വിക്ടോറിയയിൽ വർക്ക് ഫ്രം ഹോം നിയമമാകുന്നു: ജീവനക്കാർക്ക് ആഴ്ചയിൽ രണ്ട് ദിവസം Work From Home Victoria അനുവദിക്കും

ഓസ്‌ട്രേലിയയിലെ വിക്ടോറിയയിൽ ജോലി ചെയ്യുന്ന മലയാളികൾ ഉൾപ്പെടെയുള്ള ആയിരക്കണക്കിന് ജീവനക്കാർക്ക് ആശ്വാസമായി സംസ്ഥാന സർക്കാരിന്റെ പുതിയ പ്രഖ്യാപനം. ജീവനക്കാരുടെ വർക്ക് ഫ്രം ഹോം (WFH) അവകാശങ്ങൾ സംരക്ഷിക്കുന്നതിനായി പുതിയ work from home victoria നിയമം സംസ്ഥാന ലേബർ സർക്കാർ പാർലമെന്റിൽ അവതരിപ്പിച്ചു. പുതിയ നിയമം പ്രാബല്യത്തിൽ വരുന്നതോടെ ജീവനക്കാർക്ക് ആഴ്ചയിൽ രണ്ട് ദിവസം വർക്ക് ഫ്രം ഹോം എന്നത് നിയമപരമായ അവകാശമായി മാറും.

സെപ്റ്റംബർ 1 മുതൽ നിയമം പ്രാബല്യത്തിൽ

പുതിയ വർക്ക് ഫ്രം ഹോം നിയമങ്ങൾ 2026 സെപ്റ്റംബർ 1 ചൊവ്വാഴ്ച മുതൽ വിക്ടോറിയയിൽ പ്രാബല്യത്തിൽ വരും. ഇതിനായി 2010-ലെ ഈക്വൽ ഓപ്പർച്യുണിറ്റി ആക്ടിൽ (Equal Opportunity Act 2010) ഭേദഗതി വരുത്തിക്കൊണ്ടുള്ള ബിൽ വിക്ടോറിയൻ പാർലമെന്റിൽ അവതരിപ്പിച്ചു കഴിഞ്ഞു. പുതിയ നിയമപ്രകാരം, വീട്ടിലിരുന്ന് ജോലി ചെയ്യാൻ സാധിക്കുന്ന തസ്തികകളിലുള്ള ജീവനക്കാർക്ക് ആഴ്ചയിൽ രണ്ട് ദിവസം അതിനുള്ള നിയമപരമായ അവകാശമുണ്ടായിരിക്കും.

സ്ഥിരമായി ജോലി ചെയ്യുന്ന കാഷ്വൽ (Casual), പാർട്ട് ടൈം (Part-time) ജീവനക്കാർക്കും പുതിയ നിയമത്തിന്റെ പരിരക്ഷ ലഭിക്കുമെന്ന് സർക്കാർ വ്യക്തമാക്കിയിട്ടുണ്ട്. അതേസമയം, 15-ൽ താഴെ ജീവനക്കാരുള്ള ചെറുകിട സ്ഥാപനങ്ങൾക്ക് തങ്ങളുടെ പോളിസികളിൽ മാറ്റം വരുത്താൻ കൂടുതൽ സമയം അനുവദിച്ചിട്ടുണ്ട്. ഇത്തരം സ്ഥാപനങ്ങൾക്ക് 2027 ജൂലൈ 1 മുതലാണ് പുതിയ നിയമം ബാധകമാവുക.

സാമ്പത്തിക ലാഭവും സമയലാഭവും

കുടുംബങ്ങൾക്ക് വർക്ക് ഫ്രം ഹോം സിസ്റ്റം വളരെ സഹായകരമാണെന്ന് വിക്ടോറിയൻ പ്രീമിയർ ജസീന്റ അലൻ (Jacinta Allan) വ്യക്തമാക്കി. വർക്ക് ഫ്രം ഹോം ലഭിക്കുന്നതിലൂടെ വിക്ടോറിയയിലെ ഒരു തൊഴിലാളിക്ക് യാത്രാച്ചെലവുകളിൽ ആഴ്ചയിൽ ശരാശരി 110 ഡോളറും വർഷത്തിൽ 5,308 ഡോളറും ലാഭിക്കാൻ കഴിയുന്നുണ്ടെന്ന് സർക്കാർ കണക്കുകൾ ചൂണ്ടിക്കാട്ടുന്നു. യാത്രാസമയം ഒഴിവാകുന്നതിലൂടെ ആഴ്ചയിൽ ശരാശരി മൂന്ന് മണിക്കൂർ ലാഭിക്കാനും ജീവനക്കാർക്ക് സാധിക്കുന്നു.

വിക്ടോറിയയിലെ 60 ശതമാനം പ്രൊഫഷണലുകളും ഉൾപ്പെടെ മൂന്നിലൊന്ന് ജീവനക്കാരും നിലവിൽ വർക്ക് ഫ്രം ഹോം സൗകര്യം പ്രയോജനപ്പെടുത്തുന്നുണ്ട്. കോവിഡ് മഹാമാരിക്ക് മുമ്പുള്ളതിനേക്കാൾ 4.4 ശതമാനം കൂടുതലാണ് ഇപ്പോഴത്തെ തൊഴിൽ പങ്കാളിത്തമെന്നും സർക്കാർ വിലയിരുത്തുന്നു.

തർക്കപരിഹാരത്തിന് പുതിയ സംവിധാനങ്ങൾ

ന്യായമായ വർക്ക് ഫ്രം ഹോം അപേക്ഷകൾ തൊഴിലുടമകൾ നിരസിക്കുന്നതായി യൂണിയനുകൾക്ക് സ്ഥിരമായി പരാതികൾ ലഭിക്കുന്നുണ്ട്. ഇത് പരിഹരിക്കാൻ ലക്ഷ്യമിട്ടാണ് സർക്കാർ പുതിയ നിയമം കൊണ്ടുവരുന്നത്. നിയമം പ്രാബല്യത്തിൽ വരുന്നതോടെ തൊഴിലുടമയും ജീവനക്കാരും തമ്മിലുണ്ടാകുന്ന ഇത്തരം തർക്കങ്ങൾ പരിഹരിക്കാൻ വ്യക്തമായ സംവിധാനമുണ്ടാകും.

തർക്കങ്ങൾ പരിഹാരത്തിനായി വിക്ടോറിയൻ ഈക്വൽ ഓപ്പർച്യുണിറ്റി ആൻഡ് ഹ്യൂമൻ റൈറ്റ്സ് കമ്മീഷനിലേക്കോ (VEOHRC) വിക്ടോറിയൻ സിവിൽ ആൻഡ് അഡ്മിനിസ്ട്രേറ്റീവ് ട്രൈബ്യൂണലിലേക്കോ (VCAT) റഫർ ചെയ്യാം. കമ്മീഷന്റെ മധ്യസ്ഥതയിൽ പരിഹരിക്കാൻ കഴിയാത്ത വിഷയങ്ങൾ പിന്നീട് വികാറ്റിൽ (VCAT) കേൾക്കും. വർക്ക് ഫ്രം ഹോം അവകാശങ്ങൾ ജീവനക്കാർക്കും കുടുംബങ്ങൾക്കും സാമ്പത്തിക വ്യവസ്ഥയ്ക്കും ഗുണകരമാണെന്ന് ഇൻഡസ്ട്രിയൽ റിലേഷൻസ് മന്ത്രി ജാക്വലിൻ സിംസ് (Jaclyn Symes) പ്രതികരിച്ചു.

Sajin Thiruvallam
News Editor