സിനിമയെ വെല്ലുന്ന രീതിയിൽ ആഡംബര കാറുകൾ മോഷ്ടിക്കുന്ന സംഘം പിടിയിൽ

Photo : AI

മെൽബൺ: മെൽബൺ നഗരത്തിന്റെ വിവിധ ഭാഗങ്ങളിൽ നിന്നായി ആഡംബര കാറുകൾ മോഷ്ടിച്ച കേസിൽ നാല് യുവാക്കളെ വിക്ടോറിയ പോലീസ് അറസ്റ്റ് ചെയ്തു. പോർഷെ, മസെരാട്ടി തുടങ്ങിയ മുന്തിയ ഇനം കാറുകൾ മോഷ്ടിച്ച് നഗരത്തിലൂടെ കറങ്ങിയ സംഘമാണ് പിടിയിലായത്. വ്യാഴാഴ്ച രാവിലെയായിരുന്നു സംഭവം.

ഫ്രാങ്ക്സ്റ്റൺ, സീഫോർഡ് സ്വദേശികളായ 17-നും 23-നും ഇടയിൽ പ്രായമുള്ള നാല് യുവാക്കളാണ് പിടിയിലായത്. ഇവർക്കെതിരെ ഭവനഭേദനം, വാഹനം മോഷണം, മോഷണശ്രമം തുടങ്ങിയ ഗുരുതരമായ വകുപ്പുകൾ ചുമത്തിയിട്ടുണ്ട്.

മോഷ്ടിക്കപ്പെട്ട എല്ലാ ആഡംബര വാഹനങ്ങളും കണ്ടെടുക്കാൻ സാധിച്ചതായി പോലീസ് അറിയിച്ചു. മെൽബണിൽ രാത്രികാലങ്ങളിൽ വീടുകളിൽ അതിക്രമിച്ചു കയറി ആഡംബര കാറുകൾ മോഷ്ടിക്കുന്നത് തടയാനായി വിക്ടോറിയ പോലീസ് ആവിഷ്കരിച്ച ‘ഓപ്പറേഷൻ ട്രിനിറ്റി’ (Operation Trinity) യുടെ ഭാഗമായാണ് അന്വേഷണം പുരോഗമിക്കുന്നത്. ഇത്തരം കുറ്റകൃത്യങ്ങളിൽ ഏർപ്പെടുന്ന യുവാക്കളെ പിടികൂടാൻ പോലീസ് രാത്രികാല പട്രോളിംഗ് ശക്തമാക്കിയിട്ടുണ്ട്.

പോലീസ് നൽകുന്ന വിവരങ്ങൾ അനുസരിച്ച് സിനിമയെ വെല്ലുന്ന രീതിയിലായിരുന്നു മോഷണ പരമ്പര അരങ്ങേറിയത്:

വ്യാഴാഴ്ച പുലർച്ചെ 1:05-ഓടെ കാന്റർബറിയിലെ വാട്ടിൽ റോഡിലെ ഒരു വീട്ടിൽ അതിക്രമിച്ചു കയറിയ സംഘം ഒരു ‘പോർഷെ കയെൻ’ (Porsche Cayenne) മോഷ്ടിച്ചു. ഇതിന് തൊട്ടുപിന്നാലെ, വിക്ടോറിയ റോഡിലെ മറ്റൊരു വീട്ടിലും മോഷണശ്രമം നടന്നെങ്കിലും പരാജയപ്പെട്ടു.

തുടർന്ന് മോണ്ട് ആൽബർട്ട് റോഡിലെത്തിയ സംഘം അവിടെയുള്ള ഒരു വീട്ടിൽ നിന്ന് പോർഷെയുടെയും ബിഎംഡബ്ല്യുവിന്റെയും (BMW) താക്കോലുകൾ കൈക്കലാക്കി. എന്നാൽ കാറുകൾ സ്റ്റാർട്ട് ചെയ്യുന്ന ശബ്ദം കേട്ട് വീട്ടുടമസ്ഥൻ ഉണർന്നതോടെ ബിഎംഡബ്ല്യു ഉപേക്ഷിച്ച് ഇവർ പോർഷെയുമായി കടന്നുകളഞ്ഞു.

പിന്നീട് മെൽബണിന്റെ തെക്കുകിഴക്കൻ മേഖലയായ ക്രാൻബേണിലെ ടുള്ളിയല്ലൻ ബൊളിവാർഡിലെത്തിയ ഇവർ, അവിടെ നിന്ന് ഒരു ‘മസെരാട്ടി’ (Maserati) കൂടി മോഷ്ടിച്ചു.

മൗണ്ട് എലിസ (Mt Eliza) ഭാഗത്ത് അശ്രദ്ധമായി വാഹനം ഓടിക്കുന്നത് ശ്രദ്ധയിൽപ്പെട്ടതിനെ തുടർന്ന് നാട്ടുകാർ പോലീസിനെ വിവരമറിയിക്കുകയായിരുന്നു. തുടർന്ന് നടത്തിയ നീക്കത്തിനൊടുവിലാണ് പ്രതികൾ പിടിയിലാകുന്നത്.

സംഭവവുമായി ബന്ധപ്പെട്ട് കൂടുതൽ വിവരങ്ങൾ അറിയാവുന്നവർ ക്രൈം സ്റ്റോപ്പേഴ്സുമായി (1800 333 000) ബന്ധപ്പെടണമെന്ന് പോലീസ് അഭ്യർത്ഥിച്ചു.