സർക്കാരിന്റെ കുടിയേറ്റ നയങ്ങൾ ; പ്രതിപക്ഷ നേതാവിന്റെ  പ്രസ്താവനകളെ തള്ളി ട്രഷറർ ജിം ചാൽമേഴ്സ് 

കാൻബറ:  സർക്കാരിന്റെ കുടിയേറ്റ നയങ്ങളെ വിമർശിച്ച പ്രതിപക്ഷ നേതാവ് ആംഗസ് ടെയ്‌ലറുടെ പ്രസ്താവനകളെ ഓസ്‌ട്രേലിയൻ ഫെഡറൽ ട്രഷറർ ജിം ചാൽമേഴ്സ് തള്ളി. വിദേശ രാജ്യങ്ങളിലെ വിഭജന രാഷ്ട്രീയമാണ് പ്രതിപക്ഷം ഇവിടെ പയറ്റുന്നതെന്ന് അദ്ദേഹം കുറ്റപ്പെടുത്തി. എ.ബി.സി റേഡിയോ നാഷണലിന് നൽകിയ പ്രത്യേക അഭിമുഖത്തിൽ സംസാരിക്കുകയായിരുന്നു.

മുൻ സർക്കാരിന്റെ കാലത്തെ അപേക്ഷിച്ച് രാജ്യത്തേക്കുള്ള കുടിയേറ്റ നിരക്കിൽ 45 ശതമാനത്തിന്റെ കുറവ് രേഖപ്പെടുത്തിയിട്ടുണ്ടെന്നും, കഴിഞ്ഞ സാമ്പത്തിക വർഷം പ്രതീക്ഷിച്ചതിലും 30,000 പേർ കുറവാണ് ഓസ്‌ട്രേലിയയിലേക്ക് എത്തിയതെന്നും കണക്കുകൾ സഹിതം ട്രഷറർ വ്യക്തമാക്കി.

അമേരിക്കയും ഇറാനും തമ്മിലുള്ള യുദ്ധം നീണ്ടുപോകുകയാണെങ്കിൽ ആഗോള സമ്പദ്‌വ്യവസ്ഥ വലിയ വില കൊടുക്കേണ്ടി വരുമെന്ന് അന്താരാഷ്ട്ര നാണയ നിധിയുടെ (IMF) മുന്നറിയിപ്പ്. യുദ്ധം തുടർന്നാൽ ലോകം കടുത്ത സാമ്പത്തിക മാന്ദ്യത്തിലേക്ക് കൂപ്പുകുത്തുമെന്നും, നാണയപ്പെരുപ്പം 6 ശതമാനം വരെ ഉയരാൻ സാധ്യതയുണ്ടെന്നും ഐ.എം.എഫ് വിലയിരുത്തുന്നു. കൂടാതെ, 2027 വരെ ഇന്ധനവില ഉയർന്ന നിരക്കിൽ തുടർന്നേക്കാമെന്നും റിപ്പോർട്ടുകൾ സൂചിപ്പിക്കുന്നു. വരാനിരിക്കുന്ന മേയ് മാസത്തിലെ ബജറ്റിൽ ഈ ആഗോള പ്രതിസന്ധികൾ പ്രതിഫലിക്കുമെന്നും അദ്ദേഹം വ്യക്തമാക്കി.

ആഗോള സാമ്പത്തിക പ്രതിസന്ധി: ആഗോള സമ്പദ്‌വ്യവസ്ഥയെ സംബന്ധിച്ചിടത്തോളം ഇതൊരു അപകടകരമായ സമയമാണെന്ന് ട്രഷറർ ജിം ചാൽമേഴ്സ് പറഞ്ഞു. സാമ്പത്തിക വളർച്ച കുറയുകയും നാണയപ്പെരുപ്പം വർദ്ധിക്കുകയും ചെയ്യുമെന്ന ഐ.എം.എഫിന്റെ വിലയിരുത്തലിനോട് അദ്ദേഹം യോജിച്ചു. യുദ്ധം എത്രയും വേഗം അവസാനിപ്പിക്കുകയും ഹോർമുസ് കടലിടുക്ക് ഗതാഗതത്തിനായി തുറന്നുകൊടുക്കുകയും ചെയ്യേണ്ടത് ആഗോള സാമ്പത്തിക ഭദ്രതയ്ക്ക് അത്യന്താപേക്ഷിതമാണ്. യുദ്ധത്തിൽ ഓസ്‌ട്രേലിയയ്ക്ക് നേരിട്ട് പങ്കില്ലെങ്കിലും, ജനങ്ങൾ ഇതിന്റെ വലിയൊരു വില നൽകേണ്ടി വരുന്നുണ്ടെന്നും ഇത് വരാനിരിക്കുന്ന ബജറ്റിലെ പ്രധാന പരിഗണനാ വിഷയമായിരിക്കുമെന്നും അദ്ദേഹം കൂട്ടിച്ചേർത്തു.

ഇന്ധന വിലയും ബജറ്റ് നയങ്ങളും: 2027 വരെ ഇന്ധനവില ഉയർന്ന നിരക്കിൽ തുടർന്നാൽ സർക്കാരിന്റെ ഇന്ധന സബ്‌സിഡി തുടരുമോ എന്ന ചോദ്യത്തിന് അദ്ദേഹം വ്യക്തമായ മറുപടി നൽകിയില്ല. പ്രതിസന്ധികൾ നേരിടാൻ സർക്കാർ വിവിധ പദ്ധതികൾ ആലോചിക്കുന്നുണ്ടെന്നും, ഇന്ധന എക്‌സൈസ് തീരുവ വെട്ടിക്കുറയ്ക്കുന്നതടക്കമുള്ള നടപടികളിലൂടെ ജനങ്ങൾക്ക് ആശ്വാസം നൽകാൻ ശ്രമിക്കുന്നുണ്ടെന്നും അദ്ദേഹം പറഞ്ഞു. വരാനിരിക്കുന്ന ബജറ്റ് ഉത്തരവാദിത്തമുള്ളതായിരിക്കുമെന്നും, ഭാവിയിലെ വലിയ പ്രതിസന്ധികളെ നേരിടാൻ തക്കവിധത്തിൽ സാമ്പത്തിക അച്ചടക്കം പാലിക്കുമെന്നും അദ്ദേഹം വ്യക്തമാക്കി.

റിസർവ് ബാങ്കുമായുള്ള ആശയവിനിമയം: സാമ്പത്തിക പ്രതിസന്ധികൾ നേരിടുന്നതിന്റെ ഭാഗമായി റിസർവ് ബാങ്ക് ഗവർണർ മിഷേൽ ബുള്ളക്കുമായി നിരന്തരം ആശയവിനിമയം നടത്തുന്നുണ്ടെന്ന് ട്രഷറർ അറിയിച്ചു. സർക്കാരും റിസർവ് ബാങ്കും സ്വതന്ത്രമായി പ്രവർത്തിക്കുന്ന സ്ഥാപനങ്ങളാണെങ്കിലും, സാമ്പത്തിക വളർച്ചയും നാണയപ്പെരുപ്പവും നിയന്ത്രിക്കുക എന്ന പൊതുലക്ഷ്യത്തോടെയാണ് ഇരുവരും മുന്നോട്ട് പോകുന്നതെന്ന് അദ്ദേഹം വ്യക്തമാക്കി.

പ്രതിരോധ മേഖലയ്ക്ക് മുൻഗണന: പുതിയ ആഗോള സാഹചര്യത്തിൽ പ്രതിരോധ മേഖലയിലെ നിക്ഷേപം സർക്കാർ വർദ്ധിപ്പിച്ചിരിക്കുകയാണ്. സാമ്പത്തിക സുരക്ഷയും ദേശീയ സുരക്ഷയും തമ്മിൽ അഭേദ്യമായ ബന്ധമുണ്ടെന്നും, പ്രതിരോധ മേഖലയിലെ ചിലവുകൾക്ക് കൃത്യമായ മൂല്യം ലഭിക്കുന്നുണ്ടെന്ന് ഉറപ്പാക്കുന്നുണ്ടെന്നും അദ്ദേഹം കൂട്ടിച്ചേർത്തു.

Sajin Thiruvallam
News Editor