ഓസ്ട്രേലിയയിൽ വീണ്ടും പലിശ നിരക്ക് വർധന; തിരിച്ചടി വായ്പയെടുത്തവർക്ക്
കാൻബെറ: ഓസ്‌ട്രേലിയൻ റിസർവ് ബാങ്ക് (RBA) അടിസ്ഥാന പലിശ നിരക്കിൽ (Cash Rate) വീണ്ടും വർധനവ് വരുത്തി. 25 ബേസിസ് പോയിന്റിന്റെ (0.25%) വർധനവാണ് ഇത്തവണ വരുത്തിയിരിക്കുന്നത്. ഇതോടെ രാജ്യത്തെ പലിശ നിരക്ക് 3.85 ശതമാനമായി ഉയർന്നു. ഭവനവായ്പ (Mortgage) എടുത്ത ദശലക്ഷക്കണക്കിന് കുടുംബങ്ങൾക്ക് ഈ തീരുമാനം കനത്ത സാമ്പത്തിക ബാധ്യതയാകും സൃഷ്ടിക്കുക.
പണപ്പെരുപ്പം ഉയരാൻ കാരണം സർക്കാർ ചെലവുകളല്ല, മറിച്ച് സ്വകാര്യ മേഖലയിലെ ഉപഭോഗം (Private Demand) വർധിച്ചതാണെന്ന് ആർബിഐ വ്യക്തമാക്കി. കഴിഞ്ഞ സെപ്തംബർ വരെയുള്ള കണക്കുകൾ പ്രകാരം സ്വകാര്യ ഡിമാൻഡിൽ അഞ്ചിരട്ടി വർധനവാണുണ്ടായത്.
പലിശ നിരക്ക് വർധനവ് പ്രതീക്ഷിച്ചിരുന്നതാണെങ്കിലും, ഇത് സാധാരണക്കാർക്ക് വലിയ പ്രയാസമുണ്ടാക്കുമെന്ന് ട്രഷറർ ജിം ചാൽമേഴ്സ് പ്രതികരിച്ചു. ബജറ്റ് 233 ബില്യൺ ഡോളർ മെച്ചപ്പെട്ട നിലയിലാണെന്നും, കഴിഞ്ഞ വർഷത്തെ അപേക്ഷിച്ച് സർക്കാർ ചെലവുകൾ കുറഞ്ഞിട്ടുണ്ടെന്നും അദ്ദേഹം ചൂണ്ടിക്കാട്ടി.
അതെസമയം, ജീവിതച്ചെലവ് വർധിക്കുന്നത് കണക്കിലെടുത്ത്, നികുതി ഇളവുകൾ (Tax cuts), കുറഞ്ഞ നിരക്കിലുള്ള മരുന്നുകൾ, വിദ്യാർത്ഥികളുടെ കടാശ്വാസം (Student debt relief) തുടങ്ങിയ പദ്ധതികൾ സർക്കാർ തുടരും. ഈ വർഷവും അടുത്ത വർഷവുമായി രണ്ട് ഘട്ടങ്ങളിലായി കൂടുതൽ നികുതി ഇളവുകൾ നൽകുമെന്നും സർക്കാർ അറിയിച്ചു.
ഊർജ്ജ ബിൽ ഇളവുകൾ അവസാനിച്ചതും, ക്രിസ്മസ് സീസണിലെ യാത്ര ചെലവുകൾ വർധിച്ചതും പണപ്പെരുപ്പം കുറയാതിരിക്കാൻ കാരണമായിട്ടുണ്ട്. സമ്പദ്‌വ്യവസ്ഥയെ ശക്തിപ്പെടുത്തുന്നതിനൊപ്പം തന്നെ ജനങ്ങൾക്ക് ആശ്വാസം നൽകുന്ന നടപടികളുമായി മുന്നോട്ട് പോകാനാണ് സർക്കാരിന്റെ തീരുമാനം.
