ഹോർമൂസ് തുറന്നു; ഇന്ധനവില കുറയുമെന്ന പ്രതീക്ഷയിൽ ഓസ്ട്രേലിയ, ചില നിലപാടുകൾ വ്യക്തമാക്കി ഓസ്ട്രേലിയൻ പ്രധാനമന്ത്രി

കാൻബെറ: ആഴ്ചകൾ നീണ്ട അനിശ്ചിതത്വങ്ങൾക്കൊടുവിൽ ലോകത്തിലെ ഏറ്റവും പ്രധാനപ്പെട്ട എണ്ണക്കപ്പൽ പാതയായ ഹോർമൂസ് കടലിടുക്ക് (Strait of Hormuz) ഇറാൻ വീണ്ടും തുറന്നു. ഇതോടെ ഓസ്ട്രേലിയ ഉൾപ്പെടെയുള്ള രാജ്യങ്ങളിലെ ഇന്ധന വിതരണത്തിലും വിലയിലുമുള്ള ആശങ്കകൾക്ക് താൽക്കാലിക ആശ്വാസമായി. ഹോർമൂസ് കടലിടുക്ക് തുറന്ന നടപടിയെ സ്വാഗതം ചെയ്ത ഓസ്ട്രേലിയൻ പ്രധാനമന്ത്രി ആന്റണി അൽബാനീസീ , യു.എസ്-ഇസ്രയേൽ-ഇറാൻ സംഘർഷം പൂർണ്ണമായും അവസാനിപ്പിക്കണമെന്നും ആവശ്യപ്പെട്ടു.

ആഗോള ഉച്ചകോടിയിലെ ഇടപെടൽ 

ഏപ്രിൽ 17-18 തീയതികളിൽ ഫ്രഞ്ച് പ്രസിഡന്റ് ഇമ്മാനുവൽ മാക്രോണും ബ്രിട്ടീഷ് പ്രധാനമന്ത്രി കീർ സ്റ്റാർമറും സംയുക്തമായി സംഘടിപ്പിച്ച വെർച്ച്വൽ ലീഡേഴ്സ് സമ്മിറ്റിൽ പങ്കെടുത്തതിന് ശേഷമാണ് പ്രധാനമന്ത്രി തന്റെ നിലപാട് വ്യക്തമാക്കിയത്. “ഈ സംഘർഷം അവസാനിക്കണം, ഹോർമൂസ് കടലിടുക്ക് തുറക്കപ്പെടണം” എന്ന് അദ്ദേഹം എക്സിൽ (മുൻ ട്വിറ്റർ) കുറിച്ചു.

“പശ്ചിമേഷ്യൻ സംഘർഷം അവസാനിപ്പിക്കണമെന്ന് ഓസ്‌ട്രേലിയ എക്കാലത്തും ആവശ്യപ്പെട്ടിട്ടുള്ളതാണ്. യുദ്ധം നീണ്ടുനിൽക്കുന്നതിനനുസരിച്ച് ആഗോള സമ്പദ്‌വ്യവസ്ഥയെ അത് ദോഷകരമായി ബാധിക്കും, മനുഷ്യജീവനുകൾ നഷ്ടപ്പെടുന്നതും വർദ്ധിക്കും. ഹോർമൂസിലെ സ്ഥിരതയും സുരക്ഷയും പുനഃസ്ഥാപിക്കാനുള്ള ശ്രമങ്ങളെ പിന്തുണയ്ക്കാൻ ഓസ്ട്രേലിയ തയ്യാറാണ്,” അൽബാനീസീ  വ്യക്തമാക്കി.

