ഇറാൻ യുദ്ധം, ഇന്ധനക്ഷാമം, പുതിയ ബജറ്റ്: ഓസ്‌ട്രേലിയൻ  പ്രധാനമന്ത്രി നിലപാട് വ്യക്തമാക്കുന്നു 

സിഡ്‌നി: പശ്ചിമേഷ്യൻ സംഘർഷം, രാജ്യത്തെ ഇന്ധന സുരക്ഷ, വരാനിരിക്കുന്ന പുതിയ ബജറ്റ് തുടങ്ങി ലോകവും ഓസ്‌ട്രേലിയയും നേരിടുന്ന നിർണായക വിഷയങ്ങളിൽ നിലപാട് വ്യക്തമാക്കി ഓസ്‌ട്രേലിയൻ പ്രധാനമന്ത്രി ആൻ്റണി ആൽബനീസീ . പ്രമുഖ സ്വതന്ത്ര മാധ്യമമായ ‘ദി ഡെയ്‌ലി ഓസ്’ (The Daily Aus) പോഡ്‌കാസ്റ്റിന് നൽകിയ പ്രത്യേക അഭിമുഖത്തിലാണ് അദ്ദേഹം രാജ്യത്തിന്റെ നിലപാടുകൾ വിശദീകരിച്ചത്.

ആഗോള സമ്പദ്‌വ്യവസ്ഥയെ ബാധിക്കുന്ന യുദ്ധം 

ലോകം ഇപ്പോൾ കടന്നുപോകുന്നത് വളരെ കലുഷിതമായ സാഹചര്യത്തിലൂടെയാണെന്ന് അദ്ദേഹം വിലയിരുത്തി. “നമ്മൾ ഈ യുദ്ധത്തിൽ നേരിട്ട് പങ്കാളികളല്ല, എങ്കിലും ഇതിന്റെ പ്രത്യാഘാതങ്ങളിൽ നിന്ന് നമുക്ക് ഒഴിഞ്ഞുമാറാനാകില്ല. ലോകമെമ്പാടുമുള്ള സമ്പദ്‌വ്യവസ്ഥയെ ഇത് സാരമായി ബാധിക്കുന്നുണ്ട്. ഇന്ന് യുദ്ധം അവസാനിച്ചാൽ പോലും ഇതിന്റെ പ്രത്യാഘാതങ്ങൾ കുറച്ചുകാലം കൂടി നിലനിൽക്കും. ഇതിന്റെ ഏറ്റവും മോശമായ പ്രത്യാഘാതങ്ങളിൽ നിന്ന് ഓസ്‌ട്രേലിയൻ ജനതയെ സംരക്ഷിക്കുക എന്നതാണ് എന്റെ ലക്ഷ്യം,” പ്രധാനമന്ത്രി പറഞ്ഞു.

യുഎസ് പ്രസിഡന്റ് ഡൊണാൾഡ് ട്രംപ് ഇറാനിലെ വെടിനിർത്തൽ നീട്ടിയ തീരുമാനത്തെ അദ്ദേഹം സ്വാഗതം ചെയ്തു. സംഘർഷങ്ങൾക്ക് ശാശ്വതമായ പരിഹാരം കാണണമെന്നും ഇറാൻ ആണവായുധങ്ങൾ സ്വന്തമാക്കുന്നത് തടയേണ്ടതുണ്ടെന്നും അദ്ദേഹം കൂട്ടിച്ചേർത്തു. അതേസമയം, “ഞങ്ങൾ ആവശ്യപ്പെട്ടപ്പോൾ ഓസ്‌ട്രേലിയ ഒപ്പമുണ്ടായിരുന്നില്ല” എന്ന ഡൊണാൾഡ് ട്രംപിന്റെ വിമർശനത്തോട്, അമേരിക്കയിൽ നിന്ന് നേരിട്ടുള്ള സൈനിക സഹായ അഭ്യർത്ഥനകൾ ഒന്നും തന്നെ ഉണ്ടായിരുന്നില്ലെന്ന് അദ്ദേഹം പ്രതികരിച്ചു.

