ഖമേനി അനുശോചനം: ഭീകരവാദത്തെ പിന്തുണയ്ക്കുന്നതിന് തുല്യമെന്ന് ; മോസ്ക്കുകൾക്കെതിരെ ക്രിമിനൽ അന്വേഷണം വേണമെന്നാവശ്യവും ഉയരുന്നു
ഇറാൻ പരമോന്നത നേതാവ് ആയത്തുള്ള അലി ഖമേനി യുഎസ്-ഇസ്രായേൽ വ്യോമാക്രമണത്തിൽ കൊല്ലപ്പെട്ടതിന് പിന്നാലെ ഓസ്ട്രേലിയയിൽ കടുത്ത പ്രതിഷേധങ്ങളും ചേരിതിരിവും രൂക്ഷമാകുന്നു. ഖമേനിയുടെ മരണത്തിൽ സിഡ്നി, മെൽബൺ, ബ്രിസ്ബേൻ എന്നിവിടങ്ങളിലെ ചില ഷിയാ മോസ്ക്കുകളും ഇസ്ലാമിക് സെന്ററുകളും ദുഃഖാചരണം പ്രഖ്യാപിച്ചതാണ് പുതിയ വിവാദങ്ങൾക്ക് തിരികൊളുത്തിയിരിക്കുന്നത്. ഇതിനെതിരെ ഓസ്ട്രേലിയയിലെ ജൂത സമൂഹവും വിവിധ രാഷ്ട്രീയ നേതാക്കളും രംഗത്തെത്തി. ഭീകരവാദത്തെ പിന്തുണയ്ക്കുന്നതിന് തുല്യമാണ് ഈ നടപടിയെന്ന് ചൂണ്ടിക്കാട്ടി ഇത്തരം കേന്ദ്രങ്ങൾക്കെതിരെ ക്രിമിനൽ അന്വേഷണം നടത്തണമെന്നാണ് രാജ്യത്ത് ഇപ്പോൾ പ്രധാനമായും ഉയരുന്ന ആവശ്യം.
ഖമേനി കൊല്ലപ്പെട്ടതിന് പിന്നാലെയാണ് അൽ സഹ്ര മോസ്ക്ക് (സിഡ്നി), എൽ സഹ്ര ഇസ്ലാമിക് കമ്യൂണിറ്റി സെന്റർ (മെൽബൺ), സൈനാബിയ ഇസ്ലാമിക് സെന്റർ (ബ്രിസ്ബേൻ) തുടങ്ങിയ ചുരുക്കം ചില സ്ഥാപനങ്ങൾ അദ്ദേഹത്തെ ‘രക്തസാക്ഷി’ (Martyr) ആയി പ്രഖ്യാപിച്ച് മൂന്ന് ദിവസത്തെ ദുഃഖാചരണം സംഘടിപ്പിച്ചത്. എന്നാൽ, ഓസ്ട്രേലിയയിലുള്ള വലിയ ഇറാനിയൻ പ്രവാസി സമൂഹം ഈ നടപടിയെ ഒന്നടങ്കം തള്ളിക്കളയുകയും രൂക്ഷമായി വിമർശിക്കുകയും ചെയ്താതായി റിപ്പോർട്ടുകൾ പറയുന്നു.
35 വർഷത്തോളം ഇറാനിൽ കടുത്ത മനുഷ്യാവകാശ ലംഘനങ്ങൾ നടത്തിയ ഒരു ഭരണാധികാരിയുടെ മരണം സിഡ്നിയിലെ ഹൈഡ് പാർക്കിൽ ആയിരക്കണക്കിന് ആളുകൾ ഒത്തുകൂടി ആഘോഷിച്ചപ്പോൾ, അദ്ദേഹത്തെ ആദരിക്കുന്നത് ‘ഹിറ്റ്ലറെ ദുഃഖിച്ച് പ്രാർത്ഥിക്കുന്നതിന്’ തുല്യമാണെന്നാണ് അവർ പ്രതികരിച്ചത്.
ശക്തമായ എതിർപ്പുമായി നേതാക്കളും ജൂത സമൂഹവും
ന്യൂ സൗത്ത് വെയിൽസ് (NSW) പ്രീമിയർ ക്രിസ് മിൻസ് ഈ ദുഃഖാചരണങ്ങളെ “ഭയാനകം” (Atrocious) എന്നാണ് വിശേഷിപ്പിച്ചത്. ഇറാനിലെ ഇസ്ലാമിക് റെവല്യൂഷണറി ഗാർഡ് കോർപ്സിനെ (IRGC) ഓസ്ട്രേലിയ ഒരു ഭീകര സംഘടനയായി പ്രഖ്യാപിച്ചിട്ടുള്ളതിനാൽ, അവരുടെ പരമോന്നത നേതാവിനെ ആദരിക്കുന്നത് നിയമവിരുദ്ധമാണെന്ന് എക്സിക്യൂട്ടീവ് കൗൺസിൽ ഓഫ് ഓസ്ട്രേലിയൻ ജൂവ്രി (ECAJ) കോ-സി.ഇ.ഒ അലക്സ് റൈവ്ചിൻ വ്യക്തമാക്കി.
