മിഡിൽ ഈസ്റ്റ് സംഘർഷം: ദുബായിൽ നിന്നുള്ള ആദ്യ വിമാനം ഇന്ന് രാത്രി സിഡ്നിയിലെത്തും
ഫെബ്രുവരി 28-ന് ആരംഭിച്ച ഇറാൻ-യു.എസ്-ഇസ്രായേൽ സംഘർഷത്തിന് ശേഷം മിഡിൽ ഈസ്റ്റിൽ നിന്നുള്ള ആദ്യ വാണിജ്യ വിമാനമായ എമിറേറ്റ്സ് EK414 (A380) ഓസ്ട്രേലിയയിലേക്ക് യാത്ര തിരിച്ചു. ദുബായ് സമയം പുലർച്ചെ 2:08-ന് പുറപ്പെട്ട വിമാനം രാത്രിയോടെ സിഡ്നിയിൽ എത്തും
ആകെ 404 യാത്രികരുള്ള ഈ വിമാനത്തിൽ 200-ലധികം ഓസ്ട്രേലിയൻ പൗരന്മാരുണ്ട്. 13 മണിക്കൂറിലധികം നീളുന്ന യാത്രയ്ക്കൊടുവിൽ വിമാനം ഇന്ന് രാത്രി 10:27-ഓടെ സിഡ്നി കിംഗ്സ്ഫോർഡ് സ്മിത്ത് വിമാനത്താവളത്തിൽ ഇറങ്ങുമെന്നാണ് ഏറ്റവും പുതിയ വിവരം.
ചരിത്രത്തിലെ ഏറ്റവും വലിയ കോൺസുലർ പ്രതിസന്ധി
യു.എ.ഇയിൽ മാത്രമുള്ള 24,000 പേർ ഉൾപ്പെടെ, 1,15,000-ത്തിലധികം ഓസ്ട്രേലിയക്കാരാണ് മിഡിൽ ഈസ്റ്റിൽ കുടുങ്ങിക്കിടക്കുന്നത്. രാജ്യത്തിന്റെ ചരിത്രത്തിലെ തന്നെ ഏറ്റവും വലിയ കോൺസുലർ പ്രതിസന്ധിയായാണ് ഓസ്ട്രേലിയൻ സർക്കാർ ഇതിനെ വിലയിരുത്തുന്നത്. വ്യോമപാതകൾ അടഞ്ഞതോടെ പലരും ഹോട്ടലുകളിൽ ദിവസങ്ങളായി കാത്തിരിക്കുകയാണ്. ആയിരക്കണക്കിന് ഡോളറുകൾ മുടക്കി സ്വകാര്യ വിമാനങ്ങൾ വഴിയും, ഒമാൻ പോലെയുള്ള സ്ഥലങ്ങളിലേക്ക് കരമാർഗ്ഗവും രക്ഷപ്പെടാൻ ചിലർ ശ്രമിക്കുന്നുണ്ട്.
സർക്കാർ നടപടികൾ ഊർജ്ജിതം
ഓസ്ട്രേലിയക്കാരെ സുരക്ഷിതമായി നാട്ടിലെത്തിക്കാൻ സർക്കാർ ഇടപെടലുകൾ ശക്തമാക്കി. വിദേശകാര്യ മന്ത്രി പെന്നി വോങ് ആറ് ക്രൈസിസ് റെസ്പോൺസ് ടീമുകളെ മേഖലയിലേക്ക് അയച്ചു. വാണിജ്യ വിമാന സർവീസുകൾ പുനരാരംഭിക്കുന്നതിനായി പ്രധാനമന്ത്രി ആന്റണി ആൽബനീസി യു.എ.ഇ പ്രസിഡന്റുമായി നേരിട്ട് ചർച്ച നടത്തി. 1.15 ലക്ഷം പേരെ ഒഴിപ്പിക്കാൻ സൈനിക വിമാനങ്ങളേക്കാൾ വാണിജ്യ വിമാനങ്ങളാണ് പ്രായോഗികമെന്നാണ് സർക്കാരിന്റെ നിലപാട്.
ഇറാൻ, ഇറാഖ്, ഇസ്രായേൽ എന്നീ രാജ്യങ്ങൾക്ക് മുകളിലെ വ്യോമപാതകൾ ഇപ്പോഴും അടഞ്ഞുകിടക്കുന്നതിനാലും മിസൈൽ ഭീഷണികൾ നിലനിൽക്കുന്നതിനാലും സാഹചര്യങ്ങൾ സങ്കീർണ്ണമാണ്. അതിനാൽ തുടർന്നുള്ള വിമാന സർവീസുകളുടെ കാര്യത്തിൽ യാതൊരു ഉറപ്പുമില്ല. യാത്രക്കാർ സുരക്ഷിത സ്ഥാനങ്ങളിൽ തുടരണമെന്നും, എയർലൈനുകളുമായി നിരന്തരം ബന്ധപ്പെടണമെന്നുമാണ് അധികൃതരുടെ നിർദ്ദേശം.
