Western Sydney-യിൽ നിന്ന് സിംഗപ്പൂരിലേക്ക് ഇനി നേരിട്ട് പറക്കാം

ഓസ്‌ട്രേലിയയിലെ, പ്രത്യേകിച്ച് സിഡ്‌നിയിലും പ്രാന്തപ്രദേശങ്ങളിലുമുള്ള മലയാളികൾക്ക് ഏറെ ആശ്വാസവും സന്തോഷവും നൽകുന്ന ഒരു വാർത്തയാണ് ഇപ്പോൾ പുറത്തുവരുന്നത്. ഏറെ കാത്തിരുന്ന വെസ്റ്റേൺ സിഡ്‌നി ഇൻ്റർനാഷണൽ (നാൻസി-ബേർഡ് വാൾട്ടൺ) വിമാനത്താവളത്തിൽ നിന്നുള്ള ആദ്യ അന്താരാഷ്ട്ര വിമാന സർവീസുകളുടെ ടിക്കറ്റ് ബുക്കിംഗ് ഇന്ന് മുതൽ ആരംഭിച്ചു. സിഡ്‌നിയുടെ പുതിയ 24 മണിക്കൂർ ആഗോള ഗേറ്റ്‌വേയിൽ നിന്നും സിംഗപ്പൂർ എയർലൈൻസാണ് തങ്ങളുടെ സേവനം പ്രഖ്യാപിച്ചിരിക്കുന്നത്. 2026 നവംബർ 23 മുതലാണ് വെസ്റ്റേൺ സിഡ്‌നിയിൽ നിന്നും സിംഗപ്പൂരിലേക്കും തിരിച്ചും പ്രതിദിന സർവീസുകൾ ആരംഭിക്കുന്നത്.

നാട്ടിലേക്കുള്ള യാത്രയിൽ സിംഗപ്പൂർ വഴി കൊച്ചിയിലേക്കും തിരുവനന്തപുരത്തേക്കും മറ്റും കണക്ഷൻ ഫ്ലൈറ്റുകളെ ആശ്രയിക്കുന്ന സിഡ്‌നിയിലെ മലയാളികൾക്ക് ഈ പുതിയ സർവീസ് വലിയൊരു അനുഗ്രഹമാകും.

വിമാന സർവീസ് സമയക്രമവും വിവരങ്ങളും

വിമാനം: 303 യാത്രക്കാർക്ക് സുഖകരമായി സഞ്ചരിക്കാവുന്ന അത്യാധുനിക എയർബസ് A350-900 വിമാനങ്ങളാണ് സിംഗപ്പൂർ എയർലൈൻസ് ഈ റൂട്ടിൽ ഉപയോഗിക്കുന്നത്. ബിസിനസ്സ്, എക്കോണമി ക്ലാസുകൾ ഇതിൽ ലഭ്യമാണ്.

സിഡ്നിയിൽ നിന്നുള്ള യാത്ര: വെസ്റ്റേൺ സിഡ്‌നിയിൽ നിന്നും അർദ്ധരാത്രിക്ക് തൊട്ടുമുമ്പായി പുറപ്പെടുന്ന വിമാനം, പുലർച്ചെ 5 മണിയോടെ ഏഷ്യയിലെ ഏറ്റവും വലിയ ട്രാൻസിറ്റ് ഹബ്ബുകളിലൊന്നായ സിംഗപ്പൂർ ചാങ്ങി എയർപോർട്ടിൽ എത്തിച്ചേരും. കേരളത്തിലേക്കും ഇന്ത്യയിലെ മറ്റു നഗരങ്ങളിലേക്കുമുള്ള കണക്ഷൻ വിമാനങ്ങൾ പിടിക്കാൻ ഈ സമയം വളരെ അനുയോജ്യമാണ്.

സിംഗപ്പൂരിൽ നിന്നുള്ള മടക്കയാത്ര: സിംഗപ്പൂരിൽ നിന്ന് പ്രാദേശിക സമയം രാവിലെ 11:30-ന് പുറപ്പെടുന്ന വിമാനം രാത്രി 10:20-ന് വെസ്റ്റേൺ സിഡ്‌നിയിൽ തിരിച്ചെത്തും.

