മെൽബണിൽ യാത്രക്കാരിയെ പീഡിപ്പിച്ച റൈഡ്‌ഷെയർ ഡ്രൈവർക്ക് ജാമ്യമില്ല
മെൽബൺ: റൈഡ്‌ഷെയർ (Rideshare) യാത്രകൾ സ്ത്രീകളെ സംബന്ധിച്ചിടത്തോളം എത്രത്തോളം അപകടകരമായി മാറുന്നു എന്നതിന്റെ ഞെട്ടിക്കുന്ന ഉദാഹരണമാണ് മെൽബണിൽ നിന്നും റിപ്പോർട്ട് ചെയ്യപ്പെടുന്നത്. കോളിംഗ്വുഡിൽ വെച്ച് യാത്രക്കാരിയെ കാറിനുള്ളിൽ പൂട്ടിയിട്ട് ക്രൂരമായി ബലാത്സംഗം ചെയ്ത കേസിൽ, തോൺബറി സ്വദേശിയായ ഡ്രൈവർ മുഹമ്മദ് അബൂക്കറിന് (44) കോടതി ജാമ്യം നിഷേധിച്ചു.
സംഭവം ഇങ്ങനെ: ജനുവരി 25-ന് പുലർച്ചെ 5 മണിക്കാണ് കേസിനാസ്പദമായ സംഭവം. മെൽബണിലെ പ്രശസ്തമായ പീൽ ഹോട്ടലിന് (Peel Hotel) സമീപത്ത് നിന്നും സൗത്ത് യാരയിലേക്ക് പോകാനാണ് 23-കാരിയായ യുവതി ഇയാളുടെ ടാക്സി ബുക്ക് ചെയ്തത്. എന്നാൽ യാത്രയ്ക്കിടെ കോളിംഗ്വുഡിൽ വെച്ച് വാഹനം ഒതുക്കി നിർത്തിയ ഇയാൾ, പിൻസീറ്റിലെത്തി യുവതിയെ ബലാത്സംഗം ചെയ്യുകയായിരുന്നു. ഭയന്നുവിറച്ച യുവതിയുടെ മൊഴിയുടെ അടിസ്ഥാനത്തിലാണ് പോലീസ് ഇയാളെ കസ്റ്റഡിയിലെടുത്തത്.
ഇരയെത്തേടി നഗരം ചുറ്റി: ഇതൊരു പെട്ടെന്നുണ്ടായ സംഭവമല്ലെന്നും, പ്രതി മുൻകൂട്ടി ആസൂത്രണം ചെയ്തതാണെന്നും പോലീസ് കോടതിയിൽ വാദിച്ചു. പുലർച്ചെ ക്ലബ്ബുകളിൽ നിന്നും ബാറുകളിൽ നിന്നും മടങ്ങുന്ന സ്ത്രീകളെ ലക്ഷ്യമിട്ട് ഇയാൾ പീൽ ഹോട്ടൽ പരിസരത്ത് കറങ്ങിനടക്കുന്നതിന്റെ (Doing laps) സിസിടിവി ദൃശ്യങ്ങൾ പോലീസ് ശേഖരിച്ചിട്ടുണ്ട്. ഇരയെ കിട്ടാൻ തക്കം പാർത്തിരുന്ന ഒരു ‘വേട്ടക്കാരനെപ്പോലെയാണ്’ (Predator) ഇയാൾ പെരുമാറിയതെന്ന് പ്രോസിക്യൂഷൻ ചൂണ്ടിക്കാട്ടി.
മുൻപും സമാന ആരോപണം: ഇതാദ്യമായല്ല മുഹമ്മദ് അബൂക്കർ ഇത്തരം ആരോപണങ്ങൾ നേരിടുന്നത്. 2022-ലും സമാനമായ രീതിയിൽ ഒരു ലൈംഗികാതിക്രമ ആരോപണം ഇയാൾക്കെതിരെ ഉയർന്നിരുന്നു. അന്ന് ഇരയായ വ്യക്തി കേസ് നടപടികളുമായി മുന്നോട്ട് പോകാതിരുന്നതിനാലാണ് ഇയാൾ നിയമനടപടികളിൽ നിന്നും രക്ഷപ്പെട്ടതും, വീണ്ടും റൈഡ്‌ഷെയർ ഡ്രൈവറായി തുടർന്നതും.
ഇന്ന് കോടതിയിൽ ഹാജരാക്കിയ പ്രതിയെ ജൂൺ 12 വരെ റിമാൻഡ് ചെയ്തു. ഡിജിറ്റൽ തെളിവുകളും ഫോൺ ലൊക്കേഷൻ വിവരങ്ങളും ഇയാൾക്കെതിരെയുള്ള കുരുക്ക് മുറുക്കിയിട്ടുണ്ട്.
