യൂട്ടിന്റെ (Chisholm Institute) നേതൃത്വത്തിലായിരിക്കും ഇതിന്റെ പ്രവർത്തനം. നാലായിരത്തിലധികം വിക്ടോറിയൻ TAFE അധ്യാപകർക്കും, സ്കൂൾ അടിസ്ഥാനമാക്കിയുള്ള VET ട്രെയിനർമാർക്കും ഈ അക്കാദമിയിലൂടെ വലിയ പ്രയോജനം ലഭിക്കും. അധ്യാപകർക്ക് മികച്ച പരിശീലനം നൽകുന്നതിനൊപ്പം, പുതിയ ആളുകളെ ഈ മേഖലയിലേക്ക് ആകർഷിക്കാനും പദ്ധതി ലക്ഷ്യമിടുന്നു.

Free TAFE കൂടുതൽ പേരിലേക്ക്

രാജ്യത്തെ സമ്പദ്‌വ്യവസ്ഥയ്ക്ക് ആവശ്യമായ മികച്ച ട്രേഡികളെയും സാങ്കേതിക വിദഗ്ദ്ധരെയും വാർത്തെടുക്കുന്നത് TAFE അധ്യാപകരാണെന്നും, അവരെ പിന്തുണയ്ക്കുകയാണ് സർക്കാരിന്റെ ലക്ഷ്യമെന്നും മന്ത്രിമാർ വ്യക്തമാക്കി. വിക്ടോറിയയിൽ നിലവിൽ വരുന്ന ഈ അക്കാദമി അധ്യാപകർക്ക് മികച്ച കരിയർ വളർച്ചയ്ക്ക് വഴിയൊരുക്കും. സർട്ടിഫിക്കറ്റ് IV ഇൻ ട്രെയിനിങ് ആൻഡ് അസസ്മെന്റ് (Certificate IV in Training and Assessment) എന്ന കോഴ്സ് വിക്ടോറിയൻ സർക്കാർ നിലവിൽ Free TAFE പ്രോഗ്രാമിൽ ഉൾപ്പെടുത്തിയിട്ടുണ്ട്. 2019 മുതൽ 13,000-ത്തിലധികം ആളുകളാണ് ഈ കോഴ്സ് പഠിച്ചത്.

കഴിഞ്ഞ ഏഴ് വർഷത്തിനുള്ളിൽ വിക്ടോറിയയിലെ 2,45,400-ലധികം വിദ്യാർത്ഥികൾക്കാണ് Free TAFE പദ്ധതിയിലൂടെ ഗുണം ലഭിച്ചത്. വിദ്യാർത്ഥികൾക്ക് ശരാശരി $3,330 ഡോളർ വീതം ട്യൂഷൻ ഫീസിനത്തിൽ ലാഭിക്കാൻ ഇതിലൂടെ സാധിച്ചുവെന്നും, ആകെ $816 മില്യൺ ഡോളറിന്റെ ഇളവുകൾ നൽകിയെന്നും സർക്കാർ കണക്കുകൾ വ്യക്തമാക്കുന്നു.

News by