ഓസ്ട്രേലിയൻ വിസ നിയമങ്ങൾ കൂടുതൽ കർശനമാക്കുമെന്ന് ; പ്രതിപക്ഷത്തിന്റെ പുതിയ കുടിയേറ്റ നയം പുറത്തിറക്കി

ഓസ്ട്രേലിയയിലെ കുടിയേറ്റ സംവിധാനത്തിൽ അടിമുടി മാറ്റങ്ങൾ ലക്ഷ്യമിട്ട് പ്രതിപക്ഷ സഖ്യം (Coalition) തങ്ങളുടെ സമഗ്രമായ കുടിയേറ്റ നയം പ്രഖ്യാപിച്ചു. ‘ഓസ്‌ട്രേലിയൻ വാല്യൂസ് മൈഗ്രേഷൻ പ്ലാൻ’ (Australian Values Migration Plan) എന്ന് പേരിട്ടിരിക്കുന്ന ഈ പദ്ധതിയുടെ ആദ്യഘട്ട പ്രഖ്യാപനമാണ് ഇന്ന് നടന്നത്. നിലവിലെ ലേബർ സർക്കാരിന്റെ കാലത്ത് കുടിയേറ്റ നിരക്ക് നിയന്ത്രണാതീതമായി വർദ്ധിച്ചെന്നും, പുതിയ പദ്ധതിയിലൂടെ കുടിയേറ്റക്കാരുടെ എണ്ണം കുറയ്ക്കുകയും മാനദണ്ഡങ്ങൾ കർശനമാക്കുകയും ചെയ്യുമെന്നും പ്രതിപക്ഷ നേതാവ് ആംഗസ് ടെയ്‌ലറും (Angus Taylor), ഷാഡോ ഇമിഗ്രേഷൻ മന്ത്രി ജോണോ ഡുനിയാമും (Jonno Duniam) സംയുക്ത പ്രസ്താവനയിൽ വ്യക്തമാക്കി.

രാജ്യത്തിന്റെ താല്പര്യങ്ങൾക്കും ഓസ്ട്രേലിയൻ മൂല്യങ്ങൾക്കും മുൻഗണന നൽകുന്ന മൂന്ന് പ്രധാന നടപടികളാണ് ആദ്യഘട്ടത്തിൽ ഉൾപ്പെടുത്തിയിരിക്കുന്നത്:

ഓസ്ട്രേലിയൻ മൂല്യങ്ങൾക്ക് മുൻഗണന (Putting Australian Values First)

കുടിയേറ്റ നിയമങ്ങളുടെ അടിസ്ഥാനം ഓസ്ട്രേലിയൻ മൂല്യങ്ങളായിരിക്കും. ഇതിനായി 1994-ലെ കുടിയേറ്റ നിയമത്തിൽ മാറ്റങ്ങൾ വരുത്തും.

വിസ ലഭിക്കുന്നതിന് ‘ഓസ്ട്രേലിയൻ വാല്യൂസ് സ്റ്റേറ്റ്മെന്റ്’ (Australian Values Statement) അംഗീകരിക്കുക എന്നത് നിർബന്ധിതമാക്കും.

ഈ മൂല്യങ്ങൾ പാലിക്കുന്നതിൽ പരാജയപ്പെടുന്നവരുടെ വിസ റദ്ദാക്കുകയോ നിഷേധിക്കുകയോ ചെയ്യും.

മൂല്യങ്ങൾ ലംഘിക്കുന്നത് മൈഗ്രേഷൻ ആക്ട് പ്രകാരമുള്ള ‘ക്യാരക്ടർ ടെസ്റ്റിലെ’ (Character Test) പരാജയമായി കണക്കാക്കി രാജ്യത്ത് നിന്ന് നാടുകടത്തും.

പെർമനന്റ് വിസ (സ്ഥിരതാമസ വിസ) അപേക്ഷകളിൽ, അപേക്ഷകർക്ക് ഓസ്ട്രേലിയൻ മൂല്യങ്ങളുമായുള്ള പൊരുത്തം പരിശോധിക്കുകയും അതിന് മുൻഗണന നൽകുകയും ചെയ്യും.