വിമാനത്താവളത്തിന്റെ പൂർണ്ണ സജ്ജീകരണം

2026 ജൂലൈ മാസത്തോടെ കാർഗോ സർവീസുകൾക്കും, ഒക്ടോബറോടെ യാത്രാ വിമാനങ്ങൾക്കുമായി വെസ്റ്റേൺ സിഡ്‌നി വിമാനത്താവളം പൂർണ്ണ സജ്ജമാകും. പുതിയ വിമാനത്താവളത്തിൽ സർവീസ് നടത്താൻ 2024 ഓഗസ്റ്റിൽ തന്നെ സിംഗപ്പൂർ എയർലൈൻസ് ഫെഡറൽ സർക്കാരുമായി കരാറിലെത്തിയിരുന്നു. ഈ പുതിയ വിമാനത്താവളത്തിൽ ഇറങ്ങുന്ന ആദ്യത്തെ അന്താരാഷ്ട്ര വിമാനക്കമ്പനികളിലൊന്നാണ് സിംഗപ്പൂർ എയർലൈൻസ്.

പടിഞ്ഞാറൻ സിഡ്‌നിയുടെ മുഖച്ഛായ മാറ്റുന്ന വികസനം

അൽബനീസീ സർക്കാർ വെസ്റ്റേൺ സിഡ്നിയുടെ അടിസ്ഥാന സൗകര്യ വികസനത്തിനായി പ്രഖ്യാപിച്ച 18 ബില്യൺ ഡോളർ നിക്ഷേപത്തിന്റെ മുഖ്യ ആകർഷണമാണ് ഈ പുതിയ എയർപോർട്ട്. ഇതിനൊപ്പം പുതിയ M12 മോട്ടോർവേ, സിഡ്‌നി മെട്രോ എയർപോർട്ട് കണക്ഷൻ, കൂടാതെ എലിസബത്ത് ഡ്രൈവ്, ഫിഫ്റ്റീൻത് അവന്യൂ, മാമ്രെ റോഡ് (Mamre Road) തുടങ്ങിയ റോഡുകളുടെ നവീകരണവും അതിവേഗം പുരോഗമിക്കുകയാണ്.

മന്ത്രിയുടെ വാക്കുകൾ:

സിംഗപ്പൂർ എയർലൈൻസിനെ വെസ്റ്റേൺ സിഡ്‌നി ഇൻ്റർനാഷണൽ എയർപോർട്ടിലേക്ക് ഹാർദ്ദവമായി സ്വാഗതം ചെയ്യുന്നതായി ഫെഡറൽ ഇൻഫ്രാസ്ട്രക്ചർ, ട്രാൻസ്‌പോർട്ട് മന്ത്രി കാതറിൻ കിംഗ് പറഞ്ഞു. “ഈ പ്രതിദിന വിമാന സർവീസുകൾ വെസ്റ്റേൺ സിഡ്നിയെ ചാങ്ങി എയർപോർട്ട് വഴി ലോകത്തിന്റെ നാനാഭാഗങ്ങളുമായി ബന്ധിപ്പിക്കും. പുതിയ വിമാനത്താവളത്തിൽ നിന്ന് സർവീസ് നടത്താൻ ആദ്യം മുന്നോട്ടുവന്നത് സിംഗപ്പൂർ എയർലൈൻസാണ്. ടിക്കറ്റ് വില്പന ആരംഭിച്ചതിനാൽ യാത്രക്കാർക്ക് അവരുടെ വരാനിരിക്കുന്ന യാത്രകൾ ഇപ്പോൾ തന്നെ പ്ലാൻ ചെയ്യാൻ സാധിക്കുമെന്നത് വളരെ സന്തോഷം നൽകുന്ന കാര്യമാണ്,” മന്ത്രി കൂട്ടിച്ചേർത്തു.