വിക്ടോറിയയിൽ സൗജന്യ യാത്രാക്കാലം അവസാനിക്കുന്നു; ജൂൺ 1 മുതൽ പൊതുഗതാഗതത്തിന് പകുതി നിരക്ക് മാത്രം

മെൽബൺ: വിക്ടോറിയൻ സർക്കാരിന്റെ സൗജന്യ പൊതുഗതാഗത പദ്ധതി നാളെ (മെയ് 31) അവസാനിക്കുകയാണ്. എന്നാൽ യാത്രക്കാർക്ക് ആശ്വാസമായി ജൂൺ 1 മുതൽ വിക്ടോറിയയിൽ പകുതി നിരക്കിൽ (Victoria half price public transport) യാത്ര ചെയ്യാം. വർദ്ധിച്ചുവരുന്ന ജീവിതച്ചെലവുകൾക്കിടയിൽ സാധാരണക്കാർക്ക് വലിയൊരു ആശ്വാസമാകുന്ന ഈ പുതിയ മൈക്കി (Myki) നിരക്കുകൾ ഈ വർഷം അവസാനം വരെ തുടരും. പുതിയ മാറ്റങ്ങളെക്കുറിച്ച് നിങ്ങൾ അറിഞ്ഞിരിക്കേണ്ട പ്രധാന വിവരങ്ങൾ താഴെ നൽകുന്നു.

പുതിയ നിരക്കുകൾ എങ്ങനെ?

ജൂൺ 1 മുതൽ ഡിസംബർ 31 വരെ (1 ജനുവരി 2027 വരെ) വിക്ടോറിയയിലുടനീളമുള്ള ട്രെയിൻ, ട്രാം, ബസ് യാത്രകൾക്ക് പകുതി നിരക്ക് മാത്രമേ ഈടാക്കുകയുള്ളൂ.

മുഴുവൻ നിരക്ക് (Full Fare): ഒരു ദിവസത്തെ യാത്രാ പരിധി (Daily Cap) 11.40 ഡോളറിൽ നിന്ന് $5.70 ആയി കുറയും.

കൺസെഷൻ നിരക്ക് (Concession): നിലവിലെ $5.70-ൽ നിന്നും പകുതിയായി കുറഞ്ഞ് പരമാവധി $2.85 മാത്രമേ ഈടാക്കൂ.

മെട്രോ സേവനങ്ങൾക്കും മിക്ക റീജിയണൽ സേവനങ്ങൾക്കും ഈ ഇളവ് ബാധകമാണ്. എന്നാൽ സ്കൈബസ് (SkyBus), ഫെറികൾ, സബ്സിഡിയില്ലാത്ത റീജിയണൽ ബസുകൾ എന്നിവയ്ക്ക് ഈ ഇളവ് ലഭിക്കില്ല.

വി/ലൈൻ (V/Line) യാത്രക്കാർ ശ്രദ്ധിക്കാൻ

ജൂൺ 1 മുതൽ വി/ലൈൻ (V/Line) ട്രെയിനുകളിലും കോച്ചുകളിലും സീറ്റ് റിസർവേഷനുകളും ബുക്കിംഗുകളും പകുതി നിരക്കിൽ പുനരാരംഭിക്കും. ജൂൺ ഒന്നിന് ശേഷമുള്ള യാത്രകൾക്കായി നിങ്ങൾ ഇതിനകം മുഴുവൻ തുകയും നൽകി ടിക്കറ്റ് ബുക്ക് ചെയ്തിട്ടുണ്ടെങ്കിൽ, വി/ലൈൻ വെബ്സൈറ്റിലെ കസ്റ്റമർ ഫീഡ്‌ബാക്ക് ഫോം വഴിയോ സ്റ്റേഷനുകൾ വഴിയോ റീഫണ്ടിനായി അപേക്ഷിക്കാവുന്നതാണ്.

ജൂൺ 1 മുതൽ മൈക്കി കാർഡ് എങ്ങനെ ഉപയോഗിക്കണം?

സൗജന്യ യാത്രാ സമയത്ത് ടാപ്പ് ഓൺ (Tap on) ചെയ്യേണ്ടത് നിർബന്ധമായിരുന്നില്ല. എന്നാൽ, തിങ്കളാഴ്ച മുതൽ എല്ലാ യാത്രക്കാരും മൈക്കി കാർഡുകൾ നിർബന്ധമായും ടാപ്പ് ഓൺ, ടാപ്പ് ഓഫ് ചെയ്യണം. സിസ്റ്റം സ്വയമേവ പകുതി നിരക്ക് മാത്രമേ ഈടാക്കുകയുള്ളൂ.

Myki പാസുകൾ: സൗജന്യ സമയത്ത് വാലിഡിറ്റിയുള്ള മൈക്കി പാസുകൾ ഉണ്ടായിരുന്നവർക്ക്, അത് ദീർഘിപ്പിച്ചു നൽകാനോ റീഇംബേഴ്സ് ചെയ്യാനോ ഉള്ള സൗകര്യം ട്രാൻസ്പോർട്ട് വിക്ടോറിയ ഒരുക്കിയിട്ടുണ്ട്. PTV ആപ്പ് വഴിയോ 1800 800 007 എന്ന നമ്പറിലോ കൂടുതൽ വിവരങ്ങൾ അറിയാം.

18 വയസ്സിന് താഴെയുള്ളവർക്ക് (Youth Myki): 18 വയസ്സിന് താഴെയുള്ള കുട്ടികൾക്കും യുവാക്കൾക്കും യൂത്ത് മൈക്കി ഉപയോഗിച്ച് തുടർന്നും സമ്പൂർണ്ണ സൗജന്യ യാത്ര ചെയ്യാവുന്നതാണ്. ഈ ആനുകൂല്യം പുതിയ മാറ്റങ്ങളെ ബാധിക്കില്ല.

ജൂൺ മാസം മുതൽ തിരഞ്ഞെടുത്ത ട്രെയിൻ ലൈനുകളിൽ കോൺടാക്റ്റ്‌ലെസ് പേയ്‌മെന്റ് (Contactless payment) സംവിധാനത്തിന്റെ ട്രയൽ വീണ്ടും ആരംഭിക്കുന്നുണ്ട്.

ഏകദേശം $850 ഡോളറിന്റെ ലാഭമാണ് ജൂൺ മുതൽ ഡിസംബർ വരെയുള്ള കാലയളവിൽ ഒരു ശരാശരി യാത്രക്കാരന് ലഭിക്കാൻ പോകുന്നത് എന്നാണ് സർക്കാരിന്റെ വിലയിരുത്തൽ. യാത്രയ്ക്ക് മുൻപായി മൈക്കി കാർഡിൽ ആവശ്യത്തിന് പണമുണ്ടെന്ന് (Myki Money) ഉറപ്പുവരുത്തുക.

Sajin Thiruvallam
News Editor