ഭീകരവാദികളെ മഹത്വവൽക്കരിക്കാൻ അനുവദിക്കരുതെന്നും, ഇത്തരം മെമ്മോറിയലുകളിൽ പങ്കെടുക്കുന്നവരെ നിരീക്ഷിക്കണമെന്നും അദ്ദേഹം ആവശ്യപ്പെട്ടു. ഹോം അഫയേഴ്സ് മന്ത്രി ടോണി ബർക്കും ഇത്തരം നീക്കങ്ങളെ അന്വേഷണ ഏജൻസികൾ കർശനമായി നിരീക്ഷിക്കുമെന്ന് മുന്നറിയിപ്പ് നൽകിയിട്ടുണ്ട്.
സുരക്ഷാ ആശങ്കകളും നിയമപരമായ നടപടികളും
ഈ സംഭവം ഓസ്ട്രേലിയയുടെ ദേശീയ സുരക്ഷയെയും സാംസ്കാരിക ഐക്യത്തെയും (Multicultural fabric) സാരമായി ബാധിക്കുമെന്ന ആശങ്ക ശക്തമാണ്.
ക്രിമിനൽ അന്വേഷണം: ഭീകര സംഘടനയായി ലിസ്റ്റ് ചെയ്യപ്പെട്ടിട്ടുള്ള ഐ.ആർ.ജി.സി-യെ (IRGC) പിന്തുണയ്ക്കുന്നതിന് തുല്യമായതിനാൽ, ഓസ്ട്രേലിയൻ ക്രിമിനൽ കോഡ് പ്രകാരം പരിപാടികൾ സംഘടിപ്പിച്ചവർക്കെതിരെ അന്വേഷണം വേണമെന്ന ആവശ്യം ശക്തമാണ്. നികുതിപ്പണം ലഭിക്കുന്ന സ്ഥാപനങ്ങളാണെങ്കിൽ അന്വേഷണം കൂടുതൽ കർശനമാകും.
ASIO നിരീക്ഷണം: രാജ്യ സുരക്ഷയെ മുൻനിർത്തി, ഇത്തരം അനുശോചന യോഗങ്ങളിൽ പങ്കെടുക്കുന്നവരെ രഹസ്യാന്വേഷണ ഏജൻസിയായ ASIO-യുടെ നിരീക്ഷണ പട്ടികയിൽ (Watchlist) ഉൾപ്പെടുത്താൻ ഫാമിലി ഫസ്റ്റ് പാർട്ടിയുൾപ്പെടെയുള്ളവർ ആവശ്യപ്പെടുന്നു.
വിസ റദ്ദാക്കൽ: പരിപാടികളിൽ പങ്കെടുത്ത, ഓസ്ട്രേലിയൻ പൗരത്വമില്ലാത്തവരുടെ വിസ റദ്ദാക്കുന്നത് ഉൾപ്പെടെയുള്ള നടപടികൾ സർക്കാരിന്റെ പരിഗണനയിലുണ്ടെന്ന റിപ്പോർട്ടുകളും വരുന്നുണ്ട്.
ഓസ്ട്രേലിയയിലെ ഈ ചെറിയ ഷിയാ വിഭാഗങ്ങൾ ഇറാനിയൻ എംബസിയുടെയോ ഐ.ആർ.ജി.സി-യുടെയോ സമ്മർദ്ദത്തിന് വഴങ്ങിയാകാം ഇത്തരം പരിപാടികൾ സംഘടിപ്പിക്കുന്നതെന്ന് ഡീക്കിൻ യൂണിവേഴ്സിറ്റിയിലെ പ്രൊഫസറായ ഗ്രെഗ് ബാർട്ടൺ ചൂണ്ടിക്കാട്ടുന്നു.
ഭരണഘടനാപരമായ മതസ്വാതന്ത്ര്യം സംരക്ഷിക്കപ്പെടുമ്പോഴും അത് ഭീകരവാദത്തെ ന്യായീകരിക്കാൻ ഉപയോഗിക്കരുതെന്ന ശക്തമായ സന്ദേശമാണ് അധികാരികൾ നൽകുന്നത്.
അതെസമയം, ഖമേനിയുടെ അനുശോചനം സംബന്ധിച്ച് ഓസ്ട്രേലിയയുടെ പല ഭാഗത്തു നിന്നും ഇത്തരം ആവശ്യങ്ങൾ ഉയരുന്നുണ്ടെങ്കിലും സർക്കാരിന്റെ ഭാഗത്തു നിന്നും ഇത് സംബന്ധിച്ച് ഇതുവരെയും ഔദ്യോഗികമായി ഒരു അറിയിപ്പും വന്നിട്ടില്ലെന്നാണ് റിപ്പോർട്ടുകൾ സൂചിപ്പിക്കുന്നത്.
