മെൽബൺ റോയൽ ചിൽഡ്രൻസ് ആശുപത്രി ‘ഗുഡ് ഫ്രൈഡേ അപ്പീലി’ന് 2 ദശലക്ഷം ഡോളർ സഹായം

ഓസ്‌ട്രേലിയയിലെ കുട്ടികളുടെ ആരോഗ്യ പരിപാലന മേഖലയ്ക്ക് കരുത്തേകാൻ മെൽബണിലെ റോയൽ ചിൽഡ്രൻസ് ആശുപത്രിയുടെ (Royal Children’s Hospital) വിശ്വവിഖ്യാതമായ ‘ഗുഡ് ഫ്രൈഡേ അപ്പീലിന്’ 2 ദശലക്ഷം ഡോളറിന്റെ സാമ്പത്തിക സഹായം പ്രഖ്യാപിച്ച് ഫെഡറൽ സർക്കാർ. പ്രധാനമന്ത്രി ആന്റണി ആൽബനീസീ , ഉപപ്രധാനമന്ത്രി റിച്ചാർഡ് മാൾസ്, ആരോഗ്യ മന്ത്രി മാർക്ക് ബട്‌ലർ എന്നിവർ സംയുക്തമായാണ് ഈ ദുഃഖവെള്ളിയാഴ്ച ഈ സുപ്രധാന പ്രഖ്യാപനം നടത്തിയത്.

95 വർഷത്തെ സേവന പാരമ്പര്യം; ലക്ഷ്യം മികച്ച ചികിത്സ

ഓസ്‌ട്രേലിയൻ സമൂഹത്തിന്റെ, പ്രത്യേകിച്ച് വിക്ടോറിയക്കാരുടെ ജീവകാരുണ്യ പ്രവർത്തനങ്ങളുടെ മകുടോദാഹരണമായ ഗുഡ് ഫ്രൈഡേ അപ്പീലിന്റെ 95-ാം വാർഷികത്തിലാണ് ഈ ധനസഹായം ലഭ്യമാക്കുന്നത്. വിക്ടോറിയയിലുടനീളമുള്ള കുട്ടികൾക്ക് മികച്ചതും വിദഗ്ധവുമായ ചികിത്സ കൂടുതൽ പ്രാപ്യമാക്കുന്നതിനും, ദേശീയ തലത്തിൽ കുട്ടികൾക്കും യുവാക്കൾക്കുമായുള്ള ആരോഗ്യ വിവര സേവനങ്ങൾ വിപുലീകരിക്കുന്നതിനുമാണ് ഈ തുക വിനിയോഗിക്കുക. കുട്ടികളുടെ ജീവൻ രക്ഷിക്കുന്ന ചികിത്സകൾക്കും, ലോകോത്തര ഗവേഷണങ്ങൾക്കുമായി ഫെഡറൽ സർക്കാർ നേരത്തെ നൽകിയ 6 ദശലക്ഷം ഡോളറിന് പുറമെയാണ് പുതിയ പ്രഖ്യാപനം വന്നിരിക്കുന്നത്.

ഗ്രാമീണ മേഖലകൾക്കും ആശ്വാസം

കഴിഞ്ഞ വർഷം ഗുഡ് ഫ്രൈഡേ അപ്പീലിലൂടെ സമാഹരിച്ച തുകയിൽ നിന്നും 3 ദശലക്ഷം ഡോളർ വിക്ടോറിയയിലെ 41 പ്രാദേശിക ആരോഗ്യ സേവന കേന്ദ്രങ്ങൾക്ക് (Regional Health Services) ഉപകരണങ്ങൾ വാങ്ങുന്നതിനും പരിശീലനങ്ങൾക്കുമായി കൈമാറിയിരുന്നു. രോഗികളായ കുട്ടികൾക്ക് തങ്ങളുടെ വീടുകൾക്ക് സമീപം തന്നെ മികച്ച ചികിത്സ ലഭ്യമാക്കാൻ ഇത് വലിയ രീതിയിൽ സഹായിച്ചു. ഗ്രാമീണ ആരോഗ്യ മേഖലയിൽ ഇതൊരു നിർണായക മാറ്റമാണ് (game changer) കൊണ്ടുവന്നതെന്ന് ആരോഗ്യ പ്രവർത്തകർ വിലയിരുത്തുന്നു.

സർക്കാർ പ്രതികരണങ്ങൾ

“കഴിഞ്ഞ 95 വർഷമായി അർഹരായവരെ സഹായിക്കാൻ ഒന്നിച്ചു നിൽക്കുന്ന ഓസ്‌ട്രേലിയൻ പാരമ്പര്യമാണ് ഗുഡ് ഫ്രൈഡേ അപ്പീലിലൂടെ നാം കാണുന്നത്,” പ്രധാനമന്ത്രി ആന്റണി ആൽബനീസ് പറഞ്ഞു. കുട്ടികളുടെ ആരോഗ്യത്തിനും ക്ഷേമത്തിനും സർക്കാർ പ്രഥമ പരിഗണനയാണ് നൽകുന്നതെന്നും, ഈ പുതിയ ഫണ്ട് കൂടുതൽ കുട്ടികൾക്ക് അവരുടെ വീടിനടുത്ത് തന്നെ മികച്ച പരിചരണം ലഭിക്കാൻ സഹായിക്കുമെന്നും അദ്ദേഹം കൂട്ടിച്ചേർത്തു. ഗുഡ് ഫ്രൈഡേ അപ്പീലിനെ വിജയകരമാക്കുന്ന ഓരോ സന്നദ്ധപ്രവർത്തകർക്കും പ്രധാനമന്ത്രി നന്ദി രേഖപ്പെടുത്തി.

പ്രാദേശിക വിക്ടോറിയയിൽ ആരോഗ്യ പരിരക്ഷ കൂടുതൽ പ്രാപ്യമാക്കുക എന്നതാണ് ഈ പിന്തുണയിലൂടെ സർക്കാർ ലക്ഷ്യമിടുന്നതെന്നും, ഇത് രോഗികളായ കുട്ടികളുടെ കുടുംബങ്ങളുടെ ഭാരം കുറയ്ക്കുമെന്നും ഉപപ്രധാനമന്ത്രി റിച്ചാർഡ് മാൾസ് വ്യക്തമാക്കി.

ഓസ്‌ട്രേലിയൻ മലയാളികൾക്കും പങ്കുചേരാം

എല്ലാ വർഷവും ആയിരക്കണക്കിന് സന്നദ്ധപ്രവർത്തകരാണ് ആശുപത്രിക്ക് ഫണ്ട് ശേഖരിക്കുന്നതിനായി തങ്ങളുടെ സമയവും ഊർജ്ജവും മാറ്റിവെക്കുന്നത്. ഓസ്‌ട്രേലിയയിലെ, പ്രത്യേകിച്ച് വിക്ടോറിയയിലെ മലയാളി സമൂഹത്തിനും ഈ ജീവകാരുണ്യ പ്രവർത്തനത്തിൽ തങ്ങളുടേതായ പങ്കുവഹിക്കാവുന്നതാണ്.

സംഭാവനകൾ നൽകാനും ആശുപത്രിയുടെ പ്രവർത്തനങ്ങളെക്കുറിച്ചും അവിടുത്തെ രോഗികളെക്കുറിച്ചും കൂടുതൽ അറിയാനും താല്പര്യമുള്ളവർക്ക് www.goodfridayappeal.com.au എന്ന ഔദ്യോഗിക വെബ്സൈറ്റ് സന്ദർശിക്കാവുന്നതാണ്.

Sajin Thiruvallam
News Editor