21 മാസം പ്രായമുള്ള കുട്ടിയുടെ മരണം: ആശുപത്രിക്ക് ഗുരുതര വീഴ്ച സംഭവിച്ചതായി കൊറോണറുടെ കണ്ടെത്തൽ

പെർത്ത്: പെർത്തിലെ തിരക്കേറിയ ആശുപത്രിയിൽ ചികിത്സയിലിരിക്കെ 21 മാസം പ്രായമുള്ള കൊച്ചുകുട്ടി മരിച്ച സംഭവം, കൃത്യസമയത്ത് ചികിത്സ നൽകിയിരുന്നെങ്കിൽ ഒഴിവാക്കാവുന്നതായിരുന്നുവെന്ന് കൊറോണറുടെ കണ്ടെത്തൽ. 2024 മാർച്ചിൽ പെർത്തിലെ ജൂണ്ടലപ്പ് ഹെൽത്ത് ക്യാമ്പസിൽ (Joondalup Health Campus) വെച്ചാണ് സാൻഡിപൻ ധാർ എന്ന കുട്ടി അക്യൂട്ട് ലിംഫോബ്ലാസ്റ്റിക് ലുക്കീമിയ (acute lymphoblastic leukaemia) ബാധിച്ച് മരിച്ചത്. ഡോക്ടർമാരുടെ ഭാഗത്തുനിന്നുണ്ടായ ഗുരുതരമായ അനാസ്ഥയാണ് ഈ ദാരുണ സംഭവത്തിലേക്ക് നയിച്ചതെന്ന് ഡെപ്യൂട്ടി സ്റ്റേറ്റ് കോറോണർ സാറാ ലിന്റൺ (Sarah Linton) നടത്തിയ അന്വേഷണത്തിൽ വ്യക്തമായി.

രക്ഷിതാക്കളുടെ അപേക്ഷകൾ അവഗണിച്ചു 

കുട്ടിക്ക് തുടർച്ചയായി പനി അനുഭവപ്പെട്ടതിനെ തുടർന്ന് മാതാപിതാക്കളായ സഞ്ജോയിയും സരസ്വതിയും നിരവധി തവണ ആരോഗ്യവിദഗ്ധരെ സമീപിച്ചിരുന്നു. പനിയുടെ യഥാർത്ഥ കാരണം കണ്ടെത്താൻ കുട്ടിയുടെ രക്തപരിശോധന നടത്തണമെന്ന് അവർ 2024 മാർച്ച് 22-ന് ജൂണ്ടലപ്പ് ആശുപത്രിയിലെ ഡോക്ടർമാരോട് ആവർത്തിച്ച് ആവശ്യപ്പെട്ടിട്ടും അധികൃതർ അത് നിരസിക്കുകയാണ് ചെയ്തത്. 

പകരം കുട്ടിയുടെ മൂത്രപരിശോധന നടത്താനാണ് ഡോക്ടർമാർ നിർദ്ദേശിച്ചത്. കുട്ടിക്ക് മറ്റ് കുഴപ്പങ്ങളൊന്നുമില്ലെന്നും സുഖമായിരിക്കുന്നുവെന്നും പറഞ്ഞ് ഡോക്ടർമാർ അവരെ വീട്ടിലേക്ക് തിരിച്ചയക്കുകയും ചെയ്തു. എന്നാൽ പിന്നീട് കുട്ടിയുടെ നില വഷളാവുകയും, മാർച്ച് 24-ന് ആശുപത്രിയിൽ വെച്ച് തന്നെ മരണപ്പെടുകയുമായിരുന്നു.

മാതാപിതാക്കളായ  സരസ്വതിയും സഞ്ജോയിയും ..Photo credit : ABC News

രക്തപരിശോധന നടത്തിയിരുന്നെങ്കിൽ ജീവൻ രക്ഷിക്കാമായിരുന്നു 

കുട്ടിയുടെ മരണശേഷം നടത്തിയ പരിശോധനകളിലാണ് ലുക്കീമിയ (രക്താർബുദം) ആയിരുന്നു മരണകാരണമെന്ന് കണ്ടെത്തിയത്. മാർച്ച് 22-ന് മാതാപിതാക്കൾ ആവശ്യപ്പെട്ടതുപോലെ ഒരു ലളിതമായ രക്തപരിശോധന നടത്തിയിരുന്നെങ്കിൽ കുട്ടിയുടെ രോഗം അന്ന് തന്നെ കണ്ടെത്താനും, മികച്ച ചികിത്സ നൽകി ജീവൻ രക്ഷിക്കാനും സാധിക്കുമായിരുന്നുവെന്ന് കോറോണറുടെ റിപ്പോർട്ടിൽ പറയുന്നു. ഒരു തിരക്കേറിയ ആരോഗ്യ കേന്ദ്രത്തിന്റെ പരിമിതികൾക്കിടയിലും, രക്ഷിതാക്കളുടെ ആവർത്തിച്ചുള്ള അപേക്ഷകൾ ഗൗരവമായി എടുക്കാതിരുന്നതാണ് ഈ ദുരന്തത്തിന് കാരണമായത്.

ആരോഗ്യ മേഖലയ്ക്കുള്ള മുന്നറിയിപ്പ് 

ആശുപത്രിയുടെ ഭാഗത്തുനിന്നുണ്ടായ ആഭ്യന്തര അന്വേഷണത്തിൽ (SAC-1) രക്തപരിശോധന നടത്താതിരുന്ന ഡോക്ടർമാരുടെ നടപടിയെ ന്യായീകരിക്കുന്ന നിലപാടാണ് എടുത്തിരുന്നത്. ഇതിനെതിരെ രക്ഷിതാക്കൾ ശക്തമായി രംഗത്തുവരികയും തങ്ങൾക്ക് നീതി ലഭിച്ചില്ലെന്ന് വ്യക്തമാക്കുകയും ചെയ്തതോടെയാണ് കോറോണൽ അന്വേഷണം (coronial inquest) ആരംഭിച്ചത്.

ഈ റിപ്പോർട്ട് പെർത്തിലെ ആരോഗ്യ സംവിധാനത്തിന്റെ പ്രവർത്തനരീതിയിലെ ചില ദൗർബല്യങ്ങളിലേക്കാണ് വിരൽ ചൂണ്ടുന്നത്. തിരക്കേറിയ ഹോസ്പിറ്റലുകളിൽ രക്ഷിതാക്കളുടെ ആശങ്കകൾക്ക് മതിയായ ശ്രദ്ധ ലഭിക്കാത്ത സാഹചര്യങ്ങൾ ഒഴിവാക്കാൻ നടപടികൾ സ്വീകരിക്കേണ്ടതുണ്ട്. പ്രത്യേകിച്ച് ശിശുക്കളുടെ ചികിത്സയിൽ, രക്ഷിതാക്കളുടെ നിരീക്ഷണങ്ങളും ആവശ്യങ്ങളും കൂടുതൽ ഗൗരവത്തോടെ പരിഗണിക്കണമെന്നും, സമാനമായ സംഭവങ്ങൾ ഭാവിയിൽ ആവർത്തിക്കാതിരിക്കാൻ ആരോഗ്യ വകുപ്പ് കർശന നടപടികൾ സ്വീകരിക്കണമെന്നും ഈ സംഭവം ഓർമ്മിപ്പിക്കുന്നു.

Sajin Thiruvallam
News Editor