ക്വീൻസ്‌ലാൻഡിൽ പ്രളയബാധിതർക്ക് സർക്കാർ ധനസഹായം; അപേക്ഷിക്കേണ്ട തീയതി നീട്ടി

ക്വീൻസ്‌ലാൻഡിലെ വിവിധ പ്രദേശങ്ങളിൽ തുടർച്ചയായുണ്ടായ പ്രളയത്തെത്തുടർന്ന് ദുരിതമനുഭവിക്കുന്ന ജനങ്ങൾക്കും ബിസിനസ്സ് സ്ഥാപനങ്ങൾക്കും ആശ്വാസമായി ഫെഡറൽ-സംസ്ഥാന സർക്കാരുകൾ പുതിയ സാമ്പത്തിക സഹായ പദ്ധതികൾ പ്രഖ്യാപിച്ചു. ഫെഡറൽ സർക്കാരും (Albanese Government) ക്വീൻസ്‌ലാൻഡ് സർക്കാരും (Crisafulli Government) സംയുക്തമായാണ് ഈ ദുരിതാശ്വാസ ഫണ്ട് നൽകുന്നത്. തുടർച്ചയായ പ്രളയം മൂലം ബുദ്ധിമുട്ടുന്ന വെസ്റ്റേൺ ഡൗൺസ് മുതൽ ഡഗ്ലസ് ഷെയർ വരെയുള്ള വിവിധ പ്രദേശങ്ങളിലെ (Local Government Areas) ജനങ്ങൾക്കും, കർഷകർക്കും, കൗൺസിലുകൾക്കുമാണ് പുതിയ സഹായങ്ങൾ ലഭ്യമാക്കുന്നത്.

അടിയന്തര വ്യക്തിഗത സഹായം (Personal Hardship Assistance)

ഭക്ഷണം, വസ്ത്രം, മരുന്ന് തുടങ്ങിയ അവശ്യസാധനങ്ങൾ വാങ്ങാൻ ബുദ്ധിമുട്ടുന്നവർക്കാണ് ഈ അടിയന്തര ധനസഹായം നൽകുന്നത്.
പുതിയതായി ഉൾപ്പെടുത്തിയ പ്രദേശങ്ങൾ: നോർത്ത് ബർണറ്റ് (North Burnett), ബണ്ടബർഗിന്റെ കൂടുതൽ പ്രദേശങ്ങൾ, വെസ്റ്റേൺ ഡൗൺസ് (Western Downs).
സഹായത്തുക: ഒരു വ്യക്തിക്ക് $180 ലഭിക്കും. അഞ്ചോ അതിലധികമോ അംഗങ്ങളുള്ള ഒരു കുടുംബത്തിന് പരമാവധി $900 വരെ ലഭിക്കുന്നതാണ്.

അപേക്ഷിക്കാനുള്ള തീയതി നീട്ടി നൽകി

പ്രളയം രൂക്ഷമായി ബാധിച്ച താഴെ പറയുന്ന പ്രദേശങ്ങളിലെ അർഹരായവർക്ക് ‘എമർജൻസി ആൻഡ് എസൻഷ്യൽ സർവീസസ് ഹാർഡ്‌ഷിപ്പ് അസിസ്റ്റൻസിന്’ അപേക്ഷിക്കാനുള്ള തീയതി 2026 ഏപ്രിൽ 27 വരെ നീട്ടിയിട്ടുണ്ട്.
പ്രദേശങ്ങൾ: ബനാന (Banana), ബാർകാൽഡിൻ (Barcaldine), ബണ്ടബർഗ് (Bundaberg), കാർപെന്റാരിയ (Carpentaria), ഡൂമഡ്ഗീ (Doomadgee), ഡഗ്ലസ് (Douglas), ഫ്ലിൻഡേഴ്സ് (Flinders), ഗ്ലാഡ്സ്റ്റോൺ (Gladstone), നോർത്ത് ബർണറ്റ്, വെസ്റ്റേൺ ഡൗൺസ്.

