പൊലീസ് ഉദ്യോഗസ്ഥർ എന്ന വ്യാജേന വൻ ക്രിപ്‌റ്റോകറൻസി തട്ടിപ്പ്; ജാഗ്രത പാലിക്കാൻ മുന്നറിയിപ്പ്
കാൻബറ: ഓസ്‌ട്രേലിയൻ ഫെഡറൽ പോലീസ് (AFP) ഉദ്യോഗസ്ഥർ എന്ന പേരിൽ ഫോൺ വിളിച്ച് ക്രിപ്‌റ്റോകറൻസി തട്ടിയെടുക്കുന്ന സംഘത്തിനെതിരെ അധികൃതർ ജാഗ്രതാ നിർദ്ദേശം പുറപ്പെടുവിച്ചു. എഎഫ്‌പിയുടെ യഥാർത്ഥ ദൗത്യമായ ‘ഓപ്പറേഷൻ ഫയർസ്റ്റോം’ (Operation Firestorm) എന്ന പേര് ദുരുപയോഗം ചെയ്താണ് തട്ടിപ്പ് നടക്കുന്നത്.
തട്ടിപ്പിന്റെ രീതി: ഇരയുടെ പേരിൽ തട്ടിപ്പുകാർ തന്നെ വ്യാജമായി ഒരു ‘റിപ്പോർട്ട് സൈബർ’ (ReportCyber) പരാതി രജിസ്റ്റർ ചെയ്യും. തുടർന്ന്, പോലീസ് ഉദ്യോഗസ്ഥരാണെന്ന് പറഞ്ഞ് ഇരയെ ഫോണിൽ വിളിക്കുകയും, നിങ്ങളുടെ വിവരങ്ങൾ ചോർന്നിട്ടുണ്ടെന്നും (Data Breach) അക്കൗണ്ട് സുരക്ഷിതമാക്കാൻ ക്രിപ്‌റ്റോകറൻസി കൈമാറണമെന്നും ആവശ്യപ്പെടും. ‘ഡിറ്റക്റ്റീവ് സാർജന്റ് ടിം ഹൊവാർഡ്’ എന്ന പേരോ, മറ്റ് മുതിർന്ന പോലീസ് ഉദ്യോഗസ്ഥരുടെ പേരുകളോ ആണ് ഇവർ ഉപയോഗിക്കുന്നത്.
ശ്രദ്ധിക്കുക:
തട്ടിപ്പുകാർ ഫോണിലൂടെയും ഇമെയിലിലൂടെയും വളരെ പെട്ടെന്ന് പ്രതികരിക്കാൻ ആവശ്യപ്പെടും.
ഇത്തരം കോളുകൾ വന്നാൽ ഉടൻ തന്നെ വിച്ഛേദിക്കുക.
യാതൊരു കാരണവശാലും പണമോ, അക്കൗണ്ട് വിവരങ്ങളോ, സീഡ് ഫ്രേസുകളോ (Seed Phrases) കൈമാറരുത്.
തട്ടിപ്പുകാർ വ്യാജ പരാതികൾ രജിസ്റ്റർ ചെയ്യുന്നത് തടയാൻ ‘റിപ്പോർട്ട് സൈബറിൽ’ ഒടിപി (OTP) സംവിധാനം ഏർപ്പെടുത്തിയിട്ടുണ്ട്. ഈ ഒടിപി ആരുമായും പങ്കുവെക്കരുത്.
തട്ടിപ്പിന് ഇരയായാൽ ഉടൻ തന്നെ ‘റിപ്പോർട്ട് സൈബറിൽ’ (ReportCyber) വിവരം അറിയിക്കണമെന്നും പോലീസ് അഭ്യർത്ഥിച്ചു.
