സൗത്ത് ഓസ്ട്രേലിയ തിരഞ്ഞെടുപ്പ് 2026: ലേബർ പാർട്ടിക്ക് ചരിത്ര വിജയം; പീറ്റർ മലിനൗസ്കസ് വീണ്ടും പ്രീമിയർ 

സൗത്ത് ഓസ്ട്രേലിയൻ രാഷ്ട്രീയത്തിൽ ചരിത്രം കുറിച്ച് ലേബർ പാർട്ടിയുടെ വമ്പൻ തിരിച്ചുവരവ്. ഇന്ന്  നടന്ന സംസ്ഥാന തിരഞ്ഞെടുപ്പിൽ പോളിങ് അവസാനിച്ച് വെറും രണ്ട് മണിക്കൂറിനുള്ളിൽ തന്നെ ലേബർ സർക്കാരിന്റെ ഭരണത്തുടർച്ച ഉറപ്പായി. പ്രീമിയർ പീറ്റർ മലിനൗസ്കസിന്റെ (Peter Malinauskas) നേതൃത്വത്തിൽ ലേബർ പാർട്ടി തുടർച്ചയായ രണ്ടാം തവണയും വൻ ഭൂരിപക്ഷത്തോടെയാണ് അധികാരത്തിലേറുന്നത്.

എബിസി ന്യൂസിന്റെ (ABC News) ചീഫ് ഇലക്ഷൻ അനലിസ്റ്റ് കേസി ബ്രിഗ്സ് ഉൾപ്പെടെയുള്ള പ്രമുഖ മാധ്യമങ്ങൾ ലേബറിന്റെ ചരിത്രവിജയം ഇതിനോടകം പ്രഖ്യാപിച്ചു കഴിഞ്ഞു. 2022-ലെ വിജയത്തിന് ശേഷം മലിനൗസ്കസ് സർക്കാരിന് ജനങ്ങൾ നൽകിയ വലിയൊരു അംഗീകാരമായാണ് ഈ ഫലം വിലയിരുത്തപ്പെടുന്നത്.

തിരഞ്ഞെടുപ്പ് ഫലം ഒറ്റനോട്ടത്തിൽ

ലോവർ ഹൗസിലെ 47 സീറ്റുകളിൽ കേവല ഭൂരിപക്ഷത്തിന് 24 സീറ്റുകൾ വേണ്ട സ്ഥാനത്ത്, ലേബർ പാർട്ടി 29 സീറ്റുകൾ വരെ നേടുമെന്നാണ് പ്രാരംഭ റിപ്പോർട്ടുകൾ സൂചിപ്പിക്കുന്നത് (മുൻപ് ഇത് 27 ആയിരുന്നു).

ലേബർ മുന്നേറ്റം: പ്രാരംഭ വോട്ടെണ്ണലിൽ (ഏകദേശം 17% വോട്ടുകൾ എണ്ണിയപ്പോൾ) ലേബറിന്റെ പ്രൈമറി വോട്ട് 37.9% ആണ്. ടു-പാർട്ടി പ്രിഫെറൻസിൽ ഇത് 58.9% വരെ ഉയർന്നിട്ടുണ്ട്.

ലിബറൽ പാർട്ടിയുടെ തകർച്ച: പ്രധാന പ്രതിപക്ഷമായ ലിബറൽ പാർട്ടിയുടെ പ്രൈമറി വോട്ട് കേവലം 18.6 ശതമാനത്തിലേക്ക് കൂപ്പുകുത്തി. നിലവിലുണ്ടായിരുന്ന 13 സീറ്റുകളിൽ നിന്ന് അവർ 10-ലോ അതിൽ താഴെയോ ആയി ചുരുങ്ങാനാണ് സാധ്യത.

വൺ നേഷന്റെ അപ്രതീക്ഷിത കുതിപ്പ്: കോറി ബെർണാഡിയുടെ (Cory Bernardi) നേതൃത്വത്തിൽ സംസ്ഥാനത്ത് മത്സരിച്ച വൺ നേഷൻ പാർട്ടി 20.8% പ്രൈമറി വോട്ടുകൾ നേടി ലിബറലുകളെ പലയിടത്തും പിന്നിലാക്കി വലിയ സർപ്രൈസ് സൃഷ്ടിച്ചു.

