ഗൂഗിൾ മാപ്പ് നോക്കി യാത്ര; കാർ ഒഴുക്കിൽപ്പെട്ടു
ബൗലിയ (Queensland): ഗൂഗിൾ മാപ്പ് നോക്കി യാത്ര ചെയ്ത വിക്ടോറിയൻ സ്വദേശികളായ അച്ഛനും മകളും ക്വീൻസ്‌ലാൻഡിലെ വെള്ളപ്പൊക്കത്തിൽ നിന്ന് അത്ഭുതകരമായി രക്ഷപ്പെട്ടു. കാർ ഒഴുക്കിൽപ്പെട്ടതിനെ തുടർന്ന് ഇരുവരും നീന്തി കരകയറുകയും, ഫോൺ റേഞ്ച് ലഭിക്കുന്നതിനായി 13 കിലോമീറ്ററോളം നടക്കുകയും ചെയ്തു.
വിക്ടോറിയയിൽ നിന്നുള്ള 40 വയസ്സുകാരനായ അച്ഛനും 18 വയസ്സുള്ള മകളും ഡാർവിനിൽ നിന്ന് വീട്ടിലേക്ക് മടങ്ങുകയായിരുന്നു. ക്വീൻസ്‌ലാൻഡിലെ മൗണ്ട് ഐസയ്ക്ക് (Mount Isa) തെക്ക് ബൗലിയക്ക് (Boulia) സമീപം ക്ലോൺകറി-ഡച്ചസ് (Cloncurry-Duchess) റോഡിലെ കോസ്‌വേ മുറിച്ചുകടക്കാൻ ശ്രമിക്കുമ്പോഴാണ് വാഹനം ഒഴുക്കിൽപ്പെട്ടത്.
കാർ വെള്ളത്തിൽ മുങ്ങിയതോടെ ഇരുവരും വിൻഡോ വഴി പുറത്തിറങ്ങി നീന്തി രക്ഷപ്പെട്ടു. പിന്നീട് സഹായത്തിനായി ഫോൺ വിളിക്കാൻ റേഞ്ച് കിട്ടുന്ന സ്ഥലമെത്തുന്നത് വരെ 13 കിലോമീറ്ററോളം ഇവർക്ക് നടക്കേണ്ടി വന്നു. വൈകുന്നേരം 6 മണിയോടെയാണ് ഇവർ രക്ഷാപ്രവർത്തകരെ വിവരമറിയിച്ചത്.
ഗൂഗിൾ മാപ്പിൽ റോഡ് തുറന്നിരിക്കുന്നതായാണ് കാണിച്ചിരുന്നതെന്ന് ഇവർ പോലീസിനോട് പറഞ്ഞു. എന്നാൽ ഗതാഗത വകുപ്പ് (Department of Transport) ഈ റോഡ് നേരത്തെ തന്നെ അടച്ചിരുന്നു. ഔദ്യോഗിക റോഡ് വിവരങ്ങൾക്കായി ഗൂഗിൾ മാപ്പിനെ മാത്രം ആശ്രയിക്കരുതെന്ന് പോലീസ് മുന്നറിയിപ്പ് നൽകി.
ഇവർ സുരക്ഷിതരാണെങ്കിലും കാറും അതിലുണ്ടായിരുന്ന സാധനങ്ങളും പൂർണ്ണമായും നഷ്ടപ്പെട്ടു. ഹെലികോപ്റ്റർ ഉപയോഗിച്ച് നടത്തിയ പരിശോധനയിൽ കാർ വെള്ളത്തിൽ മുങ്ങിയ നിലയിൽ കണ്ടെത്തി.
വെള്ളപ്പൊക്കമുള്ള റോഡുകളിലൂടെ വാഹനം ഓടിക്കരുതെന്നും, ഔദ്യോഗിക നിർദ്ദേശങ്ങൾ പാലിക്കണമെന്നും ആക്ടിംഗ് സൂപ്രണ്ട് പോൾ ഓസ്റ്റിൻ അഭ്യർത്ഥിച്ചു. ബോക്സിംഗ് ഡേ മുതൽ വടക്കൻ ക്വീൻസ്‌ലാൻഡിൽ കനത്ത മഴ തുടരുകയാണ്.
Photo: Queensland Police Department
