രാജ്യത്തെ ഇന്ധന വിതരണവും വിലക്കയറ്റവും: സുപ്രധാന തീരുമാനങ്ങളുമായി പ്രധാനമന്ത്രി 

മിഡിൽ ഈസ്റ്റിലെ യുദ്ധം ആഗോളതലത്തിൽ ഉണ്ടാക്കുന്ന പ്രതിസന്ധികൾ ഓസ്‌ട്രേലിയയിലെ ജീവിതച്ചെലവുകളെയും (Cost of Living) ബാധിക്കുന്നുണ്ടെന്ന് സർക്കാർ വ്യക്തമാക്കി. എന്നാൽ ഇന്ധനക്ഷാമം പരിഹരിക്കാൻ ഊർജ്ജിതമായ നടപടികൾ സ്വീകരിച്ചിട്ടുണ്ടെന്ന് പ്രധാനമന്ത്രി ആൻ്റണി അൽബനീസീയും കാലാവസ്ഥാ-ഊർജ്ജ വകുപ്പ് മന്ത്രി ക്രിസ് ബോവനും ഇന്ന് ക്യാൻബെറ പാർലമെൻ്റ് ഹൗസിൽ നടത്തിയ വാർത്താസമ്മേളനത്തിൽ അറിയിച്ചു.

ഈസ്റ്റർ അവധിക്ക് വിമാനയാത്ര പ്ലാൻ ചെയ്യുന്നവർക്ക് ആശ്വാസമായി, ഏപ്രിൽ 8-നുള്ളിൽ ചൈനയിൽ നിന്നും മറ്റുമായി 6 ടാങ്കർ ജെറ്റ് ഇന്ധനം ഓസ്‌ട്രേലിയയിൽ എത്തും. വിമാന സർവീസുകളെ ഇത് ബാധിക്കില്ല.

പ്രാദേശിക ഇന്ധനക്ഷാമം (Regional Shortages): ഡിമാൻഡ് പെട്ടെന്ന് വർദ്ധിച്ചതാണ് റീജിയണൽ മേഖലകളിലെ പെട്രോൾ പമ്പുകളിൽ ക്ഷാമത്തിന് കാരണമായത്. എന്നാൽ, ആംപോൾ (Ampol), വിവ (Viva) തുടങ്ങിയ കമ്പനികൾ വഴി റീജിയണൽ ന്യൂ സൗത്ത് വെയിൽസിലേക്കും ക്വീൻസ്‌ലാൻഡിലേക്കും വെസ്റ്റേൺ ആസ്‌ട്രേലിയയിലേക്കുമുള്ള ഇന്ധന വിതരണം 30% മുതൽ 47% വരെ വർദ്ധിപ്പിച്ചിട്ടുണ്ട്.

പുതിയ ഓർഡറുകൾ: റദ്ദാക്കപ്പെട്ട 6 കപ്പൽ ഇന്ധനത്തിന് പകരം പുതിയ ഓർഡറുകൾ നൽകുകയും, അധികമായി 3 കാർഗോകൾ കൂടി ഓർഡർ ചെയ്യുകയും ചെയ്തിട്ടുണ്ട്. അതിനാൽ വരും ആഴ്ചകളിൽ ഇന്ധന ലഭ്യത സാധാരണയേക്കാൾ കൂടുതലായിരിക്കും.

ഇന്ധന നികുതി (Fuel Excise) കുറയ്ക്കില്ല

അതെസമയം, പെട്രോൾ വില കുറയ്ക്കുന്നതിനായി ഇന്ധന നികുതി പകുതിയാക്കണം എന്ന പ്രതിപക്ഷത്തിന്റെ ആവശ്യം പ്രധാനമന്ത്രി തള്ളി. പകരം, വൈദ്യുതി ബിൽ 90% വരെ കുറയ്ക്കാൻ സഹായിക്കുന്ന ‘ചീപ്പർ ഹോം ബാറ്ററി പോളിസി’ (Cheaper Home Batteries Policy) പോലുള്ള പദ്ധതികളിലൂടെ ജനങ്ങൾക്ക് ആശ്വാസം നൽകാനാണ് സർക്കാർ ശ്രമിക്കുന്നത്.

തിങ്കളാഴ്ച നാഷണൽ ക്യാബിനറ്റ്

കോവിഡ് കാലത്തെ പാളിച്ചകളിൽ നിന്ന് പാഠം ഉൾക്കൊണ്ട്, നിലവിലെ ആഗോള പ്രതിസന്ധിയും ഇന്ധന വിതരണവും മികച്ച രീതിയിൽ കൈകാര്യം ചെയ്യാൻ തിങ്കളാഴ്ച പ്രധാനമന്ത്രിയുടെ നേതൃത്വത്തിൽ നാഷണൽ ക്യാബിനറ്റ് ചേരും. പെട്രോൾ പമ്പുകളിലെ സ്റ്റോക്ക് വിവരങ്ങൾ കൃത്യമായി ജനങ്ങളിൽ എത്തിക്കാൻ സംസ്ഥാന സർക്കാരുകൾക്ക് നിർദ്ദേശം നൽകിയിട്ടുണ്ട്. കൂടാതെ, മലേഷ്യയുമായുള്ള മികച്ച നയതന്ത്ര ബന്ധം വഴി ഓസ്‌ട്രേലിയയിലേക്കുള്ള ഇന്ധന ഇറക്കുമതി തടസ്സമില്ലാതെ നടക്കുന്നുണ്ടെന്നും മന്ത്രി ക്രിസ് ബോവൻ അറിയിച്ചു.