മെൽബണിൽ വാഹനമോഷണവും അപകടവും: 15 വയസ്സുകാരൻ മരിച്ചു, 17 വയസ്സുകാരനെതിരെ കൊലക്കുറ്റം

മെൽബണിലെ സൗത്ത് വെസ്റ്റിൽ മോഷ്ടിച്ച കാറുമായുള്ള പാച്ചിലിനൊടുവിൽ നടന്ന വാഹനാപകടത്തിൽ ഒരു പതിനഞ്ചുകാരൻ ദാരുണമായി കൊല്ലപ്പെട്ടു. സംഭവവുമായി ബന്ധപ്പെട്ട് വിക്ടോറിയ പൊലിസ് 17 വയസ്സുകാരനെ വിൻഡ്‌ഹാം (Wyndham) ഏരിയയിൽ നിന്നും അറസ്റ്റ് ചെയ്തു. ഈ കൗമാരക്കാരനെതിരെ മരണത്തിനിടയാക്കിയ അശ്രദ്ധമായ ഡ്രൈവിംഗ് (Culpable driving causing death) ഉൾപ്പെടെയുള്ള ഗുരുതരമായ വകുപ്പുകൾ ചുമത്തിയിട്ടുണ്ട്. ഈ കുട്ടിയെ ചിൽഡ്രൻസ് കോടതിയിൽ ഹാജരാക്കും.

അപകടം നടന്നതെങ്ങനെ?

ഇക്കഴിഞ്ഞ വെള്ളിയാഴ്ച പുലർച്ചെ 12 മണിയോടെ ഹോപ്പേഴ്‌സ് ക്രോസിംഗിലെ (Hoppers Crossing) ഡെറിമട്ട് റോഡിലാണ് (Derrimut Road) നാടിനെ നടുക്കിയ അപകടം നടന്നത്. മേഡ്‌സ്റ്റോണിലെ (Maidstone) യെല്ലോ ബോക്സ് സ്ട്രീറ്റിൽ (Yellow Box St) നിന്നും അപകടത്തിന് ഒരു ദിവസം മുൻപ് മോഷ്ടിച്ച ഗ്രേ നിറത്തിലുള്ള സ്കോഡ (Skoda) കാറിലാണ് 14 നും 17 നും ഇടയിൽ പ്രായമുള്ള ഏഴു കൗമാരക്കാർ ഉണ്ടായിരുന്നത്.

മറ്റൊരു വാഹനമായ ടൊയോട്ട സെഡാൻ (Toyota sedan) തട്ടിയെടുക്കാൻ ശ്രമിക്കുന്നതിനിടെ (carjacking) മണിക്കൂറിൽ 180 കിലോമീറ്റർ വരെ വേഗതയിൽ ഇവർ ടൊയോട്ടയെ പിന്തുടരുകയായിരുന്നുവെന്ന് പോലീസ് പറയുന്നു. സ്കോഡ കാർ ടൊയോട്ടയുടെ പിന്നിൽ ഇടിക്കുകയും, തുടർന്ന് നിയന്ത്രണം വിട്ട് എതിർദിശയിലുണ്ടായിരുന്ന ഒരു ഫോർഡ് സെഡാനിലും ഫോർഡ് റേഞ്ചറിലും (Ford Ranger) ഇടിച്ച് മറിയുകയുമായിരുന്നു. നിരവധി തവണ തലകീഴായി മറിഞ്ഞ കാർ സമീപത്തുള്ള ഒരു വീടിൻ്റെ മുൻവശത്തെ മുറ്റത്താണ് ചെന്നുവീണത്.

പരിക്കുകളും മറ്റ് അറസ്റ്റുകളും

മരണം: കാറിൽ നിന്നും തെറിച്ചുവീണ 15 വയസ്സുകാരൻ സംഭവസ്ഥലത്തുവെച്ചുതന്നെ മരിച്ചു.

ഗുരുതരമായ പരിക്ക്: മുൻ സീറ്റിലിരുന്ന 16 വയസ്സുകാരിക്ക് ഗുരുതരമായി പരിക്കേൽക്കുകയും രണ്ട് കാലുകൾക്കും ഒടിവ് സംഭവിക്കുകയും ചെയ്തു. ഇവർ നിലവിൽ പോലീസിന്റെ കാവലിൽ ആശുപത്രിയിൽ ചികിത്സയിലാണ്.

മറ്റ് അറസ്റ്റുകൾ: സംഭവസ്ഥലത്തുനിന്ന് അറസ്റ്റിലായ മറ്റൊരു 16 വയസ്സുകാരിയെ ചോദ്യം ചെയ്ത ശേഷം വിട്ടയച്ചു. പരിക്കുകളോടെ പിന്നീട് കുടുംബത്തോടൊപ്പം ആശുപത്രിയിലെത്തിയ 14 വയസ്സുകാരനെയും പൊലിസ് കസ്റ്റഡിയിലെടുത്തിട്ടുണ്ട്.

ഒളിവിലുള്ളവർ: അപകടത്തിന് ശേഷം കാറിലുണ്ടായിരുന്ന ബാക്കി രണ്ട് പേർ സംഭവസ്ഥലത്തുനിന്ന് ഓടി രക്ഷപ്പെട്ടു. ഇവരെ കണ്ടെത്താനുള്ള ശ്രമങ്ങൾ പോലീസ് ഊർജ്ജിതമാക്കിയിട്ടുണ്ട്.

അപകടസ്ഥലത്തുനിന്ന് ഒരു വാളും (sword) കാറിനുള്ളിൽ നിന്ന് മദ്യവും പൊലീസ് കണ്ടെടുത്തിട്ടുണ്ട്. സ്കോഡ കാർ പിന്തുടർന്ന ടൊയോട്ടയിലുണ്ടായിരുന്നവരും, അപകടത്തിൽപ്പെട്ട മറ്റ് രണ്ട് വാഹനങ്ങളിലുണ്ടായിരുന്നവരും നിസ്സാര പരിക്കുകളോടെ അത്ഭുതകരമായി രക്ഷപ്പെട്ടു.

പൊലീസിൻ്റെ പ്രതികരണം

മരിക്കുന്ന സുഹൃത്തിനെ വഴിയിലുപേക്ഷിച്ച് ഓടി രക്ഷപ്പെട്ടത് തികഞ്ഞ ഭീരുത്വമാണെന്ന് (‘coward’s act’) ഡിറ്റക്ടീവ് ഇൻസ്പെക്ടർ ക്രെയ്ഗ് മക്ഇവോയ് (Craig McEvoy) പറഞ്ഞു. “ഇതൊരു പ്ലേസ്റ്റേഷൻ ഗെയിമല്ല, റീസെറ്റ് അമർത്തി വീണ്ടും തുടങ്ങാൻ,” അദ്ദേഹം മാധ്യമങ്ങളോട് പ്രതികരിച്ചു. വിക്ടോറിയയിൽ വർദ്ധിച്ചുവരുന്ന യുവജനങ്ങളുടെ കുറ്റകൃത്യങ്ങളും (Youth crime) നിയമലംഘനങ്ങളും ഓസ്‌ട്രേലിയൻ ജനതയ്ക്ക്, പ്രത്യേകിച്ച് മലയാളി സമൂഹമുൾപ്പെടെയുള്ള പ്രവാസികൾക്ക് വലിയ ആശങ്കയാണ് നൽകുന്നത് എന്ന് ഈ സംഭവം വീണ്ടും ഓർമ്മിപ്പിക്കുന്നു.

Screenshots credit: ABC News