അഡലെയ്ഡ് മെട്രോയിലെ ലേബർ തരംഗവും റീജണൽ മേഖലകളിലെ മാറ്റങ്ങളും

ഈ തിരഞ്ഞെടുപ്പിലെ ഏറ്റവും ശ്രദ്ധേയമായ കാര്യം വോട്ടിങ് പാറ്റേണിലെ വലിയ വ്യത്യാസമാണ്. അഡലെയ്ഡ് മെട്രോപൊളിറ്റൻ ഏരിയകളിൽ ലേബർ പാർട്ടിക്ക് 45 ശതമാനത്തിന് മുകളിൽ പ്രൈമറി വോട്ട് ലഭിച്ചു. മലിനൗസ്കസിന്റെ സ്വന്തം സീറ്റായ ക്രോയ്ഡണിൽ (Croydon) 24.8% മാർജിനിലാണ് അദ്ദേഹം ലീഡ് ചെയ്യുന്നത്.

എന്നാൽ യോർക്ക് പെനിൻസുല, റിവർലാൻഡ്, മുറേ ബ്രിഡ്ജ് തുടങ്ങിയ റീജണൽ മേഖലകളിൽ ചിത്രം മാറിമറിഞ്ഞു. ഇവിടെ വൺ നേഷൻ 22-23% വരെ വോട്ട് നേടി ലിബറലുകളെ (18%) പിന്നിലാക്കി. എബിസി അനലിസ്റ്റ് കേസി ബ്രിഗ്സ് ഇതിനെ വിശേഷിപ്പിച്ചത് ഒരു “പൊളിറ്റിക്കൽ ഭൂകമ്പം” എന്നാണ്. പ്രതിപക്ഷ നേതാവായ ആഷ്ടൺ ഹേണിന്റെ (Ashton Hurn) സ്വന്തം സീറ്റായ ഷൂബെർട്ടിൽ പോലും ലിബറൽ പ്രൈമറി വോട്ടുകളിൽ 10% ഇടിവുണ്ടായപ്പോൾ, വൺ നേഷൻ അവിടെ 19% വോട്ടുകൾ പിടിച്ചു. ചാഫി, നറുങ്ഗ, ഹാമണ്ട് തുടങ്ങിയ സീറ്റുകളിലും വൺ നേഷൻ ശക്തമായ മുന്നേറ്റം നടത്തി.

എങ്കിലും ഓസ്ട്രേലിയയിലെ പ്രിഫറൻസ് വോട്ടിങ് രീതി കാരണം ലോവർ ഹൗസിൽ സീറ്റുകൾ നേടാൻ വൺ നേഷന് കഴിഞ്ഞേക്കില്ല. 7ന്യൂസ് അനലിസ്റ്റ് ഹ്യൂ വിറ്റ്ഫെൽഡ് ഈ പ്രതിഭാസത്തെ “റെഡ് സീറ്റ് പവർബാൾ വൈപ്പ് ഔട്ട്” എന്നാണ് വിശേഷിപ്പിച്ചത്.

ലേബർ പാർട്ടിയുടെ പ്രതികരണം: “അഹങ്കാരമില്ല, മാറ്റത്തിന്റെ നേതാവ്”

വൻ വിജയത്തിലും അഹങ്കാരമില്ലാതെ, ജനങ്ങൾ നൽകിയ ഉത്തരവാദിത്തം നിറവേറ്റുമെന്നാണ് ലേബർ ക്യാമ്പിന്റെ പ്രതികരണം. ലേബർ ട്രഷറർ ടോം കൗട്സാന്റോണിസിന്റെ വാക്കുകൾ ശ്രദ്ധേയമാണ്:

“പീറ്റർ ഒരു ജനറേഷനിൽ ഒരിക്കൽ മാത്രം ലഭിക്കുന്ന നേതാവാണ്… അദ്ദേഹം ലേബർ പാർട്ടിയെ പൂർണമായി മാറ്റിപ്പണിതു. അഹങ്കാരം കാണിച്ചാൽ സൗത്ത് ഓസ്ട്രേലിയൻ ജനങ്ങൾ നമ്മളെ ശിക്ഷിക്കും.”

ഭവന നിർമ്മാണം (Housing പ്രതിസന്ധി പരിഹരിക്കൽ), സൗജന്യ പൊതുവിദ്യാഭ്യാസം, കുട്ടികളുടെ സ്ക്രീൻ ടൈം കുറയ്ക്കൽ തുടങ്ങിയ നയങ്ങളിൽ മലിനൗസ്കസിന്റെ പുതിയ സർക്കാർ കൂടുതൽ ശ്രദ്ധ കേന്ദ്രീകരിക്കുമെന്നാണ് പ്രതീക്ഷിക്കുന്നത്.