ഓസ്‌ട്രേലിയൻ സമുദ്രാതിർത്തിയിൽ അഞ്ച് വിദേശ ബോട്ടുകൾ തകർത്തു

ഓസ്‌ട്രേലിയൻ സമുദ്രാതിർത്തി കടന്ന് അനധികൃതമായി മത്സ്യബന്ധനം നടത്തുന്ന വിദേശ യാനങ്ങൾക്കെതിരെ ശക്തമായ നടപടികളുമായി ഓസ്‌ട്രേലിയൻ ബോർഡർ ഫോഴ്‌സ് (ABF). വടക്കൻ സമുദ്രാതിർത്തികളിലെ കടന്നുകയറ്റം തടയാനായി ആരംഭിച്ച ‘ഓപ്പറേഷൻ ബ്രോഡ്‌സ്റ്റാഫ്’ (Operation BROADSTAFF) എന്ന ദൗത്യത്തിന്റെ ഭാഗമായി അടുത്തിടെ പിടിച്ചെടുത്ത അഞ്ച് വിദേശ മത്സ്യബന്ധന ബോട്ടുകൾ അധികൃതർ കടലിൽ വെച്ച് തന്നെ സുരക്ഷിതമായി നശിപ്പിച്ചു. അനധികൃതമായി ഓസ്ട്രേലിയൻ അതിർത്തിയിൽ പ്രവേശിക്കുന്നവർക്കുള്ള ശക്തമായ മുന്നറിയിപ്പാണ് ഈ നടപടിയെന്ന് ബോർഡർ ഫോഴ്സ് വ്യക്തമാക്കി.

പിടികൂടിയ ബോട്ടുകളുടെ വിവരങ്ങൾ:

വടക്കൻ സമുദ്രാതിർത്തികളിൽ നടത്തിയ പരിശോധനകളിലാണ് ഈ അഞ്ച് യാനങ്ങളും പിടിയിലായത്:

ഫെബ്രുവരി 20, 2026: ആൽബാനി ദ്വീപിന് (Albany Island) സമീപം അനധികൃതമായി മത്സ്യബന്ധനം നടത്തുകയായിരുന്ന രണ്ട് വിദേശ ബോട്ടുകൾ പിടികൂടി.

മാർച്ച് 3, 2026: കേപ്പ് യോർക്ക് പെനിൻസുലയിലെ എസ്കേപ്പ് നദിയിൽ (Escape River) ഒളിപ്പിച്ച നിലയിൽ ഒരു ബോട്ട് കണ്ടെത്തി. (ഈ സംഭവത്തിൽ പിടിയിലായ ഏഴ് ഇന്തോനേഷ്യൻ പൗരന്മാർക്ക് മാർച്ച് മൂന്നാം വാരത്തിൽ ഡാർവിൻ കോടതി തടവും പിഴയും ശിക്ഷയായി വിധിച്ചിരുന്നു. ഇവരിൽ നിന്ന് 1,950 കിലോയോളം കടൽ വെള്ളരിയും (Sea cucumber) പിടിച്ചെടുത്തിരുന്നു).

മാർച്ച് 7, 2026: ട്രോക്കസ് ദ്വീപിന് (Trochus Island) സമീപത്ത് നിന്ന് രണ്ട് ബോട്ടുകൾ കൂടി അധികൃതർ കസ്റ്റഡിയിലെടുത്തു.

ഇതുവരെയുള്ള കണക്കുകൾ

2026 ജനുവരി 1 മുതൽ നോർത്തേൺ ക്വീൻസ്‌ലാൻഡിലും ടോറസ് കടലിടുക്കിലുമായി (Torres Strait) 19 വിദേശ മത്സ്യബന്ധന യാനങ്ങളാണ് എ.ബി.എഫ് ഇതുവരെ പിടികൂടിയത്. ഇതിൽ 9 എണ്ണം ഇതിനകം നശിപ്പിച്ചു കഴിഞ്ഞു. വിദേശ ബോട്ടുകൾ പിടിച്ചെടുക്കുകയും അത് നശിപ്പിക്കുകയും ചെയ്യുക എന്നത് ബോർഡർ ഫോഴ്സിന്റെ എൻഫോഴ്‌സ്‌മെന്റ് തന്ത്രങ്ങളിലെ പ്രധാനപ്പെട്ട ഒരു ഘടകമാണ്.

