ലേബലുകളിൽ വൻ തട്ടിപ്പ്: മഞ്ഞൾപ്പൊടി മുതൽ തക്കാളി പേസ്റ്റ് വരെ; അന്വേഷണം ആരംഭിച്ചു

admin ഓഗസ്റ്റ്‌ 7, 2026

ഓസ്‌ട്രേലിയയിലെ സൂപ്പർമാർക്കറ്റുകളിൽ വിൽക്കുന്ന ഭക്ഷ്യവസ്തുക്കളുടെ ലേബലുകളിലെ തട്ടിപ്പുകളെക്കുറിച്ച് ACCC Food Labelling Inquiry ഔദ്യോഗികമായി ആരംഭിച്ചു. എബിസി ഫോർ കോർണേഴ്‌സ് (ABC Four Corners) നടത്തിയ പുതിയ അന്വേഷണത്തിലാണ് ജനങ്ങളെ വഞ്ചിക്കുന്ന ഞെട്ടിക്കുന്ന വിവരങ്ങൾ പുറത്തുവന്നത്. എന്നാൽ, ഓസ്‌ട്രേലിയയിലെ മലയാളി കുടുംബങ്ങളെ നേരിട്ട് ബാധിക്കുന്ന മറ്റൊരു മാരകമായ കണ്ടെത്തൽ കൂടിയാണ് ഇപ്പോൾ പുറത്തുവന്നിരിക്കുന്നത്…

ലേബലുകളിലെ വൻ തട്ടിപ്പ്

ഉപഭോക്താക്കൾ പണം നൽകി വാങ്ങുന്ന ഉൽപ്പന്നങ്ങളിൽ കൃത്യമായ വിവരങ്ങൾ നൽകിയിരിക്കണം എന്ന് ACCC കമ്മീഷണർ ലൂക്ക് വുഡ്‌വാർഡ് (Luke Woodward) വ്യക്തമാക്കി. എട്ട് മാസത്തോളം നീണ്ട ഫോർ കോർണേഴ്‌സ് അന്വേഷണത്തിന്റെ ഭാഗമായി ‘സോഴ്‌സ് സെർട്ടൻ’ (Source Certain) എന്ന സ്വതന്ത്ര ലബോറട്ടറിയിൽ നടത്തിയ പരിശോധനയിലാണ് ഈ തട്ടിപ്പുകൾ കണ്ടെത്തിയത്.

ഓസ്‌ട്രേലിയൻ അല്ലെങ്കിൽ ഇറ്റാലിയൻ എന്ന് ലേബൽ ചെയ്തിരുന്ന ഡസൻ കണക്കിന് തക്കാളി പേസ്റ്റുകളിൽ ഉപയോഗിച്ചിരിക്കുന്നത് ചൈനയിൽ നിന്നുള്ള തക്കാളിയാണെന്ന് പരിശോധനയിൽ തെളിഞ്ഞു എന്ന് എബിസി ന്യൂസ് റിപ്പോർട്ട് ചെയ്യുന്നു. അതുപോലെ, ഓസ്‌ട്രേലിയൻ എന്ന് വിശ്വസിപ്പിച്ച് വിറ്റിരുന്ന ചില കടൽവിഭവങ്ങൾ വിയറ്റ്നാമിൽ നിന്നുള്ളതാണെന്നും കണ്ടെത്തിയിട്ടുണ്ട്.

സർക്കാർ നടപടികൾ ശക്തമാക്കുന്നു

തെറ്റായ ലേബലുകൾ നൽകി ഓസ്‌ട്രേലിയക്കാരെ വഞ്ചിക്കാൻ അനുവദിക്കില്ലെന്ന് അസിസ്റ്റന്റ് കോമ്പറ്റീഷൻ മന്ത്രി ആൻഡ്രൂ ലീ (Andrew Leigh) തന്റെ ഔദ്യോഗിക വാർത്താക്കുറിപ്പിൽ അറിയിച്ചു. ഉൽപ്പന്നങ്ങൾ കൃത്യമായി പരിശോധിക്കാൻ അതിർത്തികളിൽ കർശന നടപടികൾ ഇല്ലാത്തതാണ് ഇത്തരം തട്ടിപ്പുകൾക്ക് കാരണമാകുന്നതെന്ന് വിദഗ്ദ്ധർ ചൂണ്ടിക്കാണിക്കുന്നു.

തങ്ങളുടെ ഉൽപ്പന്നങ്ങളിൽ യാതൊരുവിധ മായവുമില്ലെന്നും, പരിശോധനാ ഫലങ്ങൾ തെറ്റാണെന്നും കോൾസ് (Coles), ആൽഡി (Aldi), ലെഗോസ് (Leggo’s) തുടങ്ങിയ കമ്പനികൾ പ്രതികരിച്ചതായി മാധ്യമങ്ങൾ റിപ്പോർട്ട് ചെയ്യുന്നു.

മലയാളികൾ ശ്രദ്ധിക്കേണ്ട മാരകമായ കണ്ടെത്തൽ

ഇന്ത്യൻ-മലയാളി കുടുംബങ്ങളിൽ നിത്യേന ഉപയോഗിക്കുന്ന മഞ്ഞൾപ്പൊടിയിലാണ് (Turmeric) ഏറ്റവും അപകടകരമായ കണ്ടെത്തൽ ഉണ്ടായിരിക്കുന്നത്. വിപണിയിലുള്ള പ്രമുഖ ബ്രാൻഡുകളുടെ മൂന്ന് മഞ്ഞൾപ്പൊടികളിൽ ക്യാൻസറിന് വരെ കാരണമായേക്കാവുന്ന ലെഡ് ക്രോമേറ്റ് (lead chromate), അയൺ ഓക്സൈഡ് എന്നിവയുടെ സാന്നിധ്യം ലബോറട്ടറി പരിശോധനയിൽ കണ്ടെത്തി.

കൂടുതൽ വില നൽകി നമ്മൾ വാങ്ങുന്ന പല പ്രീമിയം ബ്രാൻഡുകളും ഇത്തരത്തിൽ വ്യാജമാണെന്നത് പ്രവാസി സമൂഹത്തിൽ വലിയ ആശങ്കയാണ് ഉണ്ടാക്കിയിരിക്കുന്നത്.

നിങ്ങൾ വിശ്വസിച്ച് വാങ്ങുന്ന ബ്രാൻഡുകളുടെ ഗുണനിലവാരത്തെക്കുറിച്ച് ഇപ്പോൾ നിങ്ങൾക്ക് സംശയമുണ്ടോ? നിങ്ങളുടെ പ്രതികരണങ്ങൾ താഴെ പങ്കുവെക്കുക.

Photo : AM News

News by