വൈറൽ ഹെപ്പറ്റൈറ്റിസ് : പുതിയ ദേശീയ പദ്ധതികൾ പ്രഖ്യാപിച്ചു

ഓസ്‌ട്രേലിയൻ പൊതുജനാരോഗ്യ രംഗത്ത് നിർണ്ണായകമായ ഒരു ചുവടുവെപ്പുമായി സർക്കാർ. 2030-ഓടെ രാജ്യത്ത് നിന്ന് ഹെപ്പറ്റൈറ്റിസ് ബി (Hepatitis B), ഹെപ്പറ്റൈറ്റിസ് സി (Hepatitis C) എന്നീ വൈറൽ രോഗങ്ങളെ പൂർണ്ണമായും ഇല്ലാതാക്കുക എന്ന ലക്ഷ്യത്തോടെ രണ്ട് പുതിയ ദേശീയ തന്ത്രങ്ങൾ (National Strategies) സർക്കാർ ഇന്ന് പ്രഖ്യാപിച്ചു. 2026 മുതൽ 2030 വരെയുള്ള കാലയളവിലേക്കായി തയ്യാറാക്കിയിട്ടുള്ള ഈ പദ്ധതികൾ, രോഗപ്രതിരോധം, നേരത്തെയുള്ള രോഗനിർണയം, മികച്ച ചികിത്സ എന്നിവയ്ക്ക് ഊന്നൽ നൽകുന്നു.

പദ്ധതിയുടെ പ്രധാന ലക്ഷ്യങ്ങൾ

മുൻകാലങ്ങളിലെ വിജയങ്ങളെ അടിസ്ഥാനമാക്കി വിപുലമായ കൂടിയാലോചനകൾക്ക് ശേഷമാണ് ഈ പുതിയ തന്ത്രങ്ങൾ രൂപീകരിച്ചിരിക്കുന്നത്. 

രോഗനിർണയം വിപുലമാക്കുക: കൂടുതൽ ആളുകളിൽ പരിശോധനകൾ എത്തിക്കുകയും രോഗം നേരത്തെ കണ്ടെത്തുകയും ചെയ്യുക.

ചികിത്സയും പരിചരണവും: കമ്മ്യൂണിറ്റി അടിസ്ഥാനമാക്കിയുള്ള പരിചരണം ഉറപ്പാക്കുകയും, തടസ്സങ്ങളില്ലാതെ എല്ലാവർക്കും ചികിത്സ ലഭ്യമാക്കുകയും ചെയ്യുക.

സാമൂഹിക അവഹേളനം (Stigma) ഇല്ലാതാക്കുക: രോഗികളോടുള്ള വിവേചനം കുറയ്ക്കുന്നതിനുള്ള ബോധവൽക്കരണവും പിന്തുണയും നൽകുക.

ഈ ലക്ഷ്യങ്ങൾ പ്രാവർത്തികമാക്കുന്നതിനായി, ആൽബനീസീ  (Albanese) സർക്കാർ ‘ഹെപ്പറ്റൈറ്റിസ് ഓസ്‌ട്രേലിയ’യുമായും (Hepatitis Australia) ‘ഓസ്‌ട്രേലിയൻ സെന്റർ ഫോർ ഡിസീസ് കൺട്രോളു’മായും (Australian Centre for Disease Control) ചേർന്ന് പ്രവർത്തിക്കും.

സർക്കാരിന്റെ സാമ്പത്തിക നിക്ഷേപങ്ങൾ

ഓസ്‌ട്രേലിയക്കാരെ ഹെപ്പറ്റൈറ്റിസ് ബി, സി എന്നിവയുടെ പ്രത്യാഘാതങ്ങളിൽ നിന്ന് മുക്തരാക്കുന്നതിനായി നിലവിലുള്ള പദ്ധതികൾക്ക് പുറമെ വലിയ സാമ്പത്തിക സഹായവും സർക്കാർ പ്രഖ്യാപിച്ചിട്ടുണ്ട്:

$23.7 ദശലക്ഷം: അടിസ്ഥാന തലത്തിലുള്ള ഹെപ്പറ്റൈറ്റിസ് ബി, സി പ്രവർത്തനങ്ങൾക്കായി വകയിരുത്തി. പോയിന്റ്-ഓഫ്-കെയർ ടെസ്റ്റിംഗ്, ചികിത്സ, പ്രത്യേക പൈലറ്റ് പ്രോഗ്രാമുകൾ എന്നിവ ഇതിൽ ഉൾപ്പെടുന്നു.

$51.7 ദശലക്ഷം: ദേശീയ വൈറൽ ഹെപ്പറ്റൈറ്റിസ് എലിമിനേഷൻ പ്രോഗ്രാം തടസ്സമില്ലാതെ മുന്നോട്ട് കൊണ്ടുപോകുന്നതിനായി അടുത്ത 3 വർഷത്തേക്ക് നൽകും.

സഹായ വിവരങ്ങൾ:

വൈറൽ ഹെപ്പറ്റൈറ്റിസുമായി ബന്ധപ്പെട്ട കൂടുതൽ വിവരങ്ങൾക്കോ പിന്തുണയ്‌ക്കോ ആയി www.heplink.au എന്ന വെബ്‌സൈറ്റ് സന്ദർശിക്കുകയോ, 1800 437 222 എന്ന ടോൾ ഫ്രീ നമ്പറിൽ ബന്ധപ്പെടുകയോ ചെയ്യാവുന്നതാണ്.