ഓസ്‌ട്രേലിയയിലെ സോഷ്യൽ മീഡിയ ഉപയോഗത്തിൽ വമ്പൻ മാറ്റങ്ങൾ വരുന്നു

ഓസ്‌ട്രേലിയയിലെ ഓൺലൈൻ സുരക്ഷാ നിയമങ്ങളിൽ വൻ മാറ്റങ്ങൾക്ക് തുടക്കമിട്ട് പുതിയ ഡിജിറ്റൽ ഡ്യൂട്ടി ഓഫ് കെയർ (Digital Duty of Care) കരട് രൂപരേഖ സർക്കാർ പുറത്തുവിട്ടു. സോഷ്യൽ മീഡിയ ആപ്പുകൾ ഉപയോഗിക്കുന്ന രീതിയെ തന്നെ മാറ്റിമറിക്കാൻ പോകുന്ന വ്യവസ്ഥകളാണ് ഇതിലുള്ളത്. പ്രത്യേകിച്ച്, അനാവശ്യ കാര്യങ്ങൾ കാണിക്കുന്ന അൽഗോരിതങ്ങളെ നിയന്ത്രിക്കാൻ ഉപയോക്താക്കൾക്ക് കൂടുതൽ അധികാരം നൽകുന്നതാണ് പുതിയ നീക്കം. എന്നാൽ ഇത് ഉടനടി പ്രാബല്യത്തിൽ വരുമോ? വരാനിരിക്കുന്ന വലിയ മാറ്റങ്ങൾ എന്തൊക്കെയാണ്?

എന്താണ് ‘മൈ ഫീഡ്, മൈ വേ’?

പുതിയ മാറ്റങ്ങളിൽ ഏറ്റവും ശ്രദ്ധേയമാകുന്നത് “മൈ ഫീഡ്, മൈ വേ” (My Feed, My Way) എന്ന നിർദ്ദേശമാണ്. ഇന്ന്  പ്രധാനമന്ത്രി ആന്റണി ആൽബനീസീ  (Anthony Albanese), കമ്മ്യൂണിക്കേഷൻസ് മന്ത്രി അനിക വെൽസ് (Anika Wells) എന്നിവർ സംയുക്തമായാണ് ഈ കരട് നിർദ്ദേശം പ്രഖ്യാപിച്ചത്. ഇതുപ്രകാരം, ഉപയോക്താക്കൾക്ക് തങ്ങളുടെ ഫീഡിൽ എന്ത് കാണണം എന്ന് തീരുമാനിക്കാൻ കഴിയും.

സോഷ്യൽ മീഡിയ പ്ലാറ്റ്‌ഫോമുകൾ ഇനിമുതൽ 16 വയസ്സിന് മുകളിലുള്ളവർക്ക് അൽഗോരിതം ഫീഡ് വേണമോ (Opt-in) അതോ ഒഴിവാക്കണമോ (Opt-out) എന്ന് തെരഞ്ഞെടുക്കാൻ അവസരം നൽകേണ്ടി വരും. ഫോളോ ചെയ്യുന്ന സുഹൃത്തുക്കളുടെയും ക്രിയേറ്റർമാരുടെയും പോസ്റ്റുകൾ മാത്രം കാണാനുള്ള സൗകര്യമാണ് ഇതിലൂടെ ലഭിക്കുന്നത്.

സർക്കാർ നിയന്ത്രണം അടിച്ചേൽപ്പിക്കുകയല്ല, മറിച്ച് ജനങ്ങൾക്ക് കൂടുതൽ അധികാരം നൽകുകയാണ് ഇതിലൂടെ ലക്ഷ്യമിടുന്നതെന്ന് പ്രധാനമന്ത്രി വ്യക്തമാക്കി.

