ഓസ്ട്രേലിയയിൽ ഇന്ധന പ്രതിസന്ധിക്ക് പരിഹാരം കാണാൻ അടിയന്തര നടപടികളുമായി ഫെഡറൽ സർക്കാർ
പശ്ചിമേഷ്യയിൽ (Middle East) തുടരുന്ന യുദ്ധത്തിന്റെ പശ്ചാത്തലത്തിൽ, ഓസ്ട്രേലിയയിലെ വിതരണ ശൃംഖലയിലുണ്ടായ തടസ്സങ്ങളും പ്രാദേശിക മേഖലകളിൽ അനുഭവപ്പെടുന്ന ഇന്ധനക്ഷാമവും പരിഹരിക്കാൻ ഫെഡറൽ സർക്കാർ നിർണായക തീരുമാനങ്ങൾ പ്രഖ്യാപിച്ചു. ഇന്ധന വില നിയന്ത്രിക്കാനും കർഷകർ ഉൾപ്പെടെയുള്ളവർക്ക് തടസ്സമില്ലാതെ ഇന്ധനം ലഭ്യമാക്കാനുമാണ് സർക്കാർ ഈ അടിയന്തര നടപടികൾ സ്വീകരിച്ചിരിക്കുന്നത്.
കാലാവസ്ഥാ-ഊർജ്ജ മന്ത്രി ക്രിസ് ബോവൻ പുറത്തുവിട്ട ഏറ്റവും പുതിയ വിവരങ്ങൾ പ്രകാരം പ്രധാന പ്രഖ്യാപനങ്ങൾ ഇവയാണ് :
ഇന്ധന നിലവാരത്തിൽ താൽക്കാലിക ഇളവ്: വിപണിയിൽ കൂടുതൽ ഇന്ധനം ലഭ്യമാക്കുന്നതിനായി, അടുത്ത 60 ദിവസത്തേക്ക് പെട്രോളിലെ സൾഫറിന്റെ (Sulfur) അളവ് വർദ്ധിപ്പിക്കാൻ അനുവദിച്ചുകൊണ്ട് സർക്കാർ ഇന്ധന ഗുണനിലവാര മാനദണ്ഡങ്ങളിൽ മാറ്റം വരുത്തി. കയറ്റുമതി ചെയ്യാനിരുന്ന ഈ ഇന്ധനം ആഭ്യന്തര വിപണിയിൽ ഉപയോഗിക്കാൻ അനുവദിക്കുന്നതിലൂടെ പ്രതിമാസം 100 ദശലക്ഷം ലിറ്റർ അധിക പെട്രോൾ ഓസ്ട്രേലിയയിൽ ലഭ്യമാകും.
കരുതൽ ശേഖരത്തിൽ നിന്ന് ഇന്ധനം വിപണിയിലേക്ക് : വിതരണ പ്രതിസന്ധി മറികടക്കാൻ പെട്രോളിന്റെയും ഡീസലിന്റെയും മിനിമം സ്റ്റോക്ക്ഹോൾഡിംഗ് ഒബ്ലിഗേഷനിൽ (MSO) സർക്കാർ ഇളവ് വരുത്തിയിട്ടുണ്ട്. ഇതിലൂടെ ഓസ്ട്രേലിയയുടെ കരുതൽ ശേഖരത്തിൽ നിന്ന് 762 ദശലക്ഷം ലിറ്റർ ഇന്ധനം കൂടി അടിയന്തരമായി വിപണിയിൽ എത്തിക്കും.
പ്രാദേശിക മേഖലകൾക്ക് മുൻഗണന: പുതിയതായി ലഭ്യമാകുന്ന ഈ ഇന്ധനം ഏറ്റവും ആവശ്യമുള്ളവരിലേക്ക് എത്തുന്നുണ്ടെന്ന് സർക്കാർ ഉറപ്പുവരുത്തും. ആംപോൾ ഓസ്ട്രേലിയയുമായി (Ampol Australia) സഹകരിച്ച് കർഷകർ, മത്സ്യത്തൊഴിലാളികൾ, സ്വതന്ത്ര വിതരണക്കാർ എന്നിവർക്കും ഇന്ധനക്ഷാമം നേരിടുന്ന പ്രാദേശിക മേഖലകൾക്കും വിതരണത്തിൽ മുൻഗണന നൽകും.
