സൗത്ത് ഓസ്ട്രേലിയയിൽ മിന്നൽ പ്രളയ മുന്നറിയിപ്പ് ഔട്ട്‌ഡോർ പരിപാടികൾ മാറ്റിവെച്ചു

സൗത്ത് ഓസ്‌ട്രേലിയയിൽ മിന്നൽ പ്രളയ മുന്നറിയിപ്പ്; നോർത്ത് ഈസ്റ്റ് മേഖലകളിൽ ജാഗ്രതാ നിർദ്ദേശവുമായി സ്റ്റേറ്റ് എമർജൻസി സർവീസ് (SES) . ഈ  മാസം 23 മുതൽ സൗത്ത് ഓസ്‌ട്രേലിയയിൽ തുടരുന്ന അപൂർവ്വമായ മൺസൂൺ ന്യൂനമർദ്ദം (monsoon low) സംസ്ഥാനത്ത് വലിയ പ്രതിസന്ധി സൃഷ്ടിക്കുന്നു. ഇതിന്റെ പശ്ചാത്തലത്തിൽ സംസ്ഥാനത്തിന്റെ വടക്കുകിഴക്കൻ (North East), ഔട്ട്ബാക്ക് (Outback) മേഖലകളിൽ SES പുതിയ പ്രളയ മുന്നറിയിപ്പ് പുറപ്പെടുവിച്ചു.

 വടക്കുപടിഞ്ഞാറൻ ഭാഗങ്ങളിൽ ഇതിനോടകം ആരംഭിച്ച അതിശക്തമായ മഴ, ശനിയാഴ്ചയോടെ ഐർ (Eyre), യോർക്ക് (Yorke) പെനിൻസുലകളിലേക്കും ഞായറാഴ്ചയോടെ തലസ്ഥാന നഗരിയായ അഡ്ലെയ്ഡിലേക്കും (Adelaide) വ്യാപിക്കുമെന്നാണ് കാലാവസ്ഥാ വകുപ്പിന്റെ (BOM) ഏറ്റവും പുതിയ പ്രവചനം. നോർത്തേൺ ടെറിട്ടറിയിൽ രൂപപ്പെട്ട ന്യൂനമർദ്ദം തെക്കോട്ട് നീങ്ങുന്നതാണ് സംസ്ഥാനത്ത് വ്യാപകമായ മഴയ്ക്കും ഇടിമിന്നലിനും കാരണമാകുന്നത്.

അടുത്ത 24 മണിക്കൂറിനുള്ളിൽ പാസ്റ്ററൽ ജില്ലകളിൽ ഉൾപ്പെടെ ശരാശരി 40 മുതൽ 80 മില്ലിമീറ്റർ വരെയും, ചിലയിടങ്ങളിൽ 100 മുതൽ 120 മില്ലിമീറ്റർ വരെയും മഴ ലഭിക്കാൻ സാധ്യതയുണ്ട്. 

മിഡ് നോർത്ത്, നോർത്ത് വെസ്റ്റ് പാസ്റ്ററൽ, സൗത്ത് ഈസ്റ്റ്, മൗണ്ട് ലോഫ്റ്റി റേഞ്ചസ് ഉൾപ്പെടെ സംസ്ഥാനത്തിന്റെ ഭൂരിഭാഗം പ്രദേശങ്ങളിലും പ്രളയമുന്നറിയിപ്പുള്ളതിനാൽ (Flood Watch) ജനങ്ങൾ ഇപ്പോഴേ മുൻകരുതലുകൾ എടുക്കണമെന്ന് പ്രീമിയർ പീറ്റർ മാലിനോസ്കാസ് ആവശ്യപ്പെട്ടു. അപകടസാധ്യത കണക്കിലെടുത്ത് ഈ വാരാന്ത്യത്തിൽ നടക്കാനിരുന്ന നിരവധി ഔട്ട്‌ഡോർ പരിപാടികൾ ഇതിനോടകം റദ്ദാക്കുകയോ മാറ്റിവെക്കുകയോ ചെയ്തിട്ടുണ്ട്.

