ഓസ്ട്രേലിയയുടെ ഗൾഫ് യാത്രാ ഇളവുകൾ

admin ജൂൺ 17, 2026

യുഎഇ, ഖത്തർ ഉൾപ്പെടെയുള്ള മിഡിൽ ഈസ്റ്റ് രാജ്യങ്ങളിലേക്ക് യാത്ര ചെയ്യുന്നവർക്കും അവിടെ ട്രാൻസിറ്റ് ചെയ്യുന്നവർക്കും വലിയ ആശ്വാസമായി ഓസ്‌ട്രേലിയൻ സർക്കാരിന്റെ പുതിയ തീരുമാനം. സ്മാർട്ട് ട്രാവലർ യാത്രാ മുന്നറിയിപ്പിൽ (Smartraveller Middle East Travel Advice) ഗൾഫ് രാജ്യങ്ങൾക്കുള്ള അപകടസാധ്യത ലെവൽ 4-ൽ നിന്നും ലെവൽ 3 ആയി സർക്കാർ കുറച്ചു. വിദേശകാര്യ മന്ത്രി പെന്നി വോങ് (Penny Wong) ആണ് പുതിയ യാത്രാ ഇളവുകൾ പ്രഖ്യാപിച്ചത്. പുതിയ തീരുമാനം അവധിക്കാല യാത്രകൾക്ക് തയ്യാറെടുക്കുന്ന കുടിയേറ്റക്കാർക്കും നാട്ടിലേക്ക് പോകുന്നവർക്കും ഗുണകരമാകും.

[aicp_shortcode] [/aicp_shortcode]

ലെവൽ 3 ഇളവുകൾ ലഭിച്ച രാജ്യങ്ങൾ

സ്മാർട്ട് ട്രാവലറിലെ പുതിയ അപ്ഡേറ്റ് പ്രകാരം യുഎഇ (UAE), ഖത്തർ, കുവൈറ്റ്, ബഹ്‌റൈൻ, ഇസ്രായേൽ എന്നീ രാജ്യങ്ങൾക്കാണ് ലെവൽ 4-ൽ (‘Do Not Travel’) നിന്ന് ലെവൽ 3 (‘Reconsider your need to travel’) ആയി ഇളവ് നൽകിയത്. ദുബായ്, അബുദാബി, ദോഹ തുടങ്ങിയ പ്രധാന വിമാനത്താവളങ്ങൾ വഴി ഇന്ത്യയിലേക്കും മറ്റും യാത്ര ചെയ്യുന്ന ഓസ്ട്രേലിയൻ മലയാളികൾക്ക് ഇത് വലിയൊരു ആശ്വാസമാകും. മുമ്പ് ലെവൽ 4 മുന്നറിയിപ്പ് നിലനിന്നിരുന്നതിനാൽ പല യാത്രാ ഇൻഷുറൻസുകളും (Travel Insurance) ഈ രാജ്യങ്ങളിലൂടെയുള്ള യാത്രയ്ക്ക് പരിരക്ഷ നൽകിയിരുന്നില്ല. വിലക്ക് നീങ്ങിയതോടെ, ട്രാൻസിറ്റ് ചെയ്യുന്ന യാത്രക്കാർക്ക് ഇനിമുതൽ ഇൻഷുറൻസ് ക്ലെയിം ചെയ്യാൻ എളുപ്പത്തിൽ സാധിക്കും.

പൂർണ്ണമായ യാത്രാവിലക്കുള്ള രാജ്യങ്ങൾ

മിഡിൽ ഈസ്റ്റിലെ സുരക്ഷാ സാഹചര്യങ്ങൾ എപ്പോൾ വേണമെങ്കിലും മാറാൻ സാധ്യതയുള്ളതിനാൽ, ലെവൽ 3 എന്നതും ഉയർന്ന ജാഗ്രത ആവശ്യപ്പെടുന്ന ഒന്നാണെന്ന് വിദേശകാര്യ മന്ത്രി ഓർമ്മിപ്പിച്ചു. അതിനാൽ അടിയന്തരമല്ലാത്ത യാത്രകൾ ഒഴിവാക്കുന്നതാണ് ഇപ്പോഴും സുരക്ഷിതം.

അതേസമയം, ഇറാൻ, ഇറാഖ്, ലെബനൻ, സിറിയ, യെമൻ, പലസ്തീൻ എന്നീ രാജ്യങ്ങളിലേക്കുള്ള പൂർണ്ണ യാത്രാവിലക്ക് (ലെവൽ 4) ഇപ്പോഴും തുടരുകയാണ്. ഇസ്രായേലിന്റെ ചില ഭാഗങ്ങളിലും ഈ കർശന വിലക്കുണ്ട്. കൂടാതെ ഒമാൻ, സൗദി അറേബ്യ, ജോർദാൻ എന്നീ രാജ്യങ്ങൾ നിലവിൽ ലെവൽ 3-ൽ തുടരുകയാണ്.

യുഎസ്-ഇറാൻ സമാധാന കരാർ

അമേരിക്കയും ഇറാനും തമ്മിൽ അടുത്തിടെയുണ്ടായ ധാരണയുടെ പശ്ചാത്തലത്തിലാണ് ഓസ്ട്രേലിയ ഇപ്പോൾ യാത്രാ വിലക്കുകളിൽ ഇളവ് വരുത്തിയിരിക്കുന്നത്. യുഎസ് പ്രസിഡന്റ് ഡൊണാൾഡ് ട്രംപും ഇറാൻ പ്രതിനിധികളും ഉൾപ്പെട്ട ഈ സമാധാന കരാർ 2026 ജൂൺ 19 വെള്ളിയാഴ്ച സ്വിറ്റ്സർലൻഡിൽ വെച്ച് ഔദ്യോഗികമായി ഒപ്പുവെക്കും. ഇതിന് ശേഷമായിരിക്കും മേഖലയിൽ കൂടുതൽ സമാധാനപരമായ സാഹചര്യങ്ങൾ ഉണ്ടാവുക.

എങ്കിലും സാഹചര്യങ്ങൾ പെട്ടെന്ന് മാറാൻ സാധ്യതയുള്ളതിനാൽ സ്മാർട്ട് ട്രാവലർ വെബ്സൈറ്റ് വഴി കൃത്യമായ വിവരങ്ങൾ അറിഞ്ഞതിന് ശേഷം മാത്രം യാത്ര തിരിക്കാൻ സർക്കാർ നിർദ്ദേശിക്കുന്നു. അടിയന്തര സാഹചര്യങ്ങളിൽ ഡിപ്പാർട്ട്മെന്റ് ഓഫ് ഫോറിൻ അഫയേഴ്സ് ആൻഡ് ട്രേഡിന്റെ (DFAT) 1300 555 135 എന്ന നമ്പറിലോ, വിദേശത്ത് നിന്ന് +61 2 6261 3305 എന്ന നമ്പറിലോ ബന്ധപ്പെടാവുന്നതാണ്.

News by