ഭവന പ്രതിസന്ധി: വാഗ്ദാനം തിരുത്തി ആൽബനീസീ സർക്കാർ 

നാളെ അവതരിപ്പിക്കാനിരിക്കുന്ന ഓസ്‌ട്രേലിയൻ ഫെഡറൽ ബജറ്റിൽ ഭവന പ്രതിസന്ധി പരിഹരിക്കുന്നതിനായി നിർണായക പ്രഖ്യാപനങ്ങൾ ഉണ്ടാകുമെന്ന് സൂചിപ്പിച്ച് പ്രധാനമന്ത്രി ആന്റണി ആൽബനീസീ. രാജ്യത്തെ ജനങ്ങൾക്ക് സ്വന്തമായി വീട് എന്ന സ്വപ്നം യാഥാർത്ഥ്യമാക്കാൻ മുൻ തെരഞ്ഞെടുപ്പ് വാഗ്ദാനങ്ങളിൽ മാറ്റം വരുത്താൻ സർക്കാർ തയ്യാറാണെന്ന് അദ്ദേഹം വ്യക്തമാക്കി. എബിസി റേഡിയോയ്ക്ക് (ABC RN Breakfast) നൽകിയ പ്രത്യേക അഭിമുഖത്തിലാണ് പ്രധാനമന്ത്രി നിലപാട് വ്യക്തമാക്കിയത്.

ഭവന നിർമ്മാണത്തിന് പുതിയ പദ്ധതികൾ നെഗറ്റീവ് ഗിയറിംഗ് (Negative gearing), കാപ്പിറ്റൽ ഗെയിൻസ് ടാക്സ് (Capital gains tax) എന്നിവയിലെ നയമാറ്റങ്ങൾ ഉൾപ്പെടെയുള്ള കടുത്ത തീരുമാനങ്ങൾ ബജറ്റിലുണ്ടാകുമെന്നാണ് സൂചന. ഭവന നിർമ്മാണം വേഗത്തിലാക്കാനുള്ള പരിസ്ഥിതി നിയമ പരിഷ്കാരങ്ങൾ നടപ്പിലാക്കാൻ അര ബില്യൺ ഡോളർ സർക്കാർ വകയിരുത്തും. ജനങ്ങൾ സാമ്പത്തിക സമ്മർദ്ദത്തിലാണെന്നും, ഭവനങ്ങളുടെ ലഭ്യത (Supply) വർദ്ധിപ്പിക്കുക എന്നതാണ് നിലവിലെ പ്രതിസന്ധിക്കുള്ള ശാശ്വത പരിഹാരമെന്നും പ്രധാനമന്ത്രി ചൂണ്ടിക്കാട്ടി.

ഫാരർ ഉപതെരഞ്ഞെടുപ്പിലെ വൺ നേഷൻ മുന്നേറ്റം ഫാരർ ഉപതെരഞ്ഞെടുപ്പിൽ വൺ നേഷൻ പാർട്ടി നേടിയ വിജയത്തിന് കാരണം ലിബറൽ-നാഷണൽ പാർട്ടികളുടെ തെറ്റായ നയങ്ങളാണെന്ന് ആൽബനീസീ  വിമർശിച്ചു. 25 വർഷമായി മണ്ഡലത്തെ പ്രതിനിധീകരിച്ച സൂസൻ ലെയെ അപ്രതീക്ഷിതമായി പുറത്താക്കിയത് വോട്ടർമാർക്കിടയിൽ കടുത്ത അതൃപ്തിയുണ്ടാക്കി. ജനങ്ങളുടെ ബുദ്ധിമുട്ടുകൾ മുതലെടുക്കുക മാത്രമാണ് വൺ നേഷൻ ചെയ്യുന്നതെന്നും അദ്ദേഹം കുറ്റപ്പെടുത്തി.

രാഷ്ട്രീയ സ്ഥിരതയും സാമൂഹിക ഐക്യവും യുകെയിലെ തദ്ദേശ തെരഞ്ഞെടുപ്പ് ഫലങ്ങളെക്കുറിച്ച് പ്രതികരിച്ച അദ്ദേഹം, കിയർ സ്റ്റാർമർ പ്രധാനമന്ത്രിയായി തുടരണമെന്നാണ് ആഗ്രഹിക്കുന്നതെന്ന് വ്യക്തമാക്കി. അടിക്കടിയുള്ള നേതൃമാറ്റങ്ങൾ രാജ്യത്തിന്റെ ഭരണസ്ഥിരതയെ ബാധിക്കുമെന്ന് അദ്ദേഹം ഓർമ്മിപ്പിച്ചു. കൂടാതെ, അടുത്തിടെ കുട്ടികളുടെ ഒരു നെറ്റ്ബോൾ മത്സരത്തിനിടെ ഉയർന്ന ജൂതവിരുദ്ധ (Antisemitic) പരാമർശങ്ങളെ അദ്ദേഹം ശക്തമായി അപലപിച്ചു. ഓൺലൈനിലെ വിദ്വേഷ പ്രചാരണങ്ങൾ സമൂഹത്തിൽ സാധാരണവൽക്കരിക്കപ്പെടുന്നത് ആശങ്കാജനകമാണെന്നും, ഇതിനെതിരെ കടുത്ത ജാഗ്രത വേണമെന്നും പ്രധാനമന്ത്രി കൂട്ടിച്ചേർത്തു.

Click here to listen to this news