അതിവേഗം ഉയരുന്ന ജലനിരപ്പും പ്രതിരോധ പ്രവർത്തനങ്ങളും

വടക്കൻ മേഖലകളിൽ നദികളിലെയും തോടുകളിലെയും ജലനിരപ്പ് അതിവേഗം ഉയരുകയാണ്. പലയിടങ്ങളിലും തോടുകൾ കരകവിഞ്ഞൊഴുകുകയും റോഡുകൾ വെള്ളത്തിനടിയിലാവുകയും ചെയ്തിട്ടുണ്ട്. ശക്തമായ കാറ്റിനേക്കാൾ പെട്ടെന്നുണ്ടാകുന്ന വെള്ളപ്പൊക്കമാണ് (Flash flooding) നിലവിൽ വലിയ അപകടസാധ്യത ഉയർത്തുന്നത്.

 വെള്ളപ്പൊക്ക പ്രതിരോധ പ്രവർത്തനങ്ങളുടെ ഭാഗമായി നാളെ മുതൽ വിവിധ കേന്ദ്രങ്ങളിലൂടെ ജനങ്ങൾക്ക് മണൽച്ചാക്കുകൾ (sandbags) വിതരണം ചെയ്യുമെന്ന് SES അറിയിച്ചു. ഇതിന്റെ കൃത്യമായ വിവരങ്ങൾ കമ്മ്യൂണിറ്റി അപ്‌ഡേറ്റിലൂടെ ജനങ്ങളെ അറിയിക്കുന്നതാണ്.

SES നൽകുന്ന പ്രധാന സുരക്ഷാ നിർദ്ദേശങ്ങൾ:

പൊതുജനങ്ങൾ സുരക്ഷയ്ക്കായി താഴെ പറയുന്ന മുൻകരുതലുകൾ നിർബന്ധമായും സ്വീകരിക്കണം:

വിലപിടിപ്പുള്ളവ സുരക്ഷിതമാക്കുക: വീടുകളിൽ വെള്ളം കയറാൻ സാധ്യതയുള്ളതിനാൽ വിലപിടിപ്പുള്ള വസ്തുക്കൾ ഉയർന്നതും സുരക്ഷിതവുമായ സ്ഥലങ്ങളിലേക്ക് മാറ്റുക.

ഡ്രെയിനുകൾ വൃത്തിയാക്കുക: മഴവെള്ളം സുഗമമായി ഒഴുകിപ്പോകാൻ വീടിന് ചുറ്റുമുള്ള ഡ്രെയിനുകളും ഗട്ടറുകളും വൃത്തിയാക്കുക (ഇത് സുരക്ഷിതമാണെങ്കിൽ മാത്രം ചെയ്യുക).

പ്രളയജലം ഒഴിവാക്കുക: യാതൊരു കാരണവശാലും വെള്ളക്കെട്ടുകളിലൂടെയോ പ്രളയജലത്തിലൂടെയോ വാഹനമോടിക്കുകയോ നടക്കുകയോ ചെയ്യരുത്. കുട്ടികളെ വെള്ളക്കെട്ടുകൾക്ക് സമീപം കളിക്കാൻ അനുവദിക്കരുത്.

സുരക്ഷിത അകലം പാലിക്കുക: തോടുകൾക്കും അരുവികൾക്കും സമീപം വാഹനങ്ങൾ പാർക്ക് ചെയ്യുകയോ ക്യാമ്പ് ചെയ്യുകയോ അരുത്.

റോഡ് നിയമങ്ങൾ പാലിക്കുക: അടച്ചിട്ടിരിക്കുന്ന റോഡുകളിലൂടെയുള്ള യാത്ര പൂർണ്ണമായും ഒഴിവാക്കുക. മുന്നറിയിപ്പ് ബോർഡുകൾ കർശനമായി പാലിക്കുക.

വരണ്ട വേനൽക്കാലത്തിന് ശേഷം ലഭിക്കുന്ന ഈ മഴ കർഷകർക്കും അണക്കെട്ടുകൾക്കും വലിയൊരാശ്വാസമാണെങ്കിലും, മിന്നൽ പ്രളയം വലിയ നാശനഷ്ടങ്ങൾക്ക് കാരണമായേക്കാം. അതിനാൽ പൊതുജനങ്ങൾ കാലാവസ്ഥാ വകുപ്പിന്റെയും SES-ന്റെയും ഔദ്യോഗിക മുന്നറിയിപ്പുകൾ കൃത്യമായി പിന്തുടരണം.

പ്രധാനപ്പെട്ട എമർജൻസി നമ്പറുകൾ:

• SES സഹായത്തിന്: 132 500
• ജീവന് ഭീഷണിയുള്ള അടിയന്തര സാഹചര്യങ്ങളിൽ: 000 (Triple Zero)
• SA എമർജൻസി ഇൻഫോലൈൻ: 1800 362 361