Australian Tax Reforms: ഓസ്‌ട്രേലിയൻ പാർലമെന്റിൽ പുതിയ ബിൽ പാസായി

ഓസ്ട്രേലിയൻ ഫെഡറൽ പാർലമെന്റിൽ മാസങ്ങൾ നീണ്ട ചൂടേറിയ ചർച്ചകൾക്ക് ഒടുവിൽ Australian Tax Reforms (നികുതി പരിഷ്‌കാരങ്ങൾ) ഔദ്യോഗികമായി പാസായി. ഒരു തലമുറയിലെ തന്നെ ഏറ്റവും വലിയ നികുതി മാറ്റങ്ങളായാണ് ആൽബനീസീ സർക്കാരിന്റെ ഈ നീക്കം വിലയിരുത്തപ്പെടുന്നത്. പുതിയ നിയമം വഴി വീട് വാങ്ങാൻ ആഗ്രഹിക്കുന്നവർക്കും, ചെറുകിട ബിസിനസുകാർക്കും വലിയ ആനുകൂല്യങ്ങൾ ലഭിക്കുമെന്ന് സർക്കാർ അവകാശപ്പെടുമ്പോൾ, ഇതൊരു ‘പകൽകൊള്ള’ ആണെന്നാണ് പ്രതിപക്ഷത്തിന്റെ ആരോപണം. യഥാർത്ഥത്തിൽ പുതിയ മാറ്റങ്ങൾ എങ്ങനെയാണ് നിങ്ങളെ ബാധിക്കുക?

ശമ്പളക്കാർക്കും ബിസിനസുകാർക്കും കൂടുതൽ ആനുകൂല്യങ്ങൾ

പുതിയ നികുതി പരിഷ്‌കാരങ്ങൾ ഓസ്‌ട്രേലിയൻ തൊഴിലാളികൾക്കും വീട് വാങ്ങാൻ ആഗ്രഹിക്കുന്ന ചെറുപ്പക്കാർക്കും വലിയൊരു ആശ്വാസമാണെന്ന് ആരോഗ്യ മന്ത്രി മാർക്ക് ബട്ട്‌ലർ (Mark Butler) വ്യക്തമാക്കി.

ഈ മാറ്റങ്ങൾ വഴി ഓസ്‌ട്രേലിയൻ തൊഴിലാളികൾക്ക് പ്രതിവർഷം 3,000 ഡോളർ വരെയുള്ള നികുതി ഇളവുകൾ ലഭ്യമാകും.

സ്വന്തമായി ഒരു വീട് എന്ന യുവജനങ്ങളുടെ സ്വപ്നം യാഥാർത്ഥ്യമാക്കുന്നതിനായി നിരവധി സഹായങ്ങൾ പുതിയ ബില്ലിൽ ഉൾപ്പെടുത്തിയിട്ടുണ്ട്.

ചെറുകിട ബിസിനസ്സ് മേഖലയ്ക്കായി ഏകദേശം 4 ബില്യൺ ഡോളറിന്റെ നികുതി ഇളവുകളാണ് പ്രഖ്യാപിച്ചിരിക്കുന്നത്. ഇതിനുപുറമെ, സജീവമായ ചെറുകിട ബിസിനസുകൾക്കുള്ള 50 ശതമാനം മൂലധന നേട്ട കിഴിവ് (Capital gains discount) സർക്കാർ നിലനിർത്തിയിട്ടുമുണ്ട്.

ശമ്പള വരുമാനക്കാർക്കും മറ്റ് നിക്ഷേപങ്ങളിലൂടെ വരുമാനം ഉണ്ടാക്കുന്നവർക്കും തുല്യമായ നികുതി വ്യവസ്ഥ കൊണ്ടുവരിക എന്നതാണ് സർക്കാർ ഇതിലൂടെ ലക്ഷ്യമിടുന്നത്.

വിവാദമായി ‘വിധവാ നികുതി’ (Widow’s Tax)

ബിൽ പാസായെങ്കിലും ചില നിബന്ധനകൾ വലിയ വിമർശനങ്ങൾക്ക് വഴിവെച്ചിട്ടുണ്ട്. പ്രത്യേകിച്ചും ‘വിധവാ നികുതി’ എന്നറിയപ്പെടുന്ന വ്യവസ്ഥ. പഴയ നിയമപ്രകാരം പരിരക്ഷ (Grandfathered) ലഭിച്ചിരുന്ന ഒരു ഇൻവെസ്റ്റ്മെൻ്റ് പ്രോപ്പർട്ടിയുടെ ഉടമസ്ഥരിൽ ഒരാൾ മരിക്കുകയോ വിവാഹമോചനം നേടുകയോ ചെയ്താൽ, വസ്തുവിന്റെ ഉടമസ്ഥാവകാശം ഒരാളിലേക്ക് മാറുമ്പോൾ വലിയൊരു തുക നികുതിയായി നൽകേണ്ടി വരും.

സ്വതന്ത്ര സെനറ്ററായ ഡേവിഡ് പോക്കോക്ക് (David Pocock) ആണ് ഈ വിഷയം പ്രധാനമായും ഉന്നയിച്ചത്. എന്നാൽ വരുന്ന മാസങ്ങളിൽ പുതിയ നിയമനിർമ്മാണങ്ങളിലൂടെ ഈ പ്രശ്നം പരിഹരിക്കുമെന്നും ഉടമസ്ഥാവകാശം മാറുമ്പോഴും പഴയ പരിരക്ഷ നിലനിർത്തുമെന്നും മന്ത്രി മാർക്ക് ബട്ട്‌ലർ ഉറപ്പുനൽകി.

എതിർപ്പുമായി പ്രതിപക്ഷം

സർക്കാരിന്റെ പുതിയ നീക്കം തികഞ്ഞ പരാജയമാണെന്ന് ലിബറൽസ് ഡെപ്യൂട്ടി ലീഡർ ജെയ്ൻ ഹ്യൂം (Jane Hume) കുറ്റപ്പെടുത്തി. നെഗറ്റീവ് ഗിയറിംഗിലും മൂലധന നേട്ട നികുതിയിലും (Capital gains tax) മാറ്റങ്ങൾ വരുത്തില്ലെന്ന തെരഞ്ഞെടുപ്പ് വാഗ്ദാനമാണ് ആന്റണി ആൽബനീസീ  ലംഘിച്ചിരിക്കുന്നതെന്ന് അവർ പറഞ്ഞു. ഇത് യഥാർത്ഥത്തിൽ ബിസിനസുകാർക്കും സമ്പാദ്യശീലമുള്ളവർക്കുമെതിരെയുള്ള സർക്കാരിന്റെ പുതിയ നികുതിയാണെന്നും, ഭാവിയിൽ അധികാരത്തിൽ വന്നാൽ ഈ നിയമം റദ്ദാക്കുമെന്നും പ്രതിപക്ഷം വ്യക്തമാക്കി.

Sajin Thiruvallam
News Editor