കർശന മുന്നറിയിപ്പുമായി അധികൃതർ

ഓപ്പറേഷൻ ബ്രോഡ്‌സ്റ്റാഫ് വലിയ വിജയമാണെന്നും, വിദേശ ബോട്ടുകൾ അതിർത്തി കടന്നാലുടൻ തന്നെ കണ്ടെത്താനും അവരെ തടയാനും സേനയ്ക്ക് കഴിയുന്നുണ്ടെന്നും മാരിടൈം ബോർഡർ കമാൻഡ് (MBC) ആക്ടിംഗ് ഡെപ്യൂട്ടി കമാൻഡർ ബ്രൂക്ക് ഡ്യൂവാർ വ്യക്തമാക്കി.

“നിയമവിരുദ്ധമായി ഓസ്‌ട്രേലിയൻ സമുദ്രാതിർത്തിയിൽ പ്രവേശിച്ചാൽ നിങ്ങളെ ഞങ്ങൾ പിടികൂടും. അതിനുള്ള പ്രത്യാഘാതം വലുതായിരിക്കും. നിങ്ങളുടെ ബോട്ടുകൾ പിടിച്ചെടുക്കാനും ഓസ്‌ട്രേലിയൻ നിയമപ്രകാരം അവ നശിപ്പിക്കാനുമുള്ള അധികാരവും സേനയ്ക്കുണ്ട്. വടക്കൻ മേഖലയിലെ സമുദ്രസമ്പത്തും തീരദേശ സമൂഹങ്ങളെയും സംരക്ഷിക്കാൻ ഞങ്ങളുടെ ഉദ്യോഗസ്ഥർ രാവും പകലും സജ്ജരാണ്,” അദ്ദേഹം കൂട്ടിച്ചേർത്തു.

നിരീക്ഷണം ശക്തം

മറ്റ് ഏജൻസികളുമായി സഹകരിച്ച് ശക്തമായ നിരീക്ഷണമാണ് എ.ബി.എഫ് ഇപ്പോൾ നടത്തുന്നത്. കൃത്യമായ ഇന്റലിജൻസ് റിപ്പോർട്ടുകൾ, വിമാനങ്ങൾ ഉപയോഗിച്ചുള്ള വ്യോമ നിരീക്ഷണം, നാവികസേനയുടെ പട്രോളിംഗ്, കൂടാതെ പ്രാദേശിക സമൂഹത്തിന്റെ പങ്കാളിത്തം എന്നിവ ഉൾപ്പെടുത്തിയുള്ള ബഹുതല സുരക്ഷാ സംവിധാനമാണ് (Multi-layered enforcement) അതിർത്തിയിൽ ഒരുക്കിയിട്ടുള്ളത്.

ബോട്ടുകൾ നശിപ്പിക്കുന്നതിന് പുറമെ, മത്സ്യബന്ധന ഉപകരണങ്ങൾ പിടിച്ചെടുക്കുന്നതും, നിയമവിരുദ്ധമായി പ്രവേശിച്ചവരെ ഓസ്‌ട്രേലിയൻ സമുദ്രാതിർത്തിക്ക് പുറത്തേക്ക് കൊണ്ടുവിടുന്നതുമൊക്കെ ഈ ഓപ്പറേഷന്റെ ഭാഗമാണ്. സമുദ്രാതിർത്തിയിൽ സംശയാസ്പദമായി എന്തെങ്കിലും ശ്രദ്ധയിൽപ്പെട്ടാൽ ‘ബോർഡർ വാച്ച്’ (Border Watch) വഴി ഓൺലൈനായി റിപ്പോർട്ട് ചെയ്യണമെന്ന് അധികൃതർ പൊതുജനങ്ങളോട് അഭ്യർത്ഥിച്ചിട്ടുണ്ട്. ആവശ്യമായ കാലത്തോളം ടോറസ് കടലിടുക്കിൽ കർശന പരിശോധന തുടരുമെന്നും എ.ബി.എഫ് വ്യക്തമാക്കി.