ഇന്ധനക്ഷാമവും സർക്കാർ നടപടികളും 

രാജ്യത്ത് 46 ദിവസത്തേക്കുള്ള പെട്രോൾ ശേഖരം നിലവിലുണ്ടെന്നും, യുദ്ധം പൊട്ടിപ്പുറപ്പെട്ട സമയത്തേക്കാൾ കൂടുതൽ ഇന്ധനം ഇപ്പോൾ ലഭ്യമാണെന്നും പ്രധാനമന്ത്രി വ്യക്തമാക്കി. കഴിഞ്ഞ 15 വർഷത്തിനിടയിലെ ഏറ്റവും ഉയർന്ന ഇന്ധന ശേഖരമാണ് ഇപ്പോൾ രാജ്യത്തുള്ളത്. ജനങ്ങളോട് ഇന്ധനം ലാഭിക്കാൻ ആവശ്യപ്പെടുന്ന സർക്കാരിന്റെ ‘Every Little Bit Helps’ ക്യാമ്പയിനെ അദ്ദേഹം ന്യായീകരിച്ചു. പ്രതിസന്ധി ഘട്ടങ്ങളിൽ ഇന്ധനം ലാഭിക്കുന്നത് ജനങ്ങൾക്ക് സാമ്പത്തിക ലാഭം നൽകുന്നതിനൊപ്പം രാജ്യത്തിന് ഗുണകരമാകുമെന്നും അദ്ദേഹം കൂട്ടിച്ചേർത്തു.

വാതക നികുതിയും സാമ്പത്തിക മാന്ദ്യവും 

വാതക കയറ്റുമതി ചെയ്യുന്ന കമ്പനികൾ സർക്കാരിന് വളരെ കുറഞ്ഞ നികുതി മാത്രമാണ് നൽകുന്നത് എന്ന ആരോപണങ്ങളെ പ്രധാനമന്ത്രി ശക്തമായി എതിർത്തു. കഴിഞ്ഞ സാമ്പത്തിക വർഷം കമ്പനി നികുതിയുൾപ്പെടെ ഏകദേശം 22 ബില്യൺ ഡോളർ വാതക നികുതിയായി ലഭിച്ചുവെന്ന് അദ്ദേഹം വ്യക്തമാക്കി.

യുദ്ധം തുടർന്നാൽ ആഗോള സാമ്പത്തിക മാന്ദ്യം ഉണ്ടായേക്കാമെന്ന ഐഎംഎഫിന്റെ (IMF) മുന്നറിയിപ്പിനെക്കുറിച്ചുള്ള ചോദ്യത്തിന്, ഓസ്‌ട്രേലിയ സാമ്പത്തിക മാന്ദ്യത്തിലേക്ക് നീങ്ങുന്നില്ലെന്നാണ് ട്രഷറിയിൽ നിന്നുള്ള വിവരമെന്ന് അദ്ദേഹം ഉറപ്പുനൽകി. മുൻ സർക്കാരിന്റെ കാലത്ത് ഇല്ലാതിരുന്ന ബജറ്റ് മിച്ചം (Budget Surplus) രണ്ടുതവണ നേടാൻ ഈ സർക്കാരിനായെന്നും അദ്ദേഹം അവകാശപ്പെട്ടു.

യുവാക്കൾക്കായി പുതിയ ബജറ്റ് 

മെയ് 12-ന് അവതരിപ്പിക്കാനിരിക്കുന്ന ബജറ്റിൽ യുവാക്കൾക്കും വിദ്യാർത്ഥികൾക്കും പ്രാധാന്യം നൽകുന്ന പ്രഖ്യാപനങ്ങൾ ഉണ്ടാകുമെന്ന് പ്രധാനമന്ത്രി സൂചിപ്പിച്ചു. വിദ്യാർത്ഥികളുടെ കടം കുറച്ചതും ജൂലൈ 1 മുതൽ നടപ്പിലാക്കാൻ പോകുന്ന നികുതി ഇളവുകളും യുവാക്കൾക്ക് വലിയ ആശ്വാസമാകുമെന്നും കൂടുതൽ പ്രഖ്യാപനങ്ങൾ ബജറ്റിൽ പ്രതീക്ഷിക്കാമെന്നും അദ്ദേഹം വ്യക്തമാക്കി.