മെൽബണിൽ മോഷ്ടിച്ച കാറുമായി പൊലീസ് വാഹനങ്ങളിൽ ഇടിച്ച് 16-കാരൻ; കേസ്

മെൽബൺ: മോഷ്ടിച്ച കാർ ഉപയോഗിച്ച് പോലീസ് വാഹനങ്ങളിൽ ഇടിച്ചുകയറ്റിയ സംഭവത്തിൽ 16-കാരനെതിരെ വിക്ടോറിയ പോലീസ് കേസെടുത്തു. മെൽബണിലെ ഹോപ്പേഴ്‌സ് ക്രോസിംഗിൽ ഇന്ന്  പുലർച്ചെ 1.30-ഓടെയാണ് സംഭവം.

ഗെഡെസ് ക്രസന്റിൽ പാർക്ക് ചെയ്തിരുന്ന ഹ്യുണ്ടായ് ഗെറ്റ്‌സ് കാർ പരിശോധിക്കാൻ ഡോഗ് സ്‌ക്വാഡ് ഉദ്യോഗസ്ഥർ എത്തിയപ്പോഴാണ് കുട്ടി വാഹനം വെട്ടിച്ച് പോലീസ് ജീപ്പുകളിലേക്ക് ഇടിച്ചുകയറ്റിയത്. ജനുവരി 31-ന് ടാർനെറ്റിലെ ഒരു ജിമ്മിൽ നിന്ന് മോഷ്ടിച്ചതാണ് ഈ കാറെന്ന് പോലീസ് കണ്ടെത്തി.

ഭാഗ്യവശാൽ സംഭവത്തിൽ ആർക്കും പരിക്കില്ല. വാഹനത്തിലുണ്ടായിരുന്ന 16-കാരനായ ഡ്രൈവറെയും 14-കാരനായ യാത്രക്കാരനെയും പോലീസ് പിടികൂടി.

പോലീസ് ഉദ്യോഗസ്ഥരെ അപകടപ്പെടുത്തുന്ന രീതിയിൽ വാഹനം ഓടിക്കൽ, മോഷണം, ലൈസൻസില്ലാതെ വണ്ടിയോടിക്കൽ എന്നീ കുറ്റങ്ങൾ ചുമത്തി. ഇയാളെ പിന്നീട് ജാമ്യത്തിൽ വിട്ടു; കുട്ടികളുടെ കോടതിയിൽ ഹാജരാകണം. 14 വയസുള്ള യാത്രക്കാരന്  താക്കീത് നൽകി വിട്ടയച്ചു.

കുട്ടികളുടെ കുറ്റകൃത്യങ്ങൾ വർദ്ധിക്കുന്ന സാഹചര്യത്തിൽ പോലീസ് നിരീക്ഷണം ശക്തമാക്കിയിട്ടുണ്ട്.