കുടിയേറ്റവും പാർപ്പിട പ്രതിസന്ധിയും: സൺറൈസ് ചർച്ചയിൽ ഭരണ-പ്രതിപക്ഷ പോര്

ഓസ്‌ട്രേലിയൻ രാഷ്ട്രീയത്തിൽ ചൂടേറിയ ചർച്ചകൾക്ക് വഴിയൊരുക്കി ‘സൺറൈസ്’ ടെലിവിഷൻ പ്രോഗ്രാം. സാമൂഹിക സേവന മന്ത്രി ടാനിയ പ്ലിബർസെക്കും മുതിർന്ന നേതാവ് ബാർണബി ജോയ്‌സും തമ്മിൽ കുടിയേറ്റം, പാർപ്പിടം, ഊർജ്ജ നയങ്ങൾ എന്നീ വിഷയങ്ങളിൽ ശക്തമായ വാദപ്രതിവാദങ്ങളാണ് നടന്നത്.

ഫാരർ ഉപതിരഞ്ഞെടുപ്പിൽ ‘വൺ നേഷൻ’ പാർട്ടിക്കുണ്ടായ മുന്നേറ്റമാണ് ചർച്ചയ്ക്ക് തുടക്കമിട്ടത്. ജനങ്ങളുടെ നിരാശയാണ് ഈ ഫലത്തിൽ പ്രതിഫലിക്കുന്നതെന്നും, വർദ്ധിച്ചുവരുന്ന ജീവിതച്ചെലവുകളും സർക്കാരിന്റെ കാലാവസ്ഥാ നയങ്ങളുമാണ് ഇതിന് കാരണമെന്നും ബാർണബി ജോയ്‌സ് ആരോപിച്ചു. എന്നാൽ, പ്രതിസന്ധികളെക്കുറിച്ച് വിലപിക്കുന്നതല്ലാതെ ‘വൺ നേഷൻ’ പാർട്ടിക്ക് പരിഹാരങ്ങളില്ലെന്ന് ടാനിയ പ്ലിബർസെക് തിരിച്ചടിച്ചു. മെച്ചപ്പെട്ട വേതനത്തിനും സാധാരണക്കാരുടെ ജീവിതം എളുപ്പമാക്കുന്ന ബില്ലുകൾക്കും എതിരെ വോട്ട് ചെയ്തവരാണ് അവരെന്നും മന്ത്രി ഓർമ്മിപ്പിച്ചു.

കുടിയേറ്റവും അടിസ്ഥാന സൗകര്യങ്ങളും കുടിയേറ്റവും പാർപ്പിട പ്രതിസന്ധിയുമായിരുന്നു ചർച്ചയിലെ പ്രധാന വിഷയം. ആവശ്യത്തിന് അടിസ്ഥാന സൗകര്യങ്ങളൊരുക്കാതെ ലേബർ സർക്കാർ വൻതോതിൽ കുടിയേറ്റക്കാരെ പ്രവേശിപ്പിക്കുകയാണെന്നും, ഇത് ആശുപത്രികളിലും പാർപ്പിട മേഖലയിലും കടുത്ത പ്രതിസന്ധി സൃഷ്ടിക്കുന്നുവെന്നും ജോയ്‌സ് കുറ്റപ്പെടുത്തി. കുടിയേറ്റക്കാരുടെ എണ്ണം കുറയ്ക്കണമെന്നും അദ്ദേഹം ആവശ്യപ്പെട്ടു. ഇതിന് മറുപടിയായി, മുൻ സർക്കാരിന്റെ കാലത്തെ ഉയർന്ന കുടിയേറ്റ നിരക്ക് തങ്ങൾ പകുതിയായി കുറച്ചുവെന്ന് പ്ലിബർസെക് വ്യക്തമാക്കി. വിദ്യാർത്ഥികൾക്ക് പാർപ്പിടം ഉറപ്പാക്കിയ ശേഷം മാത്രമേ സർവ്വകലാശാലകൾക്ക് വിസ അനുവദിക്കാൻ കഴിയൂ എന്ന പുതിയ നയവും അവർ ചൂണ്ടിക്കാട്ടി.

അടിസ്ഥാന സൗകര്യ വികസനവുമായി ബന്ധപ്പെട്ട് ഡാമുകളുടെ നിർമ്മാണത്തിലും ഇരുവരും കൊമ്പുകോർത്തു. നൂറ് ഡാമുകൾ വാഗ്ദാനം ചെയ്ത് വെറും രണ്ടെണ്ണം മാത്രം നിർമ്മിച്ചവരാണ് ഇപ്പോൾ വിമർശിക്കുന്നതെന്ന് ടാനിയ പരിഹസിച്ചപ്പോൾ, ലേബർ സർക്കാർ നിരവധി അടിസ്ഥാന സൗകര്യ പദ്ധതികൾ റദ്ദാക്കിയതായി ജോയ്‌സ് ആരോപിച്ചു. രാജ്യത്തെ നെറ്റ്-സീറോ നയങ്ങൾ വിജയകരമാണെന്നും ലക്ഷ്യത്തിലേക്ക് രാജ്യം മുന്നേറുന്നതിനാൽ ഇനിയും വൻതോതിൽ പണം ചെലവഴിക്കേണ്ടതില്ലെന്നും മന്ത്രി കൂട്ടിച്ചേർത്തു. എന്നാൽ ഊർജ്ജ ബില്ലുകൾ സാധാരണക്കാർക്ക് താങ്ങാനാവാത്തതാണെന്ന നിലപാടിൽ ബാർണബി ജോയ്‌സ് ഉറച്ചുനിന്നു.

Sajin Thiruvallam
News Editor