നിയമലംഘനങ്ങൾക്ക് വൻ പിഴ

സോഷ്യൽ മീഡിയ ആപ്പുകൾക്ക് പുറമെ ഗെയിമിംഗ്, എഐ ചാറ്റ്ബോട്ടുകൾ തുടങ്ങിയ മറ്റ് ഡിജിറ്റൽ സേവനങ്ങൾക്കും ഈ നിയമങ്ങൾ ബാധകമാകും. ഡ്യൂട്ടി ഓഫ് കെയർ വ്യവസ്ഥകൾ പാലിക്കുന്നതിൽ പരാജയപ്പെടുന്ന ടെക് കമ്പനികൾക്ക് $109.2 ദശലക്ഷം (109.2 Million Dollars) വരെ പരമാവധി പിഴ ഈടാക്കാനാണ് നിലവിലെ കരട് നിർദ്ദേശിക്കുന്നത്.

കുട്ടികളിൽ ഭക്ഷണക്രമ വൈകല്യങ്ങൾ (Eating disorders) ഉണ്ടാക്കുന്ന ഉള്ളടക്കങ്ങൾ, സ്ത്രീകളോടും ലിംഗസമത്വത്തോടും ശത്രുതാപരമായ ആശയങ്ങൾ പ്രചരിപ്പിക്കൽ തുടങ്ങിയവ തടയുന്നതിൽ പ്ലാറ്റ്‌ഫോമുകൾ മുൻകരുതൽ എടുക്കേണ്ടി വരും. നിയമം നടപ്പിലാക്കുന്നതിനും നടപടികൾ സ്വീകരിക്കുന്നതിനും ഇ-സേഫ്റ്റി കമ്മീഷണർക്ക് (eSafety Commissioner) കൂടുതൽ അധികാരങ്ങൾ നൽകുന്നതാണ് കരട് രേഖ.

എപ്പോഴാണ് ഇത് നിയമമാകുക?

ഇന്ന് പ്രഖ്യാപിച്ചത് ഒരു കരട് നിർദ്ദേശം (Draft) മാത്രമാണ്. ഇത് നിലവിൽ ഒരു നിയമമായി മാറിയിട്ടില്ല. ഡിജിറ്റൽ പ്ലാറ്റ്‌ഫോമുകൾ, വ്യവസായ പ്രതിനിധികൾ, സന്നദ്ധ സംഘടനകൾ എന്നിവരുമായുള്ള കൂടിയാലോചനകൾക്ക് ശേഷം, 2026 അവസാനത്തോടെ പാർലമെന്റിൽ ബിൽ അവതരിപ്പിക്കുമെന്നാണ് സർക്കാർ പറയുന്നത്.

അതേസമയം, പ്രതിപക്ഷമായ കോളിഷൻ (Coalition) ഈ നീക്കത്തിൽ സംശയം പ്രകടിപ്പിച്ചിട്ടുണ്ട്. ഇൻ്റർനെറ്റിലെ സംസാര സ്വാതന്ത്ര്യത്തെ നിയന്ത്രിക്കാനുള്ള നീക്കമാണിതെന്ന് പ്രതിപക്ഷ നേതാവ് ആംഗസ് ടെയ്‌ലർ (Angus Taylor) സെപ്റ്റംബർ 6-ന് നൽകിയ അഭിമുഖത്തിൽ ആരോപിച്ചിരുന്നു. എന്നാൽ ഇത് സെൻസർഷിപ്പ് അല്ല, മറിച്ച് സുരക്ഷ ഉറപ്പാക്കുന്ന സന്തുലിതമായ സമീപനമാണ് ഇതെന്ന് ട്രഷറർ വ്യക്തമാക്കി.

നിങ്ങളുടെ അഭിപ്രായം എന്താണ്?

സോഷ്യൽ മീഡിയ ഫീഡുകളിൽ നിന്നും അൽഗോരിതം ഒഴിവാക്കാനുള്ള ഈ പുതിയ തീരുമാനം മികച്ചൊരു ഓൺലൈൻ സുരക്ഷ ഉറപ്പാക്കാൻ സഹായിക്കുമെന്ന് നിങ്ങൾ കരുതുന്നുണ്ടോ? നിങ്ങളുടെ അഭിപ്രായങ്ങൾ പങ്കുവെക്കുക.

Sajin Thiruvallam
News Editor