അന്യായമായ വിലക്കയറ്റത്തിന് വൻ പിഴ: യുദ്ധത്തിന്റെ മറവിൽ ഇന്ധനവില അന്യായമായി വർദ്ധിപ്പിച്ച് ലാഭമുണ്ടാക്കാൻ ശ്രമിക്കുന്ന ഇന്ധന കമ്പനികൾക്കും വിതരണക്കാർക്കും 100 ദശലക്ഷം ഡോളർ വരെ പിഴ ഈടാക്കുമെന്ന് ട്രഷറർ ജിം ചാമർസും ഊർജ്ജ മന്ത്രി ക്രിസ് ബോവനും കർശന മുന്നറിയിപ്പ് നൽകിയിട്ടുണ്ട്.
നാഷണൽ കോർഡിനേഷൻ മെക്കാനിസം: ഇന്ധന വിതരണ ശൃംഖലയിലെ തടസ്സങ്ങൾ പരിഹരിക്കുന്നതിനായി എല്ലാ തലങ്ങളിലുമുള്ള സർക്കാരുകളെ ഏകോപിപ്പിച്ച് നാഷണൽ കോർഡിനേഷൻ മെക്കാനിസം സജീവമായി പ്രവർത്തിക്കും.
ആഗോള പശ്ചാത്തലവും ഇന്റർനാഷണൽ എനർജി ഏജൻസിയുടെ (IEA) ഇടപെടലും:
പശ്ചിമേഷ്യയിലെ യുദ്ധം ആഗോള എണ്ണ വിപണിയെ സാരമായി ബാധിച്ച സാഹചര്യത്തിൽ, ഇന്റർനാഷണൽ എനർജി ഏജൻസി (IEA) അംഗരാജ്യങ്ങളോട് അവരുടെ കരുതൽ ശേഖരത്തിൽ നിന്ന് ഇന്ധനം വിപണിയിൽ ഇറക്കാൻ ആവശ്യപ്പെട്ടിരുന്നു. 1979 മുതൽ IEA-യിൽ അംഗമായ ഓസ്ട്രേലിയ ഈ ആഗോള നീക്കത്തിന് പൂർണ്ണ പിന്തുണ പ്രഖ്യാപിച്ചിട്ടുണ്ട്. ഇതിന്റെ ഭാഗമായാണ് ഓസ്ട്രേലിയ സ്വന്തം നിലയിലും ഇത്തരം തീരുമാനങ്ങൾ എടുത്തിരിക്കുന്നത്.
ജനങ്ങളോടുള്ള നിർദേശം:
രാജ്യത്ത് നിലവിൽ ആവശ്യത്തിന് ഇന്ധന ശേഖരമുണ്ടെന്നും വിതരണ കപ്പലുകൾ കൃത്യമായി തുറമുഖങ്ങളിൽ എത്തുന്നുണ്ടെന്നും മന്ത്രി വ്യക്തമാക്കി. അതിനാൽ പൊതുജനങ്ങൾ പരിഭ്രാന്തരായി ഇന്ധനം വാങ്ങി സംഭരിക്കേണ്ടതില്ല (No Panic Buying). അനാവശ്യമായി ഇന്ധനം വാങ്ങി കൂട്ടുന്നത് പ്രതിസന്ധി വർദ്ധിപ്പിക്കാൻ മാത്രമേ ഉപകരിക്കൂ. കൂടാതെ, സൾഫറിന്റെ അളവ് താൽക്കാലികമായി കൂട്ടിയ ഇന്ധനം (Dirtier fuel) ഉപയോഗിക്കുന്നത് ആധുനിക കാറുകളുടെ പ്രവർത്തനത്തെ പെട്ടെന്ന് വലിയ രീതിയിൽ ബാധിക്കില്ലെന്നും വാഹന വിദഗ്ദ്ധർ ചൂണ്ടിക്കാണിക്കുന്നു.