We want to see an end to this conflict and the Strait of Hormuz open. pic.twitter.com/Z0J2orxb9g

— Anthony Albanese (@AlboMP) April 18, 2026

ഓസ്ട്രേലിയയിലെ ഇന്ധന പ്രതിസന്ധി 

ഹോർമൂസ് കടലിടുക്കിലൂടെയുള്ള എണ്ണ വിതരണം തടസ്സപ്പെട്ടത് ഓസ്ട്രേലിയയിലെ ഇന്ധനവിലയെ നേരിട്ട് ബാധിച്ചിരുന്നു. “ഇന്ധന വിതരണത്തിലെ തടസ്സങ്ങളും വിലക്കയറ്റവും ഓസ്ട്രേലിയക്കാരെ ബുദ്ധിമുട്ടിക്കുന്നുണ്ട്. ഈ പ്രതിസന്ധിയിൽ നിന്ന് കുടുംബങ്ങളെ സംരക്ഷിക്കാൻ ഞങ്ങൾ പ്രവർത്തിക്കുകയാണ്,” അൽബാനീസീ  കൂട്ടിച്ചേർത്തു. ലെബനൻ വെടിനിർത്തലിന് (Lebanon ceasefire) പിന്നാലെയാണ് ഇറാൻ കടലിടുക്ക് തുറന്നത്.

യൂറോപ്യൻ-ഏഷ്യൻ രാജ്യങ്ങളുമായുള്ള നയതന്ത്ര ചർച്ചകൾ, യു.എസിന്റെ ഉപരോധ പ്രഖ്യാപനങ്ങൾക്ക് ശേഷമുള്ള ഇറാന്റെ നടപടികൾ, വെടിനിർത്തൽ റിപ്പോർട്ടുകൾ എന്നിവയെക്കുറിച്ച് വിശദീകരിക്കുന്ന ഒരു പ്രസ് കോൺഫറൻസ് വീഡിയോയും അദ്ദേഹം പങ്കുവെച്ചിട്ടുണ്ട്. ആഗോളതലത്തിൽ അസ്ഥിരത തുടരുമ്പോഴും ഓസ്ട്രേലിയയുടെ ഊർജ്ജ സുരക്ഷ ഉറപ്പാക്കാൻ നയതന്ത്ര ശ്രമങ്ങൾ തുടരുമെന്നാണ് സർക്കാർ വ്യക്തമാക്കുന്നത്.

ഉയരുന്ന വിമർശനങ്ങൾ 

അതെസമയം, പ്രധാനമന്ത്രിയുടെ പ്രസ്താവന ആഭ്യന്തരമായി പുതിയ വിവാദങ്ങൾക്കും വഴിവെച്ചിട്ടുണ്ട്. അദ്ദേഹത്തിന്റെ എക്സ് പോസ്റ്റിന് താഴെ സമ്മിശ്ര പ്രതികരണങ്ങളാണ് ലഭിക്കുന്നത്. പശ്ചിമേഷ്യൻ സംഘർഷത്തിന്റെ തുടക്കത്തിൽ ഓസ്ട്രേലിയ സ്വീകരിച്ച നിലപാട് ശരിയായിരുന്നില്ലെന്നാണ് ഒരു വിഭാഗം വിമർശിക്കുന്നത്. അമേരിക്കയുടെ ഇടപെടലുകളെ മറച്ചുവെച്ച് സ്വന്തം ക്രെഡിറ്റ് വർദ്ധിപ്പിക്കാനാണ് സർക്കാർ ശ്രമിക്കുന്നതെന്നും വിമർശകർ ആരോപിക്കുന്നു. എന്നാൽ, അടുത്തിടെയുണ്ടായ നയതന്ത്ര പുരോഗതികളെയും സർക്കാരിന്റെ ഇടപെടലുകളെയും അഭിനന്ദിക്കുന്നവരും കുറവല്ല.

എന്തായാലും, ഹോർമൂസ് കടലിടുക്ക് വീണ്ടും തുറന്നത് ഇന്ധനവില സ്ഥിരത കൈവരിക്കാൻ സഹായിക്കുമെന്ന പ്രതീക്ഷയിലാണ് ഓസ്ട്രേലിയൻ ജനതയും സർക്കാരും. എന്നാൽ, സംഘർഷങ്ങൾ പൂർണ്ണമായും അവസാനിക്കാത്തിടത്തോളം ഈ ആശ്വാസം താൽക്കാലികം മാത്രമായിരിക്കുമെന്ന സൂചനയും അൽബാനീസിന്റെ വാക്കുകളിലുണ്ട്.

Sajin Thiruvallam
News Editor