സിഡ്‌നിയിൽ കുത്തേറ്റ് യുവതി മരിച്ചു; യുവാവ് ആശുപത്രിയിൽ മരണത്തിന് കീഴടങ്ങി
സിഡ്‌നി: സിഡ്‌നിയിലെ ക്വാക്കേഴ്‌സ് ഹിൽ (Quakers Hill) പ്രദേശത്തുണ്ടായ ആക്രമണത്തിൽ ഒരു സ്ത്രീയും പുരുഷനും കൊല്ലപ്പെട്ടു. ഞായറാഴ്ച പുലർച്ചെ 5 മണിയോടെയാണ് ഇല്ലബോ സ്ട്രീറ്റിലെ (Illabo Street) വീടിനുള്ളിൽ വെച്ച് ഇരുവർക്കും കുത്തേറ്റത്.
സംഭവസ്ഥലത്ത് വെച്ചുതന്നെ 30 വയസ്സുള്ള യുവതി മരണമടഞ്ഞു. വീടിന് പുറത്ത് ഗുരുതരമായി പരിക്കേറ്റ നിലയിൽ കണ്ടെത്തിയ 30 വയസ്സുകാരനായ യുവാവിനെ ഉടൻ തന്നെ ലിവർപൂൾ ആശുപത്രിയിൽ എത്തിച്ചെങ്കിലും, പിന്നീട് മരണത്തിന് കീഴടങ്ങുകയായിരുന്നു.
സംഭവം നടന്ന് ഏകദേശം അരമണിക്കൂറിന് ശേഷം, 47 വയസ്സുള്ള ഒരാൾ ബ്ലാക്ക്ടൗൺ പോലീസ് സ്റ്റേഷനിലെത്തി കീഴടങ്ങി. ഇയാളെ പോലീസ് അറസ്റ്റ് ചെയ്തിട്ടുണ്ട്. കൊല്ലപ്പെട്ടവരും പ്രതിയും തമ്മിലുള്ള ബന്ധം പോലീസ് അന്വേഷിച്ചുവരികയാണ്.
