പ്രധാനമന്ത്രി ആൻ്റണി അൽബാനീസീ സിംഗപ്പൂരിലേക്ക്

കാൻബെറ: രാജ്യത്ത് നിലനിൽക്കുന്ന ഇന്ധന പ്രതിസന്ധിക്ക് ശാശ്വത പരിഹാരം കാണുന്നതിന്റെ ഭാഗമായി ഓസ്‌ട്രേലിയൻ പ്രധാനമന്ത്രി ആന്റണി ആൽബനീസീ  സിംഗപ്പൂർ സന്ദർശിക്കും. വെള്ളിയാഴ്ച സിംഗപ്പൂർ പ്രധാനമന്ത്രി ലോറൻസ് വോങ്ങുമായി അദ്ദേഹം കൂടിക്കാഴ്ച നടത്തും. പെട്രോൾ, ഡീസൽ, എൽ.എൻ.ജി (LNG) എന്നിവയുടെ വിതരണം തടസ്സമില്ലാതെ ഉറപ്പാക്കുകയാണ് സന്ദർശനത്തിന്റെ പ്രധാന ലക്ഷ്യം. പാർലമെന്റ് മന്ദിരത്തിൽ നടന്ന പ്രത്യേക വാർത്താസമ്മേളനത്തിൽ കാലാവസ്ഥാ-ഊർജ്ജ വകുപ്പ് മന്ത്രി ക്രിസ് ബോവനൊപ്പമാണ് പ്രധാനമന്ത്രി ഇക്കാര്യങ്ങൾ വ്യക്തമാക്കിയത്.

ഇന്ധനക്ഷാമത്തിൽ ആശ്വാസം; ജനങ്ങൾക്ക് നന്ദി : 

ഈസ്റ്റർ അവധിക്കാലത്ത് ഇന്ധന ഉപയോഗം നിയന്ത്രിച്ച് സർക്കാരുമായി സഹകരിച്ച ജനങ്ങൾക്ക് പ്രധാനമന്ത്രി നന്ദി അറിയിച്ചു. എക്സൈസ് തീരുവ കുറച്ചതോടെ രാജ്യത്തെ മിക്ക നഗരങ്ങളിലും ഇന്ധനവില കുറഞ്ഞിട്ടുണ്ട്. ഇന്ധനക്ഷാമം നേരിടുന്ന പമ്പുകളുടെ എണ്ണത്തിൽ വലിയ കുറവുണ്ടായതായി മന്ത്രി ക്രിസ് ബോവൻ അറിയിച്ചു. നിലവിൽ രാജ്യത്തുടനീളം 241 സർവീസ് സ്റ്റേഷനുകളിൽ (ആകെ പമ്പുകളുടെ 3 ശതമാനം) മാത്രമാണ് ഡീസൽ ക്ഷാമമുള്ളത്. നിലവിലെ കണക്കുകൾ പ്രകാരം 39 ദിവസത്തേക്കുള്ള പെട്രോൾ (1.7 ബില്യൺ ലിറ്റർ), 30 ദിവസത്തേക്കുള്ള ജെറ്റ് ഫ്യുവൽ, 29 ദിവസത്തേക്കുള്ള ഡീസൽ എന്നിവ രാജ്യത്ത് കരുതൽ ശേഖരമായുണ്ട്.

ആഗോള പ്രതിസന്ധിയും ഫെഡറൽ ബജറ്റും 

പശ്ചിമേഷ്യയിൽ തുടരുന്ന സംഘർഷങ്ങൾ ഓസ്‌ട്രേലിയൻ സമ്പദ്‌വ്യവസ്ഥയെയും വരാനിരിക്കുന്ന ഫെഡറൽ ബജറ്റിനെയും സാരമായി ബാധിക്കുമെന്ന് പ്രധാനമന്ത്രി മുന്നറിയിപ്പ് നൽകി. വിതരണ ശൃംഖലകൾക്കായി മറ്റു രാജ്യങ്ങളെ ആശ്രയിക്കുന്നത് കുറയ്ക്കാനും, തദ്ദേശീയമായ ഉൽപ്പാദനം വർദ്ധിപ്പിച്ച് രാജ്യത്തെ സ്വയംപര്യാപ്തമാക്കാനുമാകും ഇത്തവണ ബജറ്റ് ഊന്നൽ നൽകുക. ആഗോള അസ്ഥിരതകൾ നിലനിൽക്കുന്നതിനാൽ മെയ് മാസത്തിലെ രണ്ടാമത്തെ ചൊവ്വാഴ്ച അവതരിപ്പിക്കേണ്ട ബജറ്റിന്റെ അന്തിമ രൂപരേഖ തയ്യാറാക്കാൻ കൂടുതൽ സമയമെടുത്തേക്കാം. കൂടാതെ, എൻ.ഡി.ഐ.എസ് (NDIS) പദ്ധതി കൂടുതൽ കാര്യക്ഷമവും സുസ്ഥിരവുമാക്കുന്നതിനുള്ള നിർണായക സാമ്പത്തിക പരിഷ്കാരങ്ങൾ ബജറ്റിലുണ്ടാകുമെന്നും അദ്ദേഹം സൂചിപ്പിച്ചു.

യുദ്ധക്കുറ്റങ്ങൾ: 

യുദ്ധക്കുറ്റങ്ങളുടെ പേരിൽ അറസ്റ്റിലായ മുൻ സൈനികൻ ബെൻ റോബർട്ട്സ്-സ്മിത്തുമായി ബന്ധപ്പെട്ട മാധ്യമങ്ങളുടെ ചോദ്യങ്ങളോട് പ്രതികരിക്കാൻ പ്രധാനമന്ത്രി തയ്യാറായില്ല. വിഷയം കോടതിയുടെ പരിഗണനയിലായതിനാൽ അഭിപ്രായം പറയുന്നത് ശരിയല്ലെന്ന് അദ്ദേഹം വ്യക്തമാക്കി.

പശ്ചിമേഷ്യൻ നിലപാട്:

 പശ്ചിമേഷ്യയിൽ ഇസ്രായേൽ-ഇറാൻ സംഘർഷങ്ങളിൽ അയവുവരുത്തണമെന്നാണ് ഓസ്‌ട്രേലിയയുടെ ഔദ്യോഗിക നിലപാടെന്ന് മുൻ യു.എസ് പ്രസിഡന്റ് ഡൊണാൾഡ് ട്രംപിന്റെ വിമർശനങ്ങളോട് പ്രതികരിക്കവെ അദ്ദേഹം പറഞ്ഞു.

ചൂതാട്ട പരസ്യങ്ങൾ (Gambling Ads): 

ചൂതാട്ട പരസ്യങ്ങൾ കർശനമായി നിയന്ത്രിക്കുന്നതിനുള്ള പുതിയ നിയമനിർമ്മാണം പാർലമെന്റിന്റെ വരാനിരിക്കുന്ന മെയ് സമ്മേളനത്തിൽ അവതരിപ്പിക്കും. പോഡ്‌കാസ്റ്റുകൾ, യൂട്യൂബ് ചാനലുകൾ എന്നിവയിലെ പരസ്യങ്ങളും പുതിയ നിയമത്തിന്റെ പരിധിയിൽ വന്നേക്കാം.

News by

Sajin Thiruvallam
News Editor