ഓസ്‌ട്രേലിയയുടെ ചരിത്രത്തിലെ ഏറ്റവും വലിയ ലഹരിവേട്ട; സിഡ്‌നിയിൽ പിടികൂടിയത് 816 ദശലക്ഷം ഡോളർ വിലമതിക്കുന്ന കൊക്കെയ്ൻ

ഓസ്‌ട്രേലിയയുടെ ചരിത്രത്തിലെ ഏറ്റവും വലിയ കൊക്കെയ്ൻ വേട്ടയുടെ (Australia biggest cocaine bust) വിവരങ്ങൾ പുറത്തുവിട്ട് അന്വേഷണ ഏജൻസികൾ. സിഡ്‌നിയിലെ ഒരു രഹസ്യ കേന്ദ്രത്തിൽ നിന്ന് 816 ദശലക്ഷം ഡോളർ (ഏകദേശം 4500 കോടി രൂപ) വിലമതിക്കുന്ന 2.7 ടൺ കൊക്കെയ്നാണ് പോലീസ് പിടികൂടിയത്. രാജ്യത്തെ പ്രധാന നഗരങ്ങൾ കേന്ദ്രീകരിച്ച് ലഹരിമരുന്ന് വിതരണം ചെയ്യുന്ന വൻ സംഘത്തെ തകർക്കാൻ ലക്ഷ്യമിട്ട് ആരംഭിച്ച ഓപ്പറേഷൻ മിൻജിയാങ്ങിന്റെ (Operation Minjiang) ഭാഗമായാണ് ഈ നിർണായക നീക്കം.

Photo Credit : AFP

ഭൂഗർഭ അറയിൽ ഒളിപ്പിച്ച നിലയിൽ കോടികളുടെ കൊക്കെയ്ൻ

ഓസ്‌ട്രേലിയൻ ഫെഡറൽ പോലീസും (AFP) ക്വീൻസ്‌ലാൻഡ് ജോയിൻ്റ് ഓർഗനൈസ്ഡ് ക്രൈം ടാസ്‌ക്ഫോഴ്‌സും (QJOCTF) സംയുക്തമായി നടത്തിയ പരിശോധനയിലാണ് ഈ വൻ ലഹരിമരുന്ന് ശേഖരം പിടികൂടിയത്. ജൂൺ 19, 2026-ൽ സിഡ്‌നിക്ക് പടിഞ്ഞാറുള്ള ലണ്ടൻഡെറിയിലെ (Londonderry) ഒരു സ്വകാര്യ ഭൂമിയിലാണ് അന്വേഷണ സംഘം റെയ്ഡ് നടത്തിയത്. ഇവിടെയുണ്ടായിരുന്ന മൂന്ന് ഷിപ്പിംഗ് കണ്ടെയ്‌നറുകൾക്ക് താഴെ, രഹസ്യമായി നിർമ്മിച്ച ഭൂഗർഭ അറകളിലായിരുന്നു പ്ലാസ്റ്റിക് ടബ്ബുകളിലാക്കി കൊക്കെയ്ൻ ഒളിപ്പിച്ചിരുന്നത്.

റെയ്ഡ് നടക്കുന്നതിനിടെ ഓടി രക്ഷപ്പെടാൻ ശ്രമിച്ച 21, 25 വയസ്സുള്ള രണ്ട് യുവാക്കളെ പോലീസ് പിന്തുടർന്ന് അറസ്റ്റ് ചെയ്തു. ഇവരെ കോടതിയിൽ ഹാജരാക്കി റിമാൻഡ് ചെയ്തിരിക്കുകയാണ്. കുറ്റം തെളിഞ്ഞാൽ ഇരുവർക്കും ജീവപര്യന്തം തടവുശിക്ഷ വരെ ലഭിച്ചേക്കാം. നേരത്തെ പിടികൂടിയ 178 കിലോ കൊക്കെയ്നും 142 കിലോ മെത്താംഫെറ്റാമിനും ഉൾപ്പെടെ, ഈ ഓപ്പറേഷനിലൂടെ മാത്രം ഇതുവരെ 3 ടണ്ണിലധികം ലഹരിമരുന്നുകളാണ് പോലീസ് പിടിച്ചെടുത്തത്.

ഓപ്പറേഷൻ മിൻജിയാങ്: അന്വേഷണം ആരംഭിച്ചത് ക്വീൻസ്‌ലാൻഡിൽ നിന്ന്

മെയ് 2026-ൽ നോർത്ത് ക്വീൻസ്‌ലാൻഡിലെ മിഡ്‌ജ് പോയിൻ്റിൽ (Midge Point) ഉപേക്ഷിക്കപ്പെട്ട നിലയിൽ കണ്ടെത്തിയ ഒരു ട്രക്കിൽ നിന്ന് 40 കിലോ കൊക്കെയ്ൻ ലഭിച്ചതോടെയാണ് ഓപ്പറേഷൻ മിൻജിയാങ്ങിന് തുടക്കമാകുന്നത്. വിദേശത്ത് നിന്നുമെത്തിയ കപ്പലിൽ നിന്ന് വടക്കൻ ക്വീൻസ്‌ലാൻഡ് വഴി ലഹരിമരുന്ന് ഓസ്‌ട്രേലിയയിലേക്ക് കടത്തുകയും, പിന്നീട് സിഡ്‌നിയിലെ വിതരണ സംഘത്തിന് കൈമാറുകയുമായിരുന്നു മാഫിയയുടെ ലക്ഷ്യം. ഈ റാക്കറ്റുമായി ബന്ധപ്പെട്ട് ഇതുവരെ ആറുപേരെ പോലീസ് അറസ്റ്റ് ചെയ്തിട്ടുണ്ട്. ഇതിന് പുറമെ, ലഹരിമരുന്ന് കടത്താൻ ഉപയോഗിച്ചതെന്ന് കരുതുന്ന ‘എംവി വെൽത്ത് (MV Wealth)’ എന്ന കപ്പൽ സോളമൻ ദ്വീപുകളിൽ അധികൃതർ കസ്റ്റഡിയിലെടുത്തിട്ടുണ്ട്.

കർശന മുന്നറിയിപ്പുമായി ഉദ്യോഗസ്ഥർ

അന്താരാഷ്ട്ര ലഹരിമരുന്ന് മാഫിയകൾ ഓസ്‌ട്രേലിയൻ സമൂഹത്തിന് സൃഷ്ടിക്കുന്ന വലിയ ഭീഷണിയുടെ ഉദാഹരണമാണ് ഈ സംഭവമെന്ന് എഎഫ്‌പി കമാൻഡർ സ്റ്റീഫൻ ജെയ് (Stephen Jay) പറഞ്ഞു. കുറ്റവാളികളെ കണ്ടെത്താൻ അന്താരാഷ്ട്ര ഏജൻസികളുമായി ചേർന്ന് അന്വേഷണം ഊർജ്ജിതമാക്കിയതായി അദ്ദേഹം വ്യക്തമാക്കി. ലഹരിമരുന്ന് സംഘങ്ങളെ വേരോടെ പിഴുതെറിയാൻ വിവിധ സുരക്ഷാ ഏജൻസികൾ ഒറ്റക്കെട്ടായി പ്രവർത്തിക്കുമെന്ന് ഓസ്‌ട്രേലിയൻ ബോർഡർ ഫോഴ്സ് (ABF) കമാൻഡർ ട്രോയ് സോകോലോഫ് (Troy Sokoloff) മുന്നറിയിപ്പ് നൽകി.

Photo  & Video : AFP

Sajin Thiruvallam
News Editor