ഭവന നിർമ്മാണ സഹായങ്ങളിൽ ഓസ്ട്രേലിയൻ പൗരന്മാർക്ക് മുൻഗണന നൽകും. വിദേശ പൗരന്മാർക്ക് സാമൂഹിക സുരക്ഷാ ആനുകൂല്യങ്ങൾ ലഭിക്കുന്നതിനുള്ള കാത്തിരിപ്പ് സമയം നീട്ടും.

കുടിയേറ്റ നിയമങ്ങളുടെ ദുരുപയോഗം തടയൽ (Shutting the Door to System Abuse)

വ്യാജ രേഖകൾ ചമച്ചും മറ്റും രാജ്യത്തേക്ക് കടക്കുന്നത് തടയാൻ കർശന നടപടികൾ സ്വീകരിക്കും.

വ്യാജ അഭയാർത്ഥി അപേക്ഷകൾ വേഗത്തിൽ തള്ളിക്കളയുന്നതിനായി ‘സുരക്ഷിതമായ രാജ്യങ്ങളുടെ പട്ടിക’ (Safe Country List) തയ്യാറാക്കും.

നിയമവിരുദ്ധമായി എത്തുന്നവർക്ക് നൽകിയിരുന്ന താൽക്കാലിക സംരക്ഷണ വിസകൾ (TPV), സേഫ് ഹെവൻ എന്റർപ്രൈസ് വിസകൾ (SHEV) എന്നിവ പ്രധാന ഓൺഷോർ പ്രൊട്ടക്ഷൻ വിസകളായി പുനഃസ്ഥാപിക്കും.

നിയമപരമായ കാലാവധി കഴിഞ്ഞിട്ടും രാജ്യത്ത് തുടരുന്ന വിദേശികളെ കണ്ടെത്താനും നാടുകടത്താനും നിയമപാലകർക്ക് കൂടുതൽ ഫണ്ട് അനുവദിക്കും.

തീവ്രവാദികളെയും കുറ്റവാളികളെയും തടയുക (Show a Red Light to Radicals)

രാജ്യ സുരക്ഷയ്ക്ക് ഭീഷണിയായവർ കടന്നുവരുന്നത് തടയാൻ പരിശോധനകൾ കർശനമാക്കും.

ആഭ്യന്തര വകുപ്പിന് കീഴിൽ പ്രത്യേക സ്ക്രീനിംഗ് കോർഡിനേഷൻ സെന്റർ (Enhanced Screening Coordination Centre) രൂപീകരിക്കും. ഇതിന്റെ ഭാഗമായി വിസ അപേക്ഷകരുടെ സോഷ്യൽ മീഡിയ അക്കൗണ്ടുകൾ പരിശോധിക്കുന്നത് ഒരു സ്റ്റാൻഡേർഡ് നടപടിയാക്കി മാറ്റും.

ASIO, ഫെഡറൽ പോലീസ് (AFP), ബോർഡർ ഫോഴ്‌സ് എന്നിവയെ സംയോജിപ്പിച്ച് ഇന്റലിജൻസ് പരിശോധനകൾ ശക്തമാക്കും.

രാജ്യത്തിന് ഭീഷണിയായ വ്യക്തികളെ വേഗത്തിൽ കണ്ടെത്താനും തടയാനുമായി തത്സമയ വിസ പരിശോധനകൾ (Real-time visa vetting) ഏർപ്പെടുത്തും.

“ഓസ്ട്രേലിയയിൽ ജീവിക്കുക എന്നത് ഒരു അവകാശമല്ല, മറിച്ച് അതൊരു പദവിയാണെന്ന്” ഷാഡോ ഇമിഗ്രേഷൻ മന്ത്രി ജോണോ ഡുനിയാം പ്രതികരിച്ചു. രാജ്യത്തിന്റെ അതിർത്തികൾ സുരക്ഷിതമാക്കാനും തകർന്നടിഞ്ഞ കുടിയേറ്റ സംവിധാനത്തെ നേർവഴിയിലാക്കാനും ഈ നയങ്ങൾ സഹായിക്കുമെന്നും പ്രതിപക്ഷം അവകാശപ്പെട്ടു. വരും ദിവസങ്ങളിൽ പദ്ധതിയുടെ കൂടുതൽ വിവരങ്ങൾ പുറത്തുവിടുമെന്നും സഖ്യം വ്യക്തമാക്കിയിട്ടുണ്ട്.

Sajin Thiruvallam
News Editor