ഓസ്ട്രേലിയൻ പിആർ കാത്തിരിക്കുന്നവർക്ക് ആശ്വാസം: Australia PR Updates 2026 പ്രഖ്യാപിച്ചു

ഓസ്ട്രേലിയയിൽ സ്ഥിരതാമസമാക്കാൻ ആഗ്രഹിക്കുന്ന ആയിരക്കണക്കിന് പ്രവാസികൾക്ക് ആശ്വാസമേകുന്നതാണ് പുതിയ Australia PR updates 2026. 2026-27 ലെ ഫെഡറൽ ബജറ്റിന്റെ ഭാഗമായി പ്രഖ്യാപിച്ച പെർമനന്റ് മൈഗ്രേഷൻ പ്രോഗ്രാമിൽ, നിലവിൽ രാജ്യത്തുള്ളവർക്ക് (ഓൺഷോർ അപേക്ഷകർ) വൻ മുൻഗണനയാണ് സർക്കാർ നൽകിയിരിക്കുന്നത്. എംപ്ലോയർ സ്പോൺസേർഡ് വിസകളിലെ റെക്കോർഡ് വർദ്ധനവ് വിദ്യാർത്ഥികൾക്കും താൽക്കാലിക വിസക്കാർക്കും പുതിയ പ്രതീക്ഷകൾ നൽകുന്നു. ഈ നിർണായക മാറ്റങ്ങൾ നിങ്ങളുടെ മൈഗ്രേഷൻ സാധ്യതകളെ എങ്ങനെ സ്വാധീനിക്കുമെന്ന് വിശദമായി പരിശോധിക്കാം.

ഓൺഷോർ അപേക്ഷകർക്ക് അനുകൂലമായി പുതിയ മൈഗ്രേഷൻ നയം

സിഡ്നി/മെൽബൺ: ഓസ്ട്രേലിയൻ സർക്കാർ പ്രഖ്യാപിച്ച 2026-27 പെർമനന്റ് മൈഗ്രേഷൻ പ്രോഗ്രാം വിദേശ വിദ്യാർത്ഥികൾക്കും താൽക്കാലിക വിസയിലുള്ളവർക്കും വലിയ ആശ്വാസം നൽകുന്നു. പ്രോഗ്രാമിലെ മൊത്തം സ്ഥാനങ്ങൾ (Quota ) 1,85,000 ആയി തന്നെ നിലനിർത്തിയെങ്കിലും, ഇതിൽ ഭൂരിഭാഗവും ഇതിനകം ഓസ്ട്രേലിയയിൽ താമസിക്കുന്നവർക്കായി (ഓൺഷോർ) മാറ്റിവെച്ചതാണ് ശ്രദ്ധേയം.

ഔദ്യോഗിക കണക്കുകൾ പ്രകാരം, സ്കിൽഡ്, ഫാമിലി സ്ട്രീമുകളിലായി 1,29,590 സ്ഥാനങ്ങളാണ് ഓൺഷോർ അപേക്ഷകർക്കായി നീക്കിവെച്ചിട്ടുള്ളത്. സ്പെഷ്യൽ എലിജിബിലിറ്റി സ്ട്രീമിന് 300 സ്ഥാനങ്ങളും നൽകിയിട്ടുണ്ട്. അതേസമയം, രാജ്യത്തിന് പുറത്തുള്ള (ഓഫ്‌ഷോർ) അപേക്ഷകർക്കായി 55,110 സ്ഥാനങ്ങൾ മാത്രമാണ് ബാക്കിയുള്ളത്. ഈ ഓഫ്‌ഷോർ ക്വാട്ട രാജ്യത്തിന്റെ ദീർഘകാല നൈപുണ്യ ആവശ്യങ്ങൾ നിറവേറ്റാൻ കഴിയുന്ന ഉയർന്ന യോഗ്യതയുള്ളവർക്ക് മാത്രമായി പരിമിതപ്പെടുത്തും.

വിസ സ്ട്രീമുകളിലെ പ്രധാന മാറ്റങ്ങൾ

പുതിയ സാമ്പത്തിക വർഷത്തിൽ സ്കിൽഡ് സ്ട്രീമിനാണ് ഏറ്റവും വലിയ പരിഗണന ലഭിച്ചിരിക്കുന്നത്. ആകെ സീറ്റുകളിൽ ഏകദേശം 71% (1,32,240 സ്ഥാനങ്ങൾ) സ്കിൽഡ് വിസകൾക്കായും, 28% (52,460 സ്ഥാനങ്ങൾ) ഫാമിലി വിസകൾക്കായും നീക്കിവെച്ചിരിക്കുന്നു.

വിവിധ വിസ കാറ്റഗറികളിലെ പ്രധാന മാറ്റങ്ങൾ താഴെ പറയുന്നവയാണ്:

Employer-Sponsored: 58,040 സ്ഥാനങ്ങൾ (മുൻവർഷത്തേക്കാൾ 14,040 എണ്ണത്തിന്റെ വർദ്ധനവ്).

State/Territory Nominated: 35,500 സ്ഥാനങ്ങൾ.

Skilled Independent: 21,090 സ്ഥാനങ്ങൾ.

Regional: 14,110 സ്ഥാനങ്ങൾ (കഴിഞ്ഞ വർഷത്തേക്കാൾ കുറവ്).

Talent and Innovation: 3,500 സ്ഥാനങ്ങൾ.

മലയാളി സമൂഹത്തിന് ഇത് എങ്ങനെ ഗുണം ചെയ്യും?

ഓസ്ട്രേലിയയിൽ നിലവിൽ ജോലി ചെയ്യുന്നവരെ വേഗത്തിൽ പെർമനന്റ് റസിഡൻസിയിലേക്ക് (PR) മാറ്റുക എന്നതാണ് ഈ ഓൺഷോർ ഷിഫ്റ്റിന് പിന്നിലെ പ്രധാന ലക്ഷ്യം. ഇത് നെറ്റ് ഓവർസീസ് മൈഗ്രേഷൻ (NOM) നിയന്ത്രിക്കാൻ സർക്കാരിനെ സഹായിക്കും.

ഈ മാറ്റങ്ങൾ 482 TSS / Skills in Demand വിസയിലുള്ളവർക്കും, പഠനം പൂർത്തിയാക്കി 485 Temporary Graduate വിസയിൽ തുടരുന്ന മലയാളി വിദ്യാർത്ഥികൾക്കും വലിയ പ്രയോജനം ചെയ്യും. എംപ്ലോയർ സ്പോൺസേർഡ് വഴികളിലെ വലിയ വർദ്ധനവ്, ജോലി ഓഫർ ഉള്ളവർക്ക് പിആർ ലഭിക്കാനുള്ള സാധ്യതകൾ എളുപ്പമാക്കുന്നു.

കൂടാതെ, മൈഗ്രേഷൻ പ്രക്രിയ കൂടുതൽ കാര്യക്ഷമമാക്കുന്നതിനായി വിദേശ യോഗ്യതകളുടെയും സ്കില്ലുകളുടെയും അംഗീകാരം വേഗത്തിലാക്കാൻ സർക്കാർ $85.2 മില്യൺ നിക്ഷേപവും പ്രഖ്യാപിച്ചിട്ടുണ്ട്. ഉൽപ്പാദനക്ഷമത ഉറപ്പാക്കുന്നതിനായി വരും മാസങ്ങളിൽ പെർമനന്റ് മൈഗ്രേഷൻ പോയിന്റ്‌സ് ടെസ്റ്റിലും മാറ്റങ്ങൾ പ്രതീക്ഷിക്കാം.

NB : ഈ വർഷം ഓസ്ട്രേലിയൻ സർക്കാർ ആകെ നൽകാൻ ഉദ്ദേശിക്കുന്ന 1,85,000 പിആർ വിസകളെ, വ്യത്യസ്ത ആവശ്യങ്ങൾക്കായി (തൊഴിലുടമകൾ സ്പോൺസർ ചെയ്യുന്നവർക്ക്, സംസ്ഥാനങ്ങൾ നിർദ്ദേശിക്കുന്നവർക്ക് എന്നിങ്ങനെ) തരംതിരിച്ചു നൽകിയിരിക്കുന്ന വിസ വിഹിതത്തെയാണ് ഇവിടെ ‘സ്ഥാനങ്ങൾ’ എന്ന് വിശേഷിപ്പിക്കുന്നത്. (കൂടുതൽ വിവരങ്ങൾക്ക് വിസ അപേക്ഷകൾക്കുമായി ഒരു MARA-registered migration agent-നെ സമീപിക്കുക.)

Sajin Thiruvallam
News Editor