ഇന്ധന വിതരണം ഉറപ്പാക്കാൻ ഓസ്ട്രേലിയ: നാലിലൊന്ന് ഇന്ധനം വരുന്നത് ഇവിടെ ഇന്നും , അതുകൊണ്ടാണ് ഞാൻ ഇവിടെയുള്ളത് : പ്രധാനമന്ത്രി

സിംഗപ്പൂർ: ആഗോളതലത്തിൽ നിലനിൽക്കുന്ന അനിശ്ചിതത്വങ്ങൾക്കിടയിലും ഓസ്ട്രേലിയയിലെ ഇന്ധന വിതരണം സുരക്ഷിതമാക്കുന്നതിന്റെ ഭാഗമായി പ്രധാനമന്ത്രി ആൻ്റണി  അൽബനീസീ  സിംഗപ്പൂരിലെത്തി. രാജ്യത്തിന് ആവശ്യമായ ഇന്ധനത്തിന്റെ ഗണ്യമായ പങ്ക് ലഭ്യമാക്കുന്ന സിംഗപ്പൂരിലെ റിഫൈനറികളും ഊർജ കേന്ദ്രങ്ങളും അദ്ദേഹം നേരിട്ട് സന്ദർശിച്ച് വിലയിരുത്തി. അന്താരാഷ്ട്ര പങ്കാളികളുമായി സഹകരിച്ച് ഓസ്ട്രേലിയയിലേക്കുള്ള ഇന്ധന പ്രവാഹം തടസ്സമില്ലാതെ നിലനിർത്താനാണ് സർക്കാർ മുൻഗണന നൽകുന്നതെന്ന് അദ്ദേഹം വ്യക്തമാക്കി.

ഊർജ കേന്ദ്രങ്ങളിലെ സന്ദർശനം

ഔദ്യോഗിക സന്ദർശനത്തിന്റെ ഭാഗമായി ജൂറോംഗ് ഐലൻഡിലെ (Jurong Island) സിംഗപ്പൂർ എൽഎൻജി ടെർമിനലിലും (SLNG) മറ്റ് പ്രമുഖ റിഫൈനറികളിലുമാണ് പ്രധാനമന്ത്രി സന്ദർശനം നടത്തിയത്. സുരക്ഷാ ക്രമീകരണങ്ങളോടെ വ്യവസായ സമുച്ചയങ്ങൾ സന്ദർശിക്കുന്നതിന്റെയും തൊഴിലാളികളുമായി ആശയവിനിമയം നടത്തുന്നതിന്റെയും ചിത്രങ്ങൾ അദ്ദേഹം സമൂഹമാധ്യമങ്ങളിൽ പങ്കുവെച്ചിട്ടുണ്ട്. ഓസ്ട്രേലിയയുടെ ഊർജ ആവശ്യങ്ങൾ നിറവേറ്റുന്നതിൽ സിംഗപ്പൂരിനുള്ള നിർണായക സ്ഥാനം ഈ സന്ദർശനം അടിവരയിടുന്നു.

അയൽരാജ്യങ്ങളുമായുള്ള ബന്ധം പ്രധാനം

ഇന്ന് തന്റെ എക്സ് (X) അക്കൗണ്ടിലൂടെ പ്രധാനമന്ത്രി അൽബനീസീ  സന്ദർശനത്തിന്റെ ലക്ഷ്യം വ്യക്തമാക്കി: “ഓസ്ട്രേലിയയിലെ ഇന്ധനത്തിന്റെ ഒരു നാലിലൊന്ന് വരുന്നത് സിംഗപ്പൂരിലെ റിഫൈനറികളിൽ നിന്നാണ്. അതുകൊണ്ടാണ് ഞാൻ ഇവിടെയുള്ളത്. ഓസ്ട്രേലിയക്കാർക്ക് ഇന്ധനം കൃത്യമായി ലഭ്യമാക്കാൻ അന്താരാഷ്ട്ര പങ്കാളികളുമായി പ്രവർത്തിക്കുകയാണ് ഞങ്ങൾ. ലോകം കടുത്ത അനിശ്ചിതത്വങ്ങളിലൂടെ കടന്നുപോകുമ്പോൾ, അയൽരാജ്യങ്ങളുമായുള്ള നമ്മുടെ ശക്തമായ ബന്ധങ്ങൾ എന്നത്തേക്കാളും പ്രധാനമാണ്.”

പശ്ചാത്തലവും ആശങ്കകളും

മിഡിൽ ഈസ്റ്റിലെ സംഘർഷങ്ങളെ തുടർന്ന് ഹോർമുസ് കടലിടുക്കിലൂടെയുള്ള (Strait of Hormuz) എണ്ണ ഗതാഗതം തടസ്സപ്പെടാൻ സാധ്യതയുണ്ടെന്ന ആശങ്കകൾക്കിടയിലാണ് ഈ നയതന്ത്ര സന്ദർശനം. ശുദ്ധീകരിച്ച പെട്രോളിയം ഉൽപ്പന്നങ്ങൾക്കായി ഓസ്ട്രേലിയ പ്രധാനമായും സിംഗപ്പൂർ പോലെയുള്ള ഏഷ്യൻ റിഫൈനറി ഹബ്ബുകളെയാണ് ആശ്രയിക്കുന്നത്. രാജ്യത്തിന്റെ ഇന്ധന ആവശ്യത്തിന്റെ ഇത്ര വലിയൊരു ശതമാനം ഒരൊറ്റ രാജ്യത്തെ ആശ്രയിച്ചിരിക്കുന്നത് ഊർജ സുരക്ഷയിൽ ഉണ്ടാക്കാവുന്ന വെല്ലുവിളികളും ഈ വേളയിൽ ചർച്ചയാകുന്നുണ്ട്.

എങ്കിലും, കുറഞ്ഞത് ജൂൺ മാസം വരെ ഓസ്ട്രേലിയയിൽ നിലവിൽ ഇന്ധനക്ഷാമം ഉണ്ടാകില്ലെന്നാണ് ഔദ്യോഗിക വിലയിരുത്തൽ. ഭാവിയിലെ ആവശ്യങ്ങൾക്കായി ദീർഘകാലാടിസ്ഥാനത്തിൽ വിതരണ സുരക്ഷ ഉറപ്പാക്കുക എന്ന ലക്ഷ്യത്തോടെയാണ് ഏപ്രിൽ 9 മുതൽ 11 വരെയുള്ള ഈ ഔദ്യോഗിക യാത്ര. 

സിംഗപ്പൂർ സന്ദർശന വേളയിൽ പ്രധാനമന്ത്രി ലോറൻസ് വോങുമായും (Lawrence Wong) അദ്ദേഹം കൂടിക്കാഴ്ച നടത്തുമെന്നാണ് പ്രതീക്ഷിക്കുന്നത്. ഊർജ വിപണിയിലെ ചാഞ്ചാട്ടങ്ങളെ നേരിടാൻ സുസ്ഥിരമായ അന്താരാഷ്ട്ര സഹകരണമാണ് പരിഹാരമെന്ന് പ്രധാനമന്ത്രിയുടെ ഈ നീക്കം വ്യക്തമാക്കുന്നു.

Photos credit : Social Media

Sajin Thiruvallam
News Editor