രാജ്യത്തെ തൊഴിലില്ലായ്മ സ്ഥിവിവരകണക്കുകൾ പുറത്തുവിട്ടു സർക്കാർ
- ഫെബ്രുവരിയിലെ തൊഴിലില്ലായ്മ നിരക്ക് 4.3 ശതമാനമായി ഉയർന്നു.
- പുതിയതായി ജോലി ലഭിച്ചത് 48,900 പേർക്ക്; ആകെ തൊഴിലുള്ളവർ 1.47 കോടി കടന്ന് സർവ്വകാല റെക്കോർഡിൽ.
- ജീവിതച്ചെലവ് കുറയ്ക്കാൻ രണ്ട് ഘട്ടങ്ങളിലായി നികുതി ഇളവുകൾ നൽകുമെന്ന് ട്രഷറർ ജിം ചാമർസ്.
കാൻബെറ: ആഗോള തലത്തിലുള്ള സാമ്പത്തിക വെല്ലുവിളികൾക്കിടയിലും ഓസ്ട്രേലിയൻ തൊഴിൽ മേഖല ശക്തമായി തുടരുന്നു. ഓസ്ട്രേലിയൻ ബ്യൂറോ ഓഫ് സ്റ്റാറ്റിസ്റ്റിക്സ് (ABS) ഇന്ന് പുറത്തുവിട്ട ഏറ്റവും പുതിയ കണക്കുകൾ പ്രകാരം, ഫെബ്രുവരിയിലെ തൊഴിലില്ലായ്മ നിരക്ക് (Unemployment rate) നേരിയ തോതിൽ വർദ്ധിച്ച് 4.3 ശതമാനത്തിലെത്തി. തൊഴിലില്ലായ്മ നിരക്കിൽ വർദ്ധനവ് ഉണ്ടായിട്ടുണ്ടെങ്കിലും ചരിത്രപരമായ കണക്കുകൾ പരിശോധിക്കുമ്പോൾ ഇത് വളരെ കുറഞ്ഞ നിരക്കാണെന്നാണ് സർക്കാർ വിലയിരുത്തുന്നത്.
തൊഴിലില്ലായ്മ നിരക്ക് ഉയർന്നുവെങ്കിലും, പുതിയ തൊഴിലവസരങ്ങൾ സൃഷ്ടിക്കപ്പെടുന്നതിൽ രാജ്യം വലിയ മുന്നേറ്റമാണ് ഉണ്ടാക്കിയിരിക്കുന്നത്. ഫെബ്രുവരിയിൽ മാത്രം 48,900 പേർക്കാണ് പുതുതായി ജോലി ലഭിച്ചത്. ഇതോടെ രാജ്യത്ത് ആകെ തൊഴിലുള്ളവരുടെ എണ്ണം 14,748,700 എന്ന സർവ്വകാല റെക്കോർഡിലെത്തി. കഴിഞ്ഞ വർഷത്തെ അപേക്ഷിച്ച് നോക്കുമ്പോൾ നിലവിൽ 264,700 ഓസ്ട്രേലിയക്കാർക്ക് കൂടി അധികമായി തൊഴിൽ ലഭിച്ചിട്ടുണ്ട്.
തൊഴിൽ പങ്കാളിത്ത നിരക്കിലും (Participation rate) 0.2 ശതമാനത്തിന്റെ വർദ്ധനവ് ഉണ്ടായിട്ടുണ്ട്. കൂടുതൽ ആളുകൾ തൊഴിൽ മേഖലയിലേക്ക് കടന്നുവരികയോ സജീവമായി ജോലി അന്വേഷിക്കുകയോ ചെയ്യുന്നു എന്നാണ് ഈ കണക്കുകൾ വ്യക്തമാക്കുന്നത്.
വെല്ലുവിളികളെ നേരിടാൻ ഓസ്ട്രേലിയ സജ്ജം
തൊഴിൽ മേഖലയിലെ ഈ കണക്കുകൾ സർക്കാരിന്റെ മികച്ച നേട്ടമായാണ് തൊഴിൽ വകുപ്പ് മന്ത്രി അമാൻഡ റിഷ്വർത്തും (Amanda Rishworth) ട്രഷറർ ജിം ചാമർസും (Jim Chalmers) ചൂണ്ടിക്കാട്ടുന്നത്.
ആഗോളതലത്തിലുള്ള വലിയ അനിശ്ചിതത്വങ്ങൾക്കിടയിലും ഓസ്ട്രേലിയയുടെ സാമ്പത്തിക അടിത്തറ ശക്തമാണെന്ന് മന്ത്രി അമാൻഡ റിഷ്വർത്ത് വ്യക്തമാക്കി. “രാജ്യത്ത് ജോലി ചെയ്യുന്ന സ്ത്രീകളുടെ എണ്ണത്തിലും റെക്കോർഡ് വർദ്ധനവാണുള്ളത്. കുടുംബങ്ങൾക്കും സമൂഹത്തിനും സമ്പദ്വ്യവസ്ഥയ്ക്കും ഇത് വലിയ മുതൽക്കൂട്ടാണ്. കൂടുതൽ തൊഴിലവസരങ്ങൾ സൃഷ്ടിക്കാനും വേതനം വർദ്ധിപ്പിക്കാനും സർക്കാർ തുടർന്നും പ്രവർത്തിക്കും,” അവർ കൂട്ടിച്ചേർത്തു.
നികുതി ഇളവുകൾ വരുന്നു
മിഡിൽ ഈസ്റ്റിലെ സംഘർഷങ്ങൾ ഉൾപ്പെടെയുള്ള ആഗോള പ്രതിസന്ധികളുടെ പ്രത്യാഘാതങ്ങളെ നേരിടാൻ രാജ്യത്തെ സജ്ജമാക്കുന്നത് ഈ ശക്തമായ തൊഴിൽ നിരക്കാണെന്ന് ട്രഷറർ ജിം ചാമർസ് അഭിപ്രായപ്പെട്ടു. നിലവിലെ സർക്കാർ അധികാരത്തിൽ വന്നതിന് ശേഷം 1.2 ദശലക്ഷം തൊഴിലവസരങ്ങളാണ് രാജ്യത്ത് സൃഷ്ടിക്കപ്പെട്ടത്. ഇതിൽ ഭൂരിഭാഗവും മുഴുവൻ സമയ (Full-time) ജോലികളാണ്. നാലിൽ മൂന്ന് ഭാഗവും പ്രൈവറ്റ് സെക്ടറിലാണ് ലഭിച്ചിരിക്കുന്നത്.
“സമ്പദ്വ്യവസ്ഥയിൽ നാം വലിയ പുരോഗതി കൈവരിച്ചിട്ടുണ്ടെങ്കിലും, ജനങ്ങൾ ഇപ്പോഴും സാമ്പത്തിക സമ്മർദ്ദങ്ങൾ നേരിടുന്നുണ്ടെന്ന് സർക്കാരിനറിയാം. അതുകൊണ്ടാണ് ജനങ്ങളുടെ ജീവിതച്ചെലവ് (Cost of living) കുറയ്ക്കുന്നതിന് സർക്കാർ മുൻഗണന നൽകുന്നത്. ഇതിന്റെ ഭാഗമായി ഈ വർഷവും അടുത്ത വർഷവുമായി രണ്ട് ഘട്ടങ്ങളിലായി നികുതി ഇളവുകൾ (Tax cuts) നടപ്പിലാക്കും. പണപ്പെരുപ്പം നിയന്ത്രിക്കുക, ഉൽപ്പാദനക്ഷമത വർദ്ധിപ്പിക്കുക എന്നിവയ്ക്കാണ് ഈ വർഷം സർക്കാർ പ്രാധാന്യം നൽകുന്നത്,” ട്രഷറർ വ്യക്തമാക്കി.
