ഏപ്രിൽ 15 മുതൽ പുതിയ നിയമം: സിംഗപ്പൂർ എയർലൈൻസിൽ യാത്ര ചെയ്യുന്നവരുടെ ശ്രദ്ധയ്ക്ക് 

മെൽബൺ: വിമാന യാത്രകളിൽ പവർ ബാങ്കുകൾ കൊണ്ടുപോകുന്നതുമായി ബന്ധപ്പെട്ട സുരക്ഷാ മാനദണ്ഡങ്ങൾ കർശനമാക്കി സിംഗപ്പൂർ എയർലൈൻസ് (SIA). അന്താരാഷ്ട്ര സിവിൽ ഏവിയേഷൻ ഓർഗനൈസേഷന്റെയും (ICAO) സിംഗപ്പൂർ സിവിൽ ഏവിയേഷൻ അതോറിറ്റിയുടെയും (CAAS) പുതിയ സുരക്ഷാ മാർഗ്ഗനിർദ്ദേശങ്ങൾ പ്രകാരമാണ് എയർലൈൻസ് നിയന്ത്രണങ്ങൾ പുതുക്കിയിരിക്കുന്നത്. 2026 ഏപ്രിൽ 15 ബുധനാഴ്ച മുതലാണ് പുതിയ നിയമങ്ങൾ പ്രാബല്യത്തിൽ വരുന്നത്. നാട്ടിലേക്കുള്ള യാത്രകൾക്കായി സിംഗപ്പൂർ എയർലൈൻസിനെ കൂടുതലായി ആശ്രയിക്കുന്ന ഓസ്‌ട്രേലിയൻ മലയാളികൾക്ക് ഈ പുതിയ വിവരങ്ങൾ ഏറെ നിർണ്ണായകമാണ്.

പുതിയ നിയമങ്ങളിലെ പ്രധാന മാറ്റങ്ങൾ:

എണ്ണത്തിൽ നിയന്ത്രണം: പുതിയ നിയമപ്രകാരം, ഒരു യാത്രക്കാരന് പരമാവധി രണ്ട് പവർ ബാങ്കുകൾ മാത്രമേ വിമാനത്തിൽ കൊണ്ടുപോകാൻ സാധിക്കൂ. പരിധിയിൽ കൂടുതൽ പവർ ബാങ്കുകൾ കൈവശമുണ്ടെങ്കിൽ വിമാനത്തിൽ കയറുന്നതിന് മുൻപായി അവ ഉപേക്ഷിക്കേണ്ടത് യാത്രക്കാരുടെ പൂർണ്ണ ഉത്തരവാദിത്തമാണ്.

ശേഷി അടിസ്ഥാനമാക്കിയുള്ള നിബന്ധനകൾ: പവർ ബാങ്കുകളുടെ ശേഷി (Capacity) സംബന്ധിച്ചും വ്യക്തമായ നിയന്ത്രണങ്ങൾ ഏർപ്പെടുത്തിയിട്ടുണ്ട്. 100Wh (വാട്ട്-അവർ) വരെയുള്ള പവർ ബാങ്കുകൾ കൊണ്ടുപോകാൻ എയർലൈനിന്റെ മുൻകൂർ അനുമതി ആവശ്യമില്ല. എന്നാൽ 100Wh മുതൽ 160Wh വരെ ശേഷിയുള്ളവ കൈവശം വെക്കണമെങ്കിൽ വിമാനക്കമ്പനിയിൽ നിന്ന് മുൻകൂർ അനുമതി നിർബന്ധമായും വാങ്ങിയിരിക്കണം. 160Wh-ൽ കൂടുതൽ ശേഷിയുള്ള പവർ ബാങ്കുകൾ വിമാനത്തിൽ കൊണ്ടുപോകുന്നതിന് കർശന നിരോധനമുണ്ട്.

ക്യാബിൻ ബാഗേജിൽ മാത്രം: പവർ ബാങ്കുകൾ യാതൊരു കാരണവശാലും ചെക്ക്-ഇൻ ലഗേജിൽ ഉൾപ്പെടുത്താൻ പാടുള്ളതല്ല. അവ ക്യാബിൻ ബാഗേജിൽ (Hand luggage) മാത്രമേ അനുവദിക്കൂ. വിമാനത്തിനുള്ളിൽ ഇവ എളുപ്പത്തിൽ എടുക്കാൻ സാധിക്കുന്ന രീതിയിൽ, മുൻവശത്തെ സീറ്റിനടിയിലോ സീറ്റിന്റെ പോക്കറ്റിലോ വേണം സൂക്ഷിക്കാൻ. യാത്രക്കാരുടെ ലഗേജ് വെക്കുന്ന ഓവർഹെഡ് കംപാർട്ട്മെന്റുകളിൽ പവർ ബാങ്കുകൾ സൂക്ഷിക്കാൻ പാടില്ല.

യാത്രയ്ക്കിടയിലെ ഉപയോഗം: സുരക്ഷാ കാരണങ്ങളാൽ, യാത്രയ്ക്കിടയിൽ വിമാനത്തിലെ പവർ ഔട്ട്‌ലെറ്റുകളോ യുഎസ്ബി പോർട്ടുകളോ ഉപയോഗിച്ച് പവർ ബാങ്കുകൾ ചാർജ് ചെയ്യാൻ പാടുള്ളതല്ല. അതുപോലെ തന്നെ, വിമാനത്തിനുള്ളിൽ വെച്ച് പവർ ബാങ്ക് ഉപയോഗിച്ച് മൊബൈൽ ഫോൺ ഉൾപ്പെടെയുള്ള സ്വന്തം ഇലക്ട്രോണിക് ഉപകരണങ്ങൾ ചാർജ് ചെയ്യുന്നതിനും വിലക്കുണ്ട്.

യാത്രക്കാരുടെയും ജീവനക്കാരുടെയും പൂർണ്ണ സുരക്ഷ മുൻനിർത്തിയാണ് ഈ അടിയന്തര മാറ്റങ്ങൾ നടപ്പിലാക്കുന്നതെന്ന് സിംഗപ്പൂർ എയർലൈൻസ് ഔദ്യോഗികമായി അറിയിച്ചു. യാത്രക്കാർ വിമാനത്താവളത്തിലേക്ക് പുറപ്പെടുന്നതിന് മുൻപായി തങ്ങളുടെ പവർ ബാങ്കുകളുടെ എണ്ണവും ശേഷിയും പരിശോധിച്ച് പുതിയ നിയമങ്ങൾ പാലിക്കുന്നുണ്ടെന്ന് ഉറപ്പുവരുത്തേണ്ടതാണ്.

Sajin Thiruvallam
News Editor