കർഷകർക്കും ബിസിനസുകൾക്കുമുള്ള പ്രത്യേക സഹായങ്ങൾ

കാർഷിക മേഖലയെ പ്രളയം സാരമായി ബാധിച്ചതിനാൽ കർഷകർക്കും പ്രാദേശിക സ്ഥാപനങ്ങൾക്കും വലിയ സാമ്പത്തിക സഹായങ്ങളാണ് സർക്കാർ പ്രഖ്യാപിച്ചിരിക്കുന്നത്.
കർഷകർക്ക് (Primary Producers): ചാർട്ടേഴ്സ് ടവേഴ്സ് (Charters Towers), ഡഗ്ലസ്, ലോങ്‌റീച്ച് (Longreach), വെസ്റ്റേൺ ഡൗൺസ് എന്നീ പ്രദേശങ്ങളിലെ കർഷകർക്ക് $2 ദശലക്ഷം (2 million) വരെ ദുരിതാശ്വാസ വായ്പകളും, ചരക്കുകൂലി ഇനത്തിൽ സബ്സിഡിയായി $5,000 വരെയും ലഭിക്കും.
ലാഭേച്ഛയില്ലാതെ പ്രവർത്തിക്കുന്ന സ്ഥാപനങ്ങൾക്ക് (Not-for-profits): നോർത്ത് ബർണറ്റിലെ ഇത്തരം സ്ഥാപനങ്ങൾക്ക് $100,000 വരെ വായ്പ ലഭിക്കും.
കൗൺസിലുകൾക്ക്: റോഡുകൾ, പാലങ്ങൾ എന്നിവ പുനർനിർമ്മിക്കുന്നതിനും മറ്റ് ദുരിതാശ്വാസ പ്രവർത്തനങ്ങൾക്കും മാരാനോവ (Maranoa) കൗൺസിലിന് ഫണ്ട് അനുവദിക്കും.

മന്ത്രിമാരുടെ പ്രതികരണം

പ്രളയബാധിതരെ സഹായിക്കാൻ എല്ലാ തലങ്ങളിലുമുള്ള സർക്കാരുകൾ ഒറ്റക്കെട്ടായി പ്രവർത്തിക്കുകയാണെന്ന് ഫെഡറൽ എമർജൻസി മാനേജ്‌മെന്റ് മന്ത്രി ക്രിസ്റ്റി മക്ബെയ്ൻ വ്യക്തമാക്കി. ഈ സാമ്പത്തിക സഹായം കർഷകരെ വീണ്ടും കാലിമേയ്ക്കാനും കൃഷി തുടങ്ങാനും സഹായിക്കുമെന്ന് ഫെഡറൽ കൃഷി മന്ത്രി ജൂലി കോളിൻസും പറഞ്ഞു. സംസ്ഥാനത്തിന്റെ എല്ലാ കോണുകളിലുമുള്ള ദുരിതബാധിതർക്ക് സഹായം ഉറപ്പാക്കുകയാണ് തങ്ങളുടെ ലക്ഷ്യമെന്ന് ക്വീൻസ്‌ലാൻഡ് മന്ത്രിമാരായ ആൻ ലീഹിയും ടോണി പെരെറ്റും അറിയിച്ചു.

എങ്ങനെ അപേക്ഷിക്കാം?

വ്യക്തിഗത ധനസഹായത്തിന് അർഹതയുണ്ടോ എന്ന് പരിശോധിക്കാനും അപേക്ഷിക്കാനും www.disaster.qld.gov.au എന്ന വെബ്സൈറ്റ് സന്ദർശിക്കുക. അല്ലെങ്കിൽ കമ്മ്യൂണിറ്റി റിക്കവറി ഹോട്ട്‌ലൈൻ നമ്പറായ 1800 173 349-ൽ വിളിക്കാവുന്നതാണ്.കർഷകർക്കും ബിസിനസുകൾക്കുമുള്ള വായ്പാ വിവരങ്ങൾക്ക് www.qrida.qld.gov.au എന്ന വെബ്സൈറ്റ് സന്ദർശിക്കുക.