മുൻ രാജകുമാരന് എതിരെയുള്ള എപ്സ്റ്റീൻ വെളിപ്പെടുത്തൽ: പ്രതികരിച്ച് വില്യമും കാതറിനും
ലണ്ടൻ: ബ്രിട്ടീഷ് രാജകുടുംബത്തെ പിടിച്ചുകുലുക്കിയ ജെഫ്രി എപ്സ്റ്റീൻ കേസിലെ പുതിയ രേഖകൾ പുറത്തുവന്നതിന് പിന്നാലെ, വിഷയത്തിൽ ആദ്യമായി പ്രതികരിച്ച് വെയിൽസ് രാജകുമാരൻ വില്യമും രാജകുമാരി കാതറിനും. എപ്സ്റ്റീൻ ഫയലുകളിലെ പുതിയ വിവരങ്ങളിൽ തങ്ങൾക്ക് കടുത്ത ആശങ്കയുണ്ടെന്നും, തങ്ങളുടെ പിന്തുണ എപ്പോഴും ഇരകൾക്കൊപ്പമാണെന്നും കെൻസിങ്ടൺ പാലസ് പുറത്തിറക്കിയ ഔദ്യോഗിക കുറിപ്പിൽ വ്യക്തമാക്കി. ഇന്നാണ് ഈ പ്രസ്താവന പുറത്തുവന്നത്.
എപ്സ്റ്റീനുമായുള്ള ബന്ധത്തെത്തുടർന്ന് രാജകുടുംബത്തിന് നാണക്കേടുണ്ടാക്കിയ പിതൃസഹോദരൻ ആൻഡ്രൂവിനെ (മുൻ രാജകുമാരൻ) പൂർണ്ണമായും തള്ളിപ്പറയുന്നതാണ് വില്യമിന്റെയും കേറ്റിന്റെയും ഈ നീക്കം.
ആൻഡ്രൂവിന് വീണ്ടും തിരിച്ചടി പുതിയ വെളിപ്പെടുത്തലുകൾക്ക് പിന്നാലെ ആൻഡ്രൂവിനെതിരായ നടപടികൾ രാജകുടുംബം വേഗത്തിലാക്കി. വിൻഡ്സർ കാസിലിനടുത്തുള്ള വസതിയായ റോയൽ ലോഡ്ജിൽ നിന്ന് അദ്ദേഹത്തിന് മാറേണ്ടി വന്നു. നോർഫോക്കിലെ സാൻഡ്രിങ്ഹാം എസ്റ്റേറ്റിലേക്കാണ് അദ്ദേഹം താത്കാലികമായി മാറിയിരിക്കുന്നത്. വർഷാവസാനം നടക്കേണ്ടിയിരുന്ന ഈ മാറ്റം, പുതിയ വിവാദങ്ങളുടെ പശ്ചാത്തലത്തിൽ രാജകുടുംബം തിടുക്കത്തിൽ നടപ്പിലാക്കുകയായിരുന്നു.
ആൻഡ്രൂ എപ്സ്റ്റീനുമായി ബ്രിട്ടീഷ് വ്യാപാര രേഖകൾ പങ്കുവെച്ചെന്ന ഗുരുതരമായ ആരോപണമാണ് പുതിയ രേഖകളിലുള്ളത്. കൂടാതെ, കൂടുതൽ വിവാദ ചിത്രങ്ങളും കത്തുകളും പുറത്തുവന്നതും സ്ഥിതി വഷളാക്കി. സഹോദരന്റെ പ്രവൃത്തികൾ രാജകുടുംബത്തിന്റെ പ്രതിച്ഛായയ്ക്ക് മങ്ങലേൽപ്പിച്ചതോടെ ചാൾസ് രാജാവ് കർശന നടപടികളാണ് സ്വീകരിച്ചിരിക്കുന്നത്. ആൻഡ്രൂവിന്റെ രാജകീയ പദവികളും സൈനിക ബഹുമതികളും കഴിഞ്ഞ ഒക്ടോബറിൽ തന്നെ നീക്കം ചെയ്തിരുന്നു.
വില്യം രാജകുമാരൻ സൗദി അറേബ്യ സന്ദർശിക്കാനിരിക്കെയാണ് ഈ പ്രസ്താവന എന്നതും ശ്രദ്ധേയമാണ്. ഉന്നതരെ ബാധിക്കുന്ന കൂടുതൽ വിവരങ്ങൾ പുറത്തുവരുന്ന സാഹചര്യത്തിൽ അന്വേഷണം പുരോഗമിക്കുകയാണ്.
