ഗർഭിണിയുൾപ്പെടെ മൂന്നുപേരെ കൊലപ്പെടുത്തിയ പ്രതിക്കായുള്ള തിരച്ചിൽ : നിർണ്ണായക വിവരങ്ങളുമായി രണ്ടു യുവതികൾ
പെർത്ത്: ഗർഭിണിയായ മുൻ കാമുകിയുൾപ്പെടെ മൂന്ന് പേരെ ക്രൂരമായി കൊലപ്പെടുത്തിയ ശേഷം ഒളിവിലായിരുന്ന പ്രതിയെക്കുറിച്ചുള്ള നിർണ്ണായക വിവരങ്ങൾ പുറത്ത്. ന്യൂ സൗത്ത് വെയിൽസിലെ ലേക്ക് കാർഗെല്ലിഗോയിൽ നടന്ന ദാരുണമായ കൊലപാതകങ്ങൾക്ക് ശേഷം കാണാതായ മുപ്പത്തിയേഴുകാരൻ ജൂലിയൻ ഇൻഗ്രാമിനെയാണ് പോലീസ് തിരയുന്നത്. ഇയാൾക്കായി ലാക്ലാൻ നദി കേന്ദ്രീകരിച്ച് പോലീസ് തിരച്ചിൽ ഊർജിതമാക്കി.
കഴിഞ്ഞ ശനിയാഴ്ച രാത്രി മൗണ്ട് ഹോപ്പിലെ വിജനമായ പ്രദേശത്ത് വെച്ച് രണ്ട് സ്ത്രീകൾ പ്രതിയെ നേരിട്ടു കണ്ടതാണ് അന്വേഷണത്തിൽ വഴിത്തിരിവായത്. ആമി, ചെൽസി എന്നീ യുവതികളാണ് പ്രതിയെ തിരിച്ചറിഞ്ഞത്. തങ്ങളുടെ കൃഷിയിടത്തിൽ സംശയാസ്പദമായ സാഹചര്യത്തിൽ ഒരാളെ കണ്ട ഇവർ പോലീസിനെ വിവരമറിയിക്കുകയായിരുന്നു. ഇവർക്ക് നേരെ പ്രതി തോക്ക് ചൂണ്ടിയതായും ഇവർ വെളിപ്പെടുത്തി. ഇവർ നൽകിയ വിവരങ്ങളിൽ നിന്നാണ് ആയുധധാരിയായ വ്യക്തി ജൂലിയൻ ഇൻഗ്രാം തന്നെയാണെന്ന് പോലീസ് സ്ഥിരീകരിച്ചത്.
ജനുവരി 22-നാണ് നാടിനെ നടുക്കിയ കൊലപാതകം നടന്നത്. തന്റെ മുൻ പങ്കാളിയായ സോഫി ക്വിൻ, സോഫിയുടെ ആന്റി നെരിഡ, സുഹൃത്ത് ജോൺ ഹാരിസ് എന്നിവരെയാണ് ജൂലിയൻ കൊലപ്പെടുത്തിയത്. കൊല്ലപ്പെടുമ്പോൾ സോഫി ഗർഭിണിയായിരുന്നു എന്നത് സംഭവത്തിന്റെ ഗൗരവം വർദ്ധിപ്പിക്കുന്നു. കൃത്യം നടക്കുന്നതിന് മണിക്കൂറുകൾക്ക് മുൻപ് ഇയാൾ പ്രദേശത്തെ സ്ത്രീകളായ ട്രാഫിക് കൺട്രോളർമാർക്ക് റോസാപ്പൂക്കൾ സമ്മാനിച്ചിരുന്നതായും റിപ്പോർട്ടുകളുണ്ട്.
പ്രതി ആയുധധാരിയായതിനാൽ അതീവ ജാഗ്രതയോടെയാണ് പോലീസ് നീങ്ങുന്നത്. ലേക്ക് കാർഗെല്ലിഗോയ്ക്ക് സമീപമുള്ള പട്ടണങ്ങളിലൂടെ ഒഴുകുന്ന ലാക്ലാൻ നദിയിലും പരിസരപ്രദേശങ്ങളിലുമാണ് നിലവിൽ പോലീസിന്റെ പ്രധാന ശ്രദ്ധ. പ്രതി പിടിക്കപ്പെടാത്തത് പ്രദേശവാസികളെയും കൊല്ലപ്പെട്ടവരുടെ കുടുംബങ്ങളെയും ഒരുപോലെ ഭീതിയിലാഴ്ത്തിയിരിക്കുകയാണ്.
മാനസിക സമ്മർദ്ദം അനുഭവിക്കുന്നവർക്ക് സഹായത്തിനായി താഴെ പറയുന്ന നമ്പറുകളിൽ ബന്ധപ്പെടാവുന്നതാണ്:
- 13YARN (13 92 76) – 24 മണിക്കൂറും പ്രവർത്തിക്കുന്ന ഹെൽപ്പ് ലൈൻ.
- 1800RESPECT (1800 737 732) – നാഷണൽ ഡൊമസ്റ്റിക് വയലൻസ് കൗൺസിലിംഗ് സർവീസ്.
