ടെൽസ്ട്രയിൽ വീണ്ടും വൻ തൊഴിൽ വെട്ടിക്കുറയ്ക്കൽ; ഇന്ത്യൻ കമ്പനിയുമായി കൈകോർക്കുന്നു?
മെൽബൺ: ഓസ്ട്രേലിയൻ ടെലികോം ഭീമനായ ടെൽസ്ട്രയിൽ (Telstra) വീണ്ടും വൻ അഴിച്ചുപണി. ഏകദേശം 650-ഓളം ജീവനക്കാരെ ബാധിക്കുന്ന തൊഴിൽ വെട്ടിക്കുറയ്ക്കൽ നടപടികളാണ് കമ്പനി പ്രഖ്യാപിച്ചിരിക്കുന്നത്. ഇന്ത്യൻ ഐടി കമ്പനിയായ ഇൻഫോസിസുമായി സഹകരിച്ച് പ്രവർത്തിക്കാനുള്ള തന്ത്രപരമായ നീക്കത്തിന്റെ ഭാഗമായാണ് ഈ നടപടിയെന്ന് മാധ്യമങ്ങൾ റിപ്പോർട്ട് ചെയ്യുന്നു.
എന്റർപ്രൈസ് ഉപഭോക്താക്കൾക്കുള്ള സേവനങ്ങൾ കാര്യക്ഷമമാക്കുന്നതിനായി ഇൻഫോസിസുമായി അഞ്ച് വർഷത്തെ കരാറിലാണ് ടെൽസ്ട്ര ഏർപ്പെട്ടിരിക്കുന്നത്. ഇതിന്റെ ഭാഗമായി നിലവിലുള്ള 442 തസ്തികകൾ ഇല്ലാതാകും. ഈ ജോലികൾ ഇനി മുതൽ ഇൻഫോസിസിലൂടെയാകും നടപ്പിലാക്കുക. കൂടാതെ, അക്കെൻചറുമായി (Accenture) ചേർന്നുള്ള ഡാറ്റ ആൻഡ് എഐ (Data & AI) വിഭാഗത്തിൽ നിന്ന് 209 തസ്തികകളും വെട്ടിക്കുറയ്ക്കും.
എഐ (Artificial Intelligence) സാങ്കേതികവിദ്യയുടെ കടന്നുവരവും ചില ജോലികൾ ഇന്ത്യയിലേക്ക് മാറ്റുന്നതുമാണ് പുതിയ തീരുമാനങ്ങൾക്ക് പിന്നിലെന്ന് റിപ്പോർട്ടുകൾ സൂചിപ്പിക്കുന്നു. എന്നാൽ, എഐ കാരണം നേരിട്ട് ആർക്കും ജോലി നഷ്ടപ്പെടുന്നില്ലെന്നും, പ്രവർത്തനക്ഷമത വർദ്ധിപ്പിക്കാനാണ് ഈ മാറ്റങ്ങളെന്നുമാണ് സിഇഒ വിക്കി ബ്രാഡി ജീവനക്കാരെ അറിയിച്ചത്.
ജോലി നഷ്ടപ്പെടുന്ന ജീവനക്കാർക്ക് ഇൻഫോസിസിലെ ഒഴിവുകളിലേക്ക് അപേക്ഷിക്കാൻ അവസരമുണ്ടാകും. ഇതിന് താല്പര്യമില്ലാത്തവർക്ക് റിഡൻഡൻസി പാക്കേജുകൾ (Redundancy Packages) സ്വീകരിച്ച് പടിയിറങ്ങാം.
കഴിഞ്ഞ കുറച്ചു വർഷങ്ങളായി ടെൽസ്ട്രയിൽ തുടർച്ചയായി തൊഴിൽ വെട്ടിക്കുറയ്ക്കൽ നടക്കുന്നുണ്ട്. 2025-ൽ 550 പേർക്കും അതിനുമുമ്പ് 2,800 പേർക്കും ജോലി നഷ്ടമായിരുന്നു. പ്രാദേശികമായ തൊഴിൽ നൈപുണ്യത്തെ തകർക്കുന്നതാണ് ടെൽസ്ട്രയുടെ നടപടിയെന്ന് യൂണിയനുകൾ വിമർശിച്ചു.
