ഓസ്‌ട്രേലിയൻ വിസയിൽ 9 ദിവസത്തെ ഗ്യാപ്പ്: ദമ്പതികൾക്ക് നാടുകടത്തൽ ഭീഷണി

ഗോൾഡ് കോസ്റ്റിൽ കഴിഞ്ഞ 12 വർഷമായി ജോലിയും കുടുംബവുമായി കഴിഞ്ഞിരുന്ന ദക്ഷിണാഫ്രിക്കൻ ദമ്പതികളോട് അടിയന്തരമായി രാജ്യം വിടാൻ നിർദ്ദേശിച്ചിരിക്കുകയാണ് ഓസ്‌ട്രേലിയൻ കുടിയേറ്റ വകുപ്പ് (Australia Visa Deportation News). 2023-ൽ വിസ പുതുക്കുന്നതിനിടയിൽ സംഭവിച്ച വെറും 9 ദിവസത്തെ കാലതാമസമാണ് ഇവരുടെ ജീവിതം മാറ്റിമറിച്ചത്. എന്നാൽ ഇതിന് പിന്നിലെ യഥാർത്ഥ കാരണം മറ്റൊന്നായിരുന്നു.

എന്താണ് ഗോൾഡ് കോസ്റ്റിൽ സംഭവിച്ചത്?

2015-ൽ സ്പോൺസേർഡ് വിസയിൽ ഓസ്‌ട്രേലിയയിലെത്തിയ റോറി ഹെവിറ്റ് (Rory Hewitt), ഭാര്യ മിഷേൽ എന്നിവർക്കാണ് ഈ ദുരവസ്ഥ നേരിടേണ്ടി വന്നത്. 2023-ൽ പുതിയ വിസയ്ക്ക് അപേക്ഷിച്ചപ്പോൾ ഇവരുടെ അപേക്ഷ ഡിപ്പാർട്ട്മെന്റ് ഓഫ് ഹോം അഫയേഴ്സിൽ പ്രോസസ്സ് ചെയ്യാൻ 9 ദിവസത്തെ കാലതാമസം എടുത്തിരുന്നു.

അന്ന് ആ ചെറിയ ഇടവേളയിൽ ഇവർ നിയമവിരുദ്ധമായി രാജ്യത്ത് തുടർന്നു എന്ന് ചൂണ്ടിക്കാട്ടിയാണ് ഇപ്പോൾ ഈ കടുത്ത നടപടി എടുത്തിരിക്കുന്നത് എന്ന് എ കറന്റ് അഫയർ (A Current Affair) റിപ്പോർട്ട് ചെയ്യുന്നു.

നാടുകടത്തൽ ഭീഷണിയും നിയമ പോരാട്ടവും

ഒക്ടോബർ 22-ന് മുൻപായി നിർബന്ധമായും രാജ്യം വിടണമെന്നാണ് ഇവർക്ക് നൽകിയിരിക്കുന്ന കർശന നിർദ്ദേശം. തങ്ങളുടെ ഭാഗത്ത് യാതൊരു വീഴ്ചയുമില്ലെന്നും, തങ്ങളുടെ അഭിഭാഷകൻ സമയബന്ധിതമായി തന്നെ വിസ അപേക്ഷ നൽകിയിരുന്നതായും ദമ്പതികൾ മാധ്യമങ്ങളോട് വ്യക്തമാക്കി.

നിലവിൽ ബ്രിഡ്ജിങ് വിസയിലുള്ള ഇവർക്ക് ജോലി ചെയ്യാനുള്ള അവകാശവുമില്ല. തങ്ങളുടെ മക്കളെയും പേരക്കുട്ടിയെയും ഓസ്‌ട്രേലിയയിൽ വിട്ട് മടങ്ങേണ്ടി വരുന്നതിന്റെ കടുത്ത മാനസിക സംഘർഷത്തിലാണ് കുടുംബം, അതിനാൽ ഇവർ ഇപ്പോൾ ഇമിഗ്രേഷൻ മന്ത്രിയുടെ പ്രത്യേക ഇടപെടലിനായി അപേക്ഷ നൽകിയിരിക്കുകയാണ്.

വായനക്കാരുടെ ശ്രദ്ധക്ക് :

വിസ നടപടികളിൽ ഉണ്ടാകുന്ന ഇത്തരം ചെറിയ ഇടവേളകൾ ഭാവിയിൽ എത്രത്തോളം ഗുരുതരമായ പ്രത്യാഘാതങ്ങൾ ഉണ്ടാക്കുമെന്നാണ് ഈ സംഭവം തെളിയിക്കുന്നത്. ഡിപ്പാർട്ട്മെന്റിന്റെ ഭാഗത്തുനിന്നുള്ള കാലതാമസമാണെങ്കിൽ പോലും, പൂർണ്ണമായ ഉത്തരവാദിത്തം വിസ അപേക്ഷകരുടെ തലയിലാകുന്ന നിയമ വ്യവസ്ഥയാണ് ഇവിടെ വില്ലനാകുന്നത്.

ഓസ്‌ട്രേലിയയിൽ താൽക്കാലിക വിസയിൽ കഴിയുന്ന മലയാളി സമൂഹവും, പ്രത്യേകിച്ച് സ്പോൺസേർഡ് വിസകളിൽ ഉള്ളവരും ഈ വിഷയത്തിൽ അത്യധികം ശ്രദ്ധിക്കേണ്ടതുണ്ട്. അപേക്ഷകൾ സമർപ്പിച്ച രേഖകൾ ഭദ്രമായി സൂക്ഷിക്കാനും, വിസ സ്റ്റാറ്റസിൽ എന്തെങ്കിലും പ്രശ്നങ്ങൾ കണ്ടാൽ ഉടൻ തന്നെ നിയമോപദേശം തേടാനും തയ്യാറാകണം.

For Community: നിങ്ങളുടെ വിസ പ്രോസസ്സിംഗിനിടയിൽ ഇത്തരം കാലതാമസങ്ങൾ നേരിട്ടിട്ടുണ്ടോ? നിങ്ങളുടെ അനുഭവങ്ങളും അഭിപ്രായങ്ങളും താഴെ കമന്റ് ചെയ്യുക.

Photo : AI-Generated

Sajin Thiruvallam
News Editor