ഓസ്ട്രേലിയൻ പ്രധാനമന്ത്രിയുടെ ഈസ്റ്റർ സന്ദേശം: സ്നേഹത്തിന്റെയും ക്ഷമയുടെയും മൂല്യങ്ങൾ ഉയർത്തിക്കാട്ടി ആൻ്റണി  അൽബനീസീ 

യേശുക്രിസ്തുവിന്റെ ക്രൂശീകരണത്തിന്റെയും പുനരുത്ഥാനത്തിന്റെയും സ്മരണയുണർത്തി ഓസ്ട്രേലിയൻ പ്രധാനമന്ത്രി ആൻ്റണി  ആൽബനീസിന്റെ ഈസ്റ്റർ സന്ദേശം. കുടുംബാംഗങ്ങൾക്കൊപ്പം സമയം ചെലവഴിക്കുന്നവർക്ക് യാത്രാ സുരക്ഷയും, അവധിദിവസങ്ങളിൽ ജോലി ചെയ്യുന്നവർക്ക് പ്രത്യേക കൃതജ്ഞതയും അദ്ദേഹം അറിയിച്ചു. 

പ്രധാനമന്ത്രിയുടെ ഈസ്റ്റർ സന്ദേശം (പൂർണ്ണരൂപം)

ക്രൈസ്തവരെ സംബന്ധിച്ചിടത്തോളം, അവരുടെ വിശ്വാസത്തിന്റെ പൊരുൾ ഉൾക്കൊള്ളാനുള്ള സമയമാണ് ഈസ്റ്റർ. യേശുക്രിസ്തുവിന്റെ ക്രൂശീകരണത്തെയും പുനരുത്ഥാനത്തെയും ധ്യാനിക്കാനും, തങ്ങളുടെ വിശ്വാസത്തിന്റെ കാതലായ അഗാധമായ കൃപയെ ആഘോഷിക്കാനുമായി രാജ്യത്തുടനീളമുള്ള ക്രൈസ്തവർ ഒന്നിക്കുന്നു.

രാജ്യത്തുടനീളം നടക്കുന്ന ആഘോഷങ്ങളും പ്രാർത്ഥനാ ശുശ്രൂഷകളും ഈസ്റ്റർ ചരിത്രത്തിന്റെ ഹൃദയഭാഗത്തുള്ള സ്നേഹത്തിന്റെയും ക്ഷമയുടെയും മൂല്യങ്ങളെ നമ്മെ ഓർമ്മിപ്പിക്കും. നമ്മുടെ കുടുംബങ്ങളെയും കമ്മ്യൂണിറ്റികളെയും സമൂഹത്തെയും അളവറ്റ രീതിയിൽ ശക്തിപ്പെടുത്തുകയും സമ്പന്നമാക്കുകയും ചെയ്യുന്ന മൂല്യങ്ങളാണവ.

എല്ലാ ഓസ്ട്രേലിയക്കാർക്കും ഈ വാരാന്ത്യം സന്തോഷത്തിന്റെയും ഔദാര്യത്തിന്റെയും ഒത്തുചേരലിന്റെയും സമയമായിരിക്കും. കുടുംബാംഗങ്ങളോടും സുഹൃത്തുക്കളോടുമൊപ്പം സമയം ചെലവഴിക്കാനും, ഒരുപക്ഷേ ‘എഗ്ഗ് ഹണ്ടിൽ’ (egg hunt) പങ്കുചേരാനും ഈ അവസരം ഉപകരിക്കുമെന്ന് പ്രതീക്ഷിക്കുന്നു.

ഈ വാരാന്ത്യത്തിൽ നിങ്ങൾക്ക് ജോലിയിൽ നിന്ന് അവധിയെടുക്കാൻ അവസരം ലഭിക്കുകയാണെങ്കിൽ, നിങ്ങളുടെ യാത്രകളിൽ സുരക്ഷ ഉറപ്പുവരുത്തുകയും, വിശ്രമിക്കാനും ഉന്മേഷം വീണ്ടെടുക്കാനുമുള്ള ഈ അവസരം ആസ്വദിക്കുകയും ചെയ്യുക. ഇനി നിങ്ങൾ ജോലി ചെയ്യുന്നവരാണെങ്കിൽ, ഞങ്ങളെ സുരക്ഷിതരായി നിലനിർത്തുന്നതിനും രാജ്യത്തിന്റെ പ്രവർത്തനങ്ങൾ സുഗമമായി മുന്നോട്ട് കൊണ്ടുപോകുന്നതിനും നിങ്ങൾ ചെയ്യുന്ന എല്ലാ കാര്യങ്ങൾക്കും നന്ദി.

ഏവർക്കും സന്തോഷകരവും അനുഗ്രഹീതവുമായ ഒരു ഈസ്റ്റർ ആശംസിക്കുന്നു.

Sajin Thiruvallam
News Editor
